මහනුවර විනාශ වූ දේපලවලට කඩිනමින් වන්දි

මහනුවර පැවැති නොසන්සුන්කාරී වතාවරණයත් සමඟ සිදුවූ පහර දීම් වලින් හානි වූ පූජනීය ස්ථාන හා පෞද්ගලික දේපොළ වල වටිනාකම් තක්සේරු කිරීම සතියක් ඇත...

මහනුවර පැවැති නොසන්සුන්කාරී වතාවරණයත් සමඟ සිදුවූ පහර දීම් වලින් හානි වූ පූජනීය ස්ථාන හා පෞද්ගලික දේපොළ වල වටිනාකම් තක්සේරු කිරීම සතියක් ඇතුළත නිම කර වන්දි ලබා දීම් කඩිනමින් කරන ලෙස අගමැති රනිල් වික්‍රමසිංහ මහතා නිලධාරීන්ට දැනුම් දුන්නේය.

තක්සේරු කිරීම් පිළිබඳ අවසන් වාර්තාව එළඹෙන සිකුරාදා හෝ ඊට පෙර බාර දෙන ලෙස දැනුම් දුන් අගමැතිවරයා ගැටුම් වලින් මියගිය තිදෙනාගේ පවුල් වලට මූලික පියවරක් ලෙස රුපියල් ලක්ෂය බැගින් වන්දි මුදල් අද (12 ) ලබා දෙන ලෙසද උපදෙස් දුන්නේය.

මියගිය අය එම පවුල් වල ආදායම් උපයන්නන් බැවින් ඔවුන්ගේ මරණ සමග එම පවුල් ඉතා අසරණ තත්ත්වයට පත්ව තිබෙන බවත් ඔවුන්ට මාසිකව ස්ථිර දීමනාවක් ලැබෙන වැඩපිළිවෙළක් සකස් කිරීම කෙරෙහි රජයේ විශේෂ අවධානය යොමුව තිබෙන බවත් අගමැතිවරයා මෙහිදී ප්‍රකාශ කළේය.

ඉදිරි සතියේ රැස්වන කැබිනට් මණ්ඩලයට වාර්තාවක් ඉදිරිපත් කර මෙම වන්දි මුදල වැඩි කර එක් පවුලකට රුපියල් ලක්ෂ පහක පමණ මුදලක් ලබා දීමට අපේක්ෂා කරන බවද ඒ මහතා කීය.

මහනුවර සිදුවූ පහරදීම් හේතුවෙන් විනාශ වූ දේපොළ වල වටිනාකම තක්සේරු කිරීම, මියගිය අයට වන්දි ගෙවීම් තීන්දු කිරීම, වන්දි ප්‍රදානය හා විනාශවූ ගොඩනැගලි ප්‍රතිසංස්කරණය ආදි කරුණු පිළිබඳ සාකච්ඡා කිරීම පිණිස මහනුවර දිස්ත්‍රික් ලේකම් කාර්යාලයේදී පැවැති රැස්වීමකදී අගමැතිවරයා මෙම උපදෙස් ලබාදුන්නේය.

හානිවූ ව්‍යාපාරික ස්ථානයකට රුපියල් ලක්ෂයකද නිවාසයකට රුපියල් 50000.00 කද මූලික ගෙවීමක් කඩිනමින් ගෙවන ලෙස මෙහිදී අගමැතිවරයා නිලධාරීන්ට උපදෙස් දුන්නේය.

මෙම අවසානාවන්ත සිදුවීම් නිසා මහනුවර ප්‍රාදේශීය ලේකම් කොට්ඨාශ 05 ක පූජනීය ස්ථාන, නිවාස, ව්‍යාපාරික ස්ථාන හා වාහන 465 කට හානි සිදුව තිබෙන බවත් මේ අතර නිවාස පමණක් 232 ක් තිබෙන බවත් කී අගමැතිවරයා පූර්ණ, අර්ධ හා සුළු වශයෙන් හානිවල ස්වභාවය අනුව මේවා වර්ග කර තිබෙන බවද අවධාරණය කළේය.

මෙම සිදුවීම සම්බන්ධයෙන් පත් කෙරෙන කොමිසම් මගින් සිදුවන්නේ යම් යම් නිගමන ඉදිරිපත් කිරීම පමණක් බවත් ඒ නිසා වඩා වැදගත් වන්නේ අවුල්ව පවතින ජන ජීවිතය යළි කඩිනමින් යථා තත්ත්වයට ගෙන ඒම පිණිස අවශ්‍ය ක්‍රියාමාර්ග ගැනීම බවත් අගමැතිවරයා කීවේය.