ජාතික රුධිර පාරවිලයන මධ්‍යස්ථානයේ වෛද්‍යවරුන් අද සිට වර්ජනයක් ආරම්භ කරන බව රජයේ වෛද්‍ය නිලධාරීන්ගේ සංගමය පවසයි. එහි මාධ්‍ය ප්‍රකාශක වෛද්‍...
ජාතික රුධිර පාරවිලයන මධ්‍යස්ථානයේ වෛද්‍යවරුන් අද සිට වර්ජනයක් ආරම්භ කරන බව රජයේ වෛද්‍ය නිලධාරීන්ගේ සංගමය පවසයි.
එහි මාධ්‍ය ප්‍රකාශක වෛද්‍ය සමන්ත ආනන්ද මහතා කියා සිටියේ සුදුසුකම් නොමැති පුද්ගලයෙකු රුධිර පාරවිලයන මධ්‍යස්ථානයේ වැඩබලන අධ්‍යක්ෂ ධූරයට පත් කිරීමට එරෙහිව මෙම වර්ජනය ක්රියාත්මක කරන බවයි.
රුධිර පාරවිලයන මධ්‍යස්ථානයේ ශාඛා 107 ක් රට පුරා පවතින අතර, වර්ජනයේ පළමු ක්‍රියාමාර්ගය ලෙස රට පුරා ලේ දන්දීමේ කඳවුරුවල කටයුතු ඇණහිටිනු ඇතැයි ඔහු සඳහන් කළේය.
වෛද්‍යවරුන් පෙන්වා දෙන්නේ අදාළ රසායනිකය කඩිනමින් මෙරටට ගෙන්වීමට කටයුතු නොකළහොත් පුද්ගලයින් අතර රුධිර පාරවිලයන ක්‍රියාවලිය අඩපණ වන බවයි.
මේ අතර, රජය විසින් තෝරා ගත් සේවා කිහිපයක දීමනා සහ වැටුප් වැඩි කිරීමට ගෙන ඇති තීරණයට විරෝධය පළ කරමින් ගණකාධිකාරීවරුන්, දේශීය ආදායම් කොමසාරිස්වරුන් සහ ආයුර්වේද වෛද්‍යවරුන් ඇතුළු වෘත්තීය සමිති කිහිපයක සාමාජිකයින් අද දිනයේ ලෙඩ නිවාඩු දැමීමේ වෘත්තීය ක්‍රියාමාර්ගයක නිරත වේ.
එමෙන්ම ක්ෂේත්‍ර 19කට අයත් රජයේ විධායක නිළධාරීන් අනිද්දා එක්දින සංකේත වර්ජනයක සහ විරෝධතාවයක නිරතවීමට රජයේ විධායක නිළධාරීන්ගේ ඒකාබද්ධ කමිටුව තීරණය කර තිබේ.
එහි ලේකම් එච්.ඒ.එල්. උදයසිරි මහතා කියා සිටියේ ජාතික වැටුප් ප්‍රතිපත්ති උල්ලංගණය කරමින් නීති ක්ෂේත්‍රයේ වැටුප් තල වැඩි කිරීමට විරෝධය පළ කරමින් ඉංජිනේරු, ක්‍රමසම්පාදන, ආයුර්වේද, මිනින්දෝරු, දේශීය ආදායම්, ගුරු - අධ්‍යාපන සේවා ඇතුළු විධායක ශ්‍රේණිවලට අයත් නිලධාරීන් මෙම වර්ජනයට එක්වන බවය.
COMMENTS