වෛරී ප්‍රකාශ හා ව්‍යාජ පුවත් සමාජ ජාල මාධ්‍ය හරහා ප්‍රචාරය කිරීම වැළැක්වීම සඳහා අවශ්‍ය නීති කෙටුම්පත් සැකසීම සඳහා සලකා බලමින් සිටින බව ඩි...
වෛරී ප්‍රකාශ හා ව්‍යාජ පුවත් සමාජ ජාල මාධ්‍ය හරහා ප්‍රචාරය කිරීම වැළැක්වීම සඳහා අවශ්‍ය නීති කෙටුම්පත් සැකසීම සඳහා සලකා බලමින් සිටින බව ඩිජිටල් යටිතල පහසුකම් පිළිබඳ අමාත්‍ය හරීන් ප්‍රනාන්දු මහතා පවසයි.
මැලේසියාව ආදී රටවල ඇති නීති රීති පිළිබඳ අධ්‍යනය කරමින් සිටින බවත් මාසයක් තුළ අදාළ නීති ගෙන ඒමට බලාපොරොත්තු වන බව එතුමන් ප්‍රකාශ කළේය.
මේ සම්බන්ධයෙන් රජය මෑත දී අත්දැකීම් රාශියක් කර ඇති බවත් පසුගියදා මහනුවර ප්‍රදේශයේ ප්‍රචණ්ඩත්වයට ප්‍රධාන වශයෙන් බලපා ඇති සමාජ මාධ්‍ය හරහා ද්වේෂ සහගත වෛරය පැතිරීම බව විදුලි සංදේශ හා ඩිජිටල් යටිතල පහසුකම් පිළිබඳ අමාත්‍ය හරීන් ප්‍රනාන්දු මහතා ප්‍රකාශ කළේය.
මෙම නීති කෙටුම්පත් සකස් කිරීම සඳහා අමාත්‍ය මණ්ඩලය විසින් කමිටුවක් පත් කර ඇති අතර ඒ සඳහා විදුලි සංදේශ හා ඩිජිටල් යටිතල පහසුකම් පිළිබඳ අමාත්‍ය හරීන් ප්‍රනාන්දු, නීතිය සාමය පිළිබඳ අමාත්‍ය රංජිත් මද්දුම බණ්ඩාර , මුදල් හා ජනමාධ්‍ය අමාත්‍ය මංගල සමරවීර යන මහත්වරුන් හා ආරක්ෂක අමාත්‍යංශයේ නියෝජිතයන්ගෙන් සමන්විත කමිටුවක් පත් කර තිබේ.
මහනුවර වැනි සිදුවීම් යළිත් ඇති නොවීමට වගබලා ගන්නා බවට සහතික කිරීම සඳහා විදුලි සංදේශ නියාමන කොමිෂන් සභාව (TRC) සමඟ එක්ව කටයුතු කරන බව ද අමාත්‍යවරයා පැවසීය.
අමාත්‍යවරයා මේ බව පැවසුවේ ෆේස්බුක් දත්ත අපහරණය සම්බන්ධයෙන් මාක් සකර්බර්ග් ඇමෙරිකානු කොංග්‍රස් මණ්ඩලය හමුවේ කළ ප්‍රකාශය සම්බන්ධයෙන් විමසූ අවස්ථාවේදියි.
කේම්බ්‍රිජ් ඇනලිටිකා (Cambridge Analytica) සමාගම ෆේස්බුක් ග්‍රාහකයන් දශ ලක්ෂ ගණනක පුද්ගලික දත්ත රැස්කිරීමේ චෝදනාව පිළිබඳව ෆේස්බුක් සමාගමේ ප්‍රධානියා දෙවැනි දිනයේත් සමාව ඉල්ලා සිටියේය.
දත්තවල ආරක්ෂාව සම්බන්ධ "සිය වගකීම ගැන පුළුල් අදහසක් නොතිබීම" පිළිබඳ බදාදා (අප්‍රේල් 11) යළිත් වරක් සමාව ඉල්ලා සිටි ෆේස්බුක් ආයතනයේ නිර්මාතෘ මාක් සකර්බර්ග් (Mark Zuckerberg) අනාගතයේදී එම ගැටළු විසඳීමට පියවර ගන්නා බවට ප්‍රතිඥාවක්ද ලබා දුන්නේය.
මාක් සකර්බර්ග් එම ප්‍රකාශය කළේ ඇමෙරිකානු කොංග්‍රස් කමිටුවක් හමුවේ දෙවෙනි දිනයටත් සාක්ෂි දෙමිනි.
අඟහරුවාදා (අප්‍රේල් 10) මුලින්ම කමිටුව ඉදිරියේ පෙනී සිටි ඔහුගෙන් පැය පහක් මුළුල්ලේ ප්රශ්න කරනු ලැබුණි.
COMMENTS