කහල්ල පල්ලේකැලේ අභයභූමිය තුල වන අලින්ට ගැවසීමට හැකිවන පරිදි සූදානම් කිරීමට මිනිස් ශුම දින පන්දහසක් තම සංවිධානය මඟින් ලබාදීමට පොරොන්දු වු...
කහල්ල පල්ලේකැලේ අභයභූමිය තුල වන අලින්ට ගැවසීමට හැකිවන පරිදි සූදානම් කිරීමට මිනිස් ශුම දින පන්දහසක් තම සංවිධානය මඟින් ලබාදීමට පොරොන්දු වුවද රජය එය ලබා නොගෙන මග හරින බව සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා පැවසීය.
රජයේ සංගණන අනුව වන අලින් 563ක් පමණ ජීවත්වන කුරුණෑගල දිස්ත්‍රික්කයත් මාතලේ දිස්ත්‍රික්කය අනුරාධපුර දිස්ත්‍රික්කයත් යාකෙරෙන කහල්ල පල්ලෙකැලේ රක්ෂිතයේ වන අලින්ට උචිතවන පරිදි තෘණ වගා කිරීම පානීය ජලය සඳහා වැව් ප්‍රතිසංස්කරණය කිරීම ආදි කටයුතු සිදුකරගැනීම සඳහා ශ්‍රම දින පන්දහසක් තම සංවිධානය මඟින් රජයට ලබා දීමට හැකි බව ජනාධිපතිවරයා විෂයභාර අමාත්‍යවරයා ඇතුළු සියලු දෙනාට ම දැනුම් දී තිබෙන බවත් එහෙත් වනඅලි ප්‍රශ්නයට විශාල වූ විසඳුමක් ලෙස මෙය ක්රියාත්මක කළ හැකි බව හෙතෙම සඳහන් කළේ ය.
කහල්ල පල්ලෙකැලේ රක්ෂිතයේ ජීවත්වන වන අලින්ට පවතින ජල හිගය ආහාර හිගය නිසා ඔවුන් කුරුණෑගල දිස්ත්‍රික්කයට මාතලේ දිස්ත්‍රික්කය අනුරාධපුර දිස්ත්‍රික්කයට ගම්මාන වලට කඩා වැදී ජනතාව සමඟ අලි මිනිස් ගැටුම හටගෙන ඇතැයි නාමල් කරුණාරත්න මහතා වැඩිදුරටත් සඳහන් කළේය. මෙයට කඩිනම් විසඳුම බවට පත්ව ඇත්තේ කහල්ල පල්ලෙකැලේ වන අලින්ට ආහාරයට රුචි තෘණ වගා කිරීම මෙන්ම වැව් ප්‍රතිසංස්කරණය කොට ඒවාට ජලය ලබාදීම බව හෙතෙම අවධාරණය කළේය. ඒත් මෙම යෝජනාව පිළිබඳව බලධාරීන්ගේ කිසිදු අවධානයක් නොකර වන අලින් සහ ජනතාව අතර බද්ධ වෛරයක් පවත්වාගෙන යමින් එක් පසෙකින් වන අලින්ගේ ජීවිතත් අනෙක් පසින් ජනතාවගේ ජීවිත අනෙක් පසෙන් දේපළ ද හානි සිදුවෙන බව හෙතෙම කියා සිටියේ ය.
දිවයිනේ පළාත් තුනක වන අලි මිනිස් ගැටුම අවසන් වීම සඳහා ඇති සරලම විසඳුමට රජය අකමැත්තක් දක්වනු ලබන්නේ එම ප්‍රදේශවල දේශපාලනඥයින්ගේ සංචාරක හෝටල් කර්මාන්තයට සිදු වෙන හානිය නිසාවෙන් බවත් බොහෝ සංචාරක හෝටල් හිමිකරුවන් කැලෑවේ සිටින වන අලින් තම හෝටල්වලට ගෙන්වා ගැනීම සඳහා දියලුණු අන්නාසි වැනි ආහාර හෝටල් ආසන්නයේ වනලැහැබ් වලට රැගෙනවිත් දැමීම නිසා වන අලින් ගම්වැදීම සිදුවන බවද හෙතෙම අවධාරණය කළේය.
එසේ නොවන්නේ නම් මිනිස් දින පන්දහසක් නොමිලේ ලබාදීමට තීරණය කළ සංවිධානයට යෝජනාව ප්‍රතික්ෂේප කරන්නේ කෙසේ දැයි තමන් ප්‍රශ්න කරන බව ද කියා සිටියේ ය.
(දඹුල්ල කාංචන කුමාර ආරියදාස)
COMMENTS