කිත්සිරි රාජපක්ෂ හෙවත් පොඩි චොප්පේ යනු ප්‍රකට මරදානේ චොප්පේ ගේ පුත්‍රයා ය. රනිල් වික්‍රමසිංහ මහතාව පක්ෂයේ බිම් මට්ටමේ සාමාජිකයින් කරා ...
කිත්සිරි රාජපක්ෂ හෙවත් පොඩි චොප්පේ යනු ප්‍රකට මරදානේ චොප්පේ ගේ පුත්‍රයා ය. රනිල් වික්‍රමසිංහ මහතාව පක්ෂයේ බිම් මට්ටමේ සාමාජිකයින් කරා ගෙන ගියේ පොඩි චොප්පේ විසිනි. දන්නා කලක සිටම කවුරුන් රනිල් වික්‍රමසිංහ මහතා හැර ගිය ද කිත්සිරි හැරගියේ නැත. රනිල් වික්‍රමසිංහ මහතා කුමන ජාත්‍යන්තර සමුළුවක සිටියද දුරකථන ඇමතුමට පිළිතුරු දෙන කිහිපදෙනා අතරින් කිත්සිරි ද එකෙකු විය.
කිත්සිරි රාජපක්ෂ සෑම වසරකම බක් මහ උළෙලක් පවත්වයි. ඊට රනිල් වික්‍රමසිංහ මහතාගේ සහභාගීත්වය අනිවාර්යය. රනිල් විදෙස්ගත වී සිටියේ නම් ඔහු අනිවාර්යයෙන් සිය බිරිඳ වන මෛත්‍රී වික්‍රමසිංහ මහත්මියව ඊට සහභාගී කරවයි. කිත්සිරි රාජපක්ෂ යනු රනිල් වික්‍රමසිංහ මහතාට එතරම්ම ළඟින් සිටි පාක්ෂිකයෙකි.
එසේම, කිත්සිරි රාජපක්ෂ යනු රනිල් වික්‍රමසිංහ මහතාට දිනකට අවම වශයෙන් එක් ඇමතුමක් හෝ ඊට වැඩියෙන් හෝ ගන්නා පුද්ගලයෙකි. "ඇයි කිත්සිරි?" "නෑ සර්, මං නිකම් කතා කරේ" "මට වැඩ තියෙනවා කිත්සිරි, පස්සෙ ගන්නම්" වැනි දෙබස් එකල දුලබ ඒවා නොවිණි. රනිල් වික්‍රමසිංහ මහතා එකල එතරම්ම ඉවසීමෙන් කිත්සිරි රාජපක්ෂ සමඟ කටයුතු කළේය.
එහෙව් කිත්සිරි රාජපක්ෂ මල් පොහොට්ටුවෙන් ඡන්දය ඉල්ලන්නට යනවායැයි කීම නම් අමුතු දෙයකි. මල් පොහොට්ටුවක් හොඬින් ගෙනයාමට අලියාට හැකිය. මල් පොහොට්ටුවක් අතින් ගෙනයාමට අතට ද හැකිය. අපට ඇත්තේ බලා හිදීමය.
COMMENTS