දෙමළ ජනතා සභාව විසින් යාපනයේදී සංවිධානය කළ 'එළුග තමිල්' විරෝධතාවය හෙවත් දෙමළ ජනතාවගේ නැගිටීම නම් වූ ජනතා විරෝධයට දෙමළ ජාතික සන්ධාන...
දෙමළ ජනතා සභාව විසින් යාපනයේදී සංවිධානය කළ 'එළුග තමිල්' විරෝධතාවය හෙවත් දෙමළ ජනතාවගේ නැගිටීම නම් වූ ජනතා විරෝධයට දෙමළ ජාතික සන්ධානය පක්ෂයක් වශයෙන් කිසිදු සම්බන්ධයක් නොදැක්වූ බව දෙමළ ජාතික සන්ධානයේ යාපනය දිස්ත්‍රික් පාර්ලිමේන්තු මන්ත්‍රී එම්.ඒ. සුමන්තිරන් මහතා පවසයි.
දෙමළ ජාතික සන්ධානය විසින් රජයෙන් ඉල්ලා සිටින ඉල්ලීම් ඒ අන්දමින්ම දෙමළ ජනතා සභාව ද ඉල්ලා සිටියත් එය සංවිධානයක් මිස දෙමළ දේශපාලන පක්ෂයක් නොවන බව මන්ත්‍රීවරයා මේ සම්බන්ධයෙන් අදහස් දක්වමින් කියා සිටියේය.
දෙමළ ජාතික සන්ධානය රජය සමඟ ව්‍යවස්ථා සංශෝධනයක් සදහාත් දෙමළ ජනතාවගේ ප්‍රශ්න විසදාගැනීම සදහාත් සාකච්ඡා කරමින් සිටින අතරතුර මෙවැනි විරෝධතාවයක් පැවැත්වීම නුසුදුසු බව දෙමළ ජනතා සභාවට පැවසූ නමුත් ඔවුන් එය නොතැකූ බවද සුමන්තිරන් මන්ත්‍රීවරයා පැවසීය.
මෙම එළුග තමිල් විරෝධතාවය නිසා දකුණේ ජනතාව දෙමළ ජාතික සන්ධානය පිළිබදව වැරදි අවබෝධයක් ඇති කරගන්නා බව කී මන්ත්‍රීවරයා එවැනි වැරදි අදහස් ඇතිවීම මේ අවස්ථාවේදී සිදු නොවිය යුත්තක් ලෙස පෙන්වා දුන්නේය.
දෙමළ ජාතික සන්ධානය රජය සමග සාකච්ඡා කරමින් උත්සහ කරන්නේ සියලු ජනකොටස් වලට පිළිගත හැකි ආණ්ඩුක්‍රම ව්‍යවස්ථාවක් සියළු දෙනාගේ සහභාගිත්වයෙන් සම්පාදනය කරගැනීමට බවත් දෙමළ ජනතාවට එවැනි ව්‍යවස්ථාවක් ලැබී ඔවුන්ගේ ප්‍රශ්න රජයෙන් විසදෙනු ඇතැයි තමන් බලාපොරොත්තු වන බවත් සුමන්තිරන් මන්ත්‍රීවරයා පවසා සිටියේය.
වැඩිදුරටත් අදහස් දැක්වූ ඒ මහතා කියාසිටියේ කෙසේ වෙතත් වත්මන් ජාතික රජයට සහය දැක්වීමට දෙමළ ජතික සන්ධානය විසින් ගෙන තිබෙන තීරණයේ කිසිම වෙනසක් නැති බවයි.
දිනසේන රතුගමගේ
COMMENTS