එක්සත් ජාතික පක්‍ෂය විසින් විශ්වාසභංග යෝජනාවක්‌ ගෙන ආවත් නැතත් ඒකාබද්ධ විපක්‍ෂය විසින් අද (06) දවස ඇතුළත අගමැතිවරයාට එරෙහි විශ්වාසභංග යෝජ...
එක්සත් ජාතික පක්‍ෂය විසින් විශ්වාසභංග යෝජනාවක්‌ ගෙන ආවත් නැතත් ඒකාබද්ධ විපක්‍ෂය විසින් අද (06) දවස ඇතුළත අගමැතිවරයාට එරෙහි විශ්වාසභංග යෝජනාවක්‌ පාර්ලිමේන්තුවේදී කථානායකවරයා වෙත භාරදීමට තීරණය කර ඇත.
ඒකාබද්ධ විපක්‍ෂයේ පාර්ලිමේන්තු මන්ත්‍රී රංජිත් සොයිසා මහතා සදහන් කළේ යම් හෙයකින් එක්සත් ජාතික පක්ෂයේ මන්ත්‍රීවරුන් කණ්ඩායම අගමැතිවරයාට එරෙහිව විශ්වාසභංග යෝජනාවක්‌ අද ඉදිරිපත් කරන්නේ නම් එහි අඩංගු කරුණු සලකා බලා ඒකාබද්ධ විපක්‍ෂයේ මන්ත්‍රීවරුන් ද ඊට අත්සන් තබන බවයි.
එජාපය විසින් විශ්වාසභංග යෝජනාවක්‌ අගමැතිවරයාට එරෙහිව ගෙන එනු ඇතැයි සිතිය නොහැකි බවත් එසේ වූවොත් ඒකාබද්ධ විපක්‍ෂය අනිවාර්යයෙන්ම අද දිනය තුළ අදාළ විශ්වාසභංග යෝජනාව භාර දෙන බවත් මන්ත්‍රීවරයා ප්‍රකාශ කළේය.
දැනටමත් එම විශ්වාසභංග යෝජනාව සඳහා ඒකාබද්ධ විපක්‍ෂයේ මන්ත්‍රීවරුන් තිහකට අධික සංඛ්‍යාවකගේ අත්සන් ලැබී ඇති අතර මේ සම්බන්ධව සාකච්ඡා කිරීම සඳහා හිටපු ජනපති මහින්ද රාජපක්‍ෂ මහතාගේ ප්‍රධානත්වයෙන් ඒකාබද්ධ විපක්‍ෂයේ මන්ත්‍රීවරුන් පනස්‌ දෙදෙනා අද පෙරවරු 10.00 ට පාර්ලිමේන්තු සංකීර්ණයේදී විශේෂ සාකච්ඡාවක් පැවැත්වේ.
මෙම සාකච්ඡාව පැවැත්වීමෙන් පසුව රට තුළ පවතින දේශපාලන අස්‌ථාවරත්වය සහ රට ව්‍යාකූලත්වයට පත් කිරීම ඇතුළු චෝදනා කිහිපයක්‌ යටතේ අගමැතිවරයාට එරෙහි විශ්වාසභංග යෝජනාව ඒකාබද්ධ විපක්‍ෂය විසින් කථානායකවරයා හමුවී භාර දෙන බවද රංජිත් සොයිසා මහතා පෙන්වා දුන්නේය.
ඒකාබද්ධ විපක්‍ෂය හෝ එජාපය විසින් අගමැතිවරයාට එරෙහිව ගෙන එන විශ්වාසභංග යෝජනාවේ සඳහන් කරුණු අනුව අත්සන් කිරීම හෝ නොකිරීම සහ සහාය දීම හෝ නොදීම පිළිබඳ තීරණයක්‌ ගන්නා බව ජනතා විමුක්‌ති පෙරමුණ ප්‍රකාශ කරයි.
මහ බැංකු බැඳුම්කර මංකොල්ලයට සහාය දැක්‌වීම, පසුගිය ආණ්‌ඩුවේ සහ වත්මන් ආණ්‌ඩුවේ දූෂිතයන් රැකගැනීම යන චෝදනා අගමැතිවරයාට එරෙහිව විශ්වාසභංග යෝජනාවේ ඇතුළත් නම් තමන් ඊට සහය දෙන බව ජවිපෙ සඳහන් කරයි.
එජාප මන්ත්‍රී කණ්ඩායම අගමැති හමුවෙයි
මේ අතර එක්සත් ජාතික පක්ෂයේ පාර්ලිමේන්තු මන්ත්‍රී කණ්ඩායම අගමැති රනිල් වික්‍රමසිංහ මහතාගේ ප්‍රධානත්වයෙන් ඊයේ(05) අරලියගහ මන්දිරයේදී රැස් වී තිබේ.
එම හමුවේදී විශ්වාසභංග යෝජනාවක්‌ ගැන සාකච්ඡා කර නොමැති බව වාර්තාවේ.
විදේශ කටයුතු රාජ්‍ය ඇමැති වසන්ත සේනානායක මහතා පැවසූවේ එක්සත් ජාතික පක්ෂයේ මන්ත්‍රීවරුන් විසින් අගමැති රනිල් වික්‍රමසිංහ මහතාට එරෙහිව විශ්වාසභංග යෝජනාවක්‌ ගෙන එන්නේ නැති බවයි.
ඒකාබද්ධ විපක්‍ෂය විසින් අගමැතිවරයාට එරෙහිව විශ්වාසභංග යෝජනාවක්‌ ගෙන එනවානම් ඊට සහාය දීම හෝ නොදීම පිළිබඳ තීරණය කරනුයේ එහි ඇතුළත් කරුණු පිළිබඳ අවධානය යොමු කළ පසුව බවද සේනානායක මහතා පැවසී ය.
එමෙන්ම වෙනත් පාර්ශවයක්‌ විසින් අගමැතිවරයාට එරෙහිව විශ්වාසභංග යෝජනාවක්‌ ගෙන ආවොත් ඊට සහය දීම පිළිබඳ තම පක්ෂයේ කණ්ඩායම සමග සාකච්ඡා කළ යුතු බවද ඔහු පෙන්වා දුන්නේය.
එක්සත් ජාතික පක්ෂයේ වෙනසක් සිදු විය යුතු බව තමන්ගේ ද ස්ථාවරය යැයි අමාත්‍ය හරීන් ප්‍රනාන්දු මහතාද ප්‍රකාශ කරයි.
COMMENTS