ඉරණමඩු ජලාශයේ ඉවත්කරපු සේනානායක මහත්වරුන්ගේ නාම පුවරුව නැවත ස්ථාපිත කරයි

කිලිනොච්චිය ඉරණමඩු ජලාශයේ ප්‍රතිශංස්කරණය කරන අවස්ථාවේදී ඉවත් කරන ලද සේනානායක මහත්වරුන්ගේ පැරණි නාම පුවරුව වහාම ක්‍රියාත්මක වන පරිදි තිබූ ස...

කිලිනොච්චිය ඉරණමඩු ජලාශයේ ප්‍රතිශංස්කරණය කරන අවස්ථාවේදී ඉවත් කරන ලද සේනානායක මහත්වරුන්ගේ පැරණි නාම පුවරුව වහාම ක්‍රියාත්මක වන පරිදි තිබූ ස්ථානයේම නැවත ඉදිකරන ලෙසට උතුරු පලාත් ආණ්ඩුකාර රෙජිනොල්ඩ්කුරේ මහතා නියෝග කොට ඇත.

මේ අනුව ඊයේ(10) සවස් වන විට ඉරණමඩු ජලාශයේ ඉවත් කරන ලද පැරණි නාම පුවරුව තිබූ ස්ථානයේම නැවත සවි කිරීමට කිලිනොච්චිය වාරිමාර්ග නිලධාරීන් කටයුතු කරනු ලැබීය.

මීට දින කිහිපයකට පෙර ඉරණමඩු ජලාශයේ සංවර්ධන කටයුතු වෙනුවෙන් 1954 වසරේදී එවක අග්‍රාමාත්‍ය වු ඩි.එස්.සේනානායක මහතා හා එවක කෘෂිකර්ම අමාත්‍ය ඩඩ්ලි සේනානායක මහත්වරුන්ගේ නාමයන් සඳහන්ව පැවති නාම පුවරුව එලෙස ඉවත් කොට ඇති බවට කිලිනොච්චියේ ප්‍රදේශවාසීන් කියා සිටියහ.

නමුත් මේ පිළිබඳව කිලිනොච්චිය වාරිමාර්ග නිලධාරීන්ගෙන් විමසීමේදී කියා සිටියේ වසර ගණනාවක් පුරාවට පැවති එම නාම පුවරුව අබලන් තත්වයක පැවතීම හේතුවෙන් ඉවත් කොට නැවත පිලිසකර කොට එම ස්ථානයේම නැවත ඉදිකිරීමට පියවර ගන්නා බවටයි.

අදාල නාම පුවරුව ඉවත් කිරීම සම්බන්ධයෙන් උතුරු පලාත් ආණ්ඩුකාර තුමන් දැනුවත් වී නොතිබීමත් කිලිනොච්චිය වැසියන්ගෙන් එල්ල වූ විරෝධතාත් සමග ඒ බව උතුරු ආණ්ඩුකාර වරයාට සැල වූ වහාම අදාල නාම පුවරුව එම ස්ථානයේම සවි කිරීමට කොන්ත්‍රාත් කරුවන්ට හා වාරිමාර්ග නිලධාරීන්ට උපදෙස් දී තිබුණි.

මේ අතර පසුගිය 07 වනදා කිලිනොච්චිය ඉරණමඩුව රුපියල් මිලියන 2000 කට අධික මුදලකින් සංවර්ධනය කොට ජනාධිපති මෛත්‍රීපාල සිරිසේන මැතිතුමන් අතින් වාන් දොරටුව විවෘත්ත කල අතර ඊට පෙර නව නාම පුවරුවක්ද විවෘත්ත කරනු ලැබීය.

(වන්නි රොමේෂ් මධුෂංඛ)