අවුරුදු 35ට අඩු ත්‍රී රෝද රථ රියදුරන්ට පනවා ඇති කුලී ගමන් තහනම අත්හිටුවීමට කැබිනට් මණ්ඩලය තීරණය කර ඇතැයි වාර්තා වේ. රජයේ ආරංචි මාර්ග සඳහ...
අවුරුදු 35ට අඩු ත්‍රී රෝද රථ රියදුරන්ට පනවා ඇති කුලී ගමන් තහනම අත්හිටුවීමට කැබිනට් මණ්ඩලය තීරණය කර ඇතැයි වාර්තා වේ.
රජයේ ආරංචි මාර්ග සඳහන් කළේ ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ජනාධිපති කාර්යාලයේ ඊයේ (21) පැවැති කැබිනට් රැස්වීමේදී මෙම තීරණය ගෙන ඇති බවයි.
අවුරුදු 35ට අඩු ත්‍රීරෝද රථ රියදුරන්ට කුලී ගමන් තහනම් කරමින් මීට පෙර නීතියක් ගෙන ඒමට කටයුතු කළ අතර ඒ සම්බන්ධයෙන් මුදල් ඇමැති මංගල සමරවීර මහතා ඇතුළු ඇමැතිවරුන් කිහිපදෙනෙකු ඊට විරෝධය පළකර තිබිණි.
මෙවැනි නීතියක් ගෙන ඒමෙන් කෙනෙකුට තමත් කැමැති රැකියාවක් කිරීමට තිබෙන අයිතිය අහිමි වෙනවා පමණක් නොව වයස සීමාවක් පැනවීමෙන් තරුණයින්ට ත්‍රීරෝද රථයක් පැදවීමට තිබෙන අවස්ථාවද අහිමි වන බව මුදල් ඇමැති මංගල සමරවීර මහතා එහිදී ප්‍රකාශ කර ඇතැයි වාර්තාවේ.
එබැවින් කළ යුත්තේ ත්‍රීරෝද රථ රියදුරන්ට වයස සීමා පැනවීම නොව ත්‍රීරෝද රථ ප්‍රමාණය සංඛ්‍යාත්මකව අඩු කිරීම යැයි ඇමැතිවරුන් කිහිපදෙනෙකු එහිදී පෙන්වා දී තිබේ.
එම අවස්ථාවේදී ප්‍රවාහන ඇමැති නිමල් සිරිපාලද සිල්වා මහතා ප්‍රකාශ කර ඇත්තේ මෙවැනි නීතියක් ගෙන ඒමට හේතුවුයේ අවුරුදු 35ට අඩු ත්‍රීරෝද රථ රියදුරන් අතින් විශාල ලෙස අනතුරු සිදුවීමත් ඵලදායක ලෙස යෙදවීමට හැකි තරම් ශ්‍රමය මෙවැනි දේට යෙදවීම රටේ ආර්ථිකයට ඝෘජුව බලපෑමක් කරන නිසා බවයි.
ඇමැතිවරුන්ගෙන් ඉදිරිපත් වූ අදහස් හා යෝජනා පිළිබඳව දීර්ඝ ලෙස සාකච්ඡා කිරීමෙන් පසු මෙම නීතිය ක්රියාත්මක නොකිරීමටත්, ත්‍රීරෝද රථ ප්‍රමාණය සංඛ්‍යාත්මකව අඩු කිරීමටත් කැබිනට් මණ්ඩලය තීරණය කළ බව එම ආරංචි මාර්ග සඳහන් කළේය.
COMMENTS