අග්‍රාමාත්‍ය රනිල් වික්‍රමසිංහ මහතා නීතිය හා සාමය පිළිබද අමාත්‍යාංශය බාර ගත්තේ සති දෙකක කාලයක් සදහා පමණක් බවත් ඉන් පසු එම අමාත්‍යධූරයට ෆිල...
අග්‍රාමාත්‍ය රනිල් වික්‍රමසිංහ මහතා නීතිය හා සාමය පිළිබද අමාත්‍යාංශය බාර ගත්තේ සති දෙකක කාලයක් සදහා පමණක් බවත් ඉන් පසු එම අමාත්‍යධූරයට ෆිල්ඩ් මාර්ෂල් සරත් ෆොන්සේකා මහතා පත් කරන බවත් සෞඛ්‍ය, පෝෂණ හා දේශීය වෛද්‍ය අමාත්‍ය, රජයේ සම කැබිනට් මාධ්‍ය ප්‍රකාශක රාජිත සේනාරත්න මහතා පවසයි.
අමාත්‍යවරයා මේ බව පැවසූවේ සෞඛ්‍ය අමාත්‍යාංශයේ අද (26) පෙරවරුවේ පැවැති සාකච්ඡාවක දීය.
සරත් ෆොන්සේකා මහතාගේ පත්වීමට පොලිස් දෙපාර්තමේන්තුවේ ඉහළ නිලධාරීන් අකමැති බවත් නමුත් පහළ ශ්‍රේණියේ නිලධාරීන් කැමැති බවත් අමාත්‍යවරයා සඳහන් කළේය.
එහිදී අමාත්‍යවරයා මෙසේද සඳහන් කළේය.
“අග්‍රාමාත්‍ය රනිල් වික්‍රමසිංහ මහතා නීතිය හා සාමය පිළිබද අමාත්‍යාංශය බාර ගත්තේ සති දෙකක කාලයක් සදහායි. ඉන් පසු එම අමාත්‍යධූරයට ෆිල්ඩ් මාර්ෂල් සරත් ෆොන්සේකා මහතා පත් කරනවා. සරත් ෆොන්සේකා මහතාගේ පත්වීමට පොලිස් දෙපාර්තමේන්තුවේ ඉහළ නිලධාරීන් අකමැතියි. නමුත් පහළ ශ්‍රේණියේ නිලධාරීන් කැමැතියි. කෙළින් තීන්දු ගන්නා දක්ෂයන් අවශ්‍යයයි. ඩබල් ගේම් ගහන අය මෙම තනතුරට සුදුසු නැහැ. රණවිරුවන් ගැන කථා කරන අය පිළිගත යුතුයි සරත් ෆොන්සේකා මහතාත් රණවිරුවෙක් කියලා. අද මීනි මැරූ, කොල්ල කෑ පුද්ගලයින් ද රණවිරුවන් ලෙස නම් කර තිබෙනවා. රජය තීන්දු තීරණ සාධාරණව ගත යුතුයි. ඇමැතිධූර සදාකාලික නැහැ. පුද්ගලයින් දෙස බලා තීන්දු තීරණ නොගත යුතුයි. දෙපැත්තේ කකුල් තබාගෙන සිටින අය ඉවත් කළ යුතුයි. ශ්‍රී ලංකා නිදහස් පක්ෂයේ හෝ එක්සත් ජාතික පක්ෂයේ තීන්දු වලට වඩා ජනාධිපතිවරයා සහ අග්‍රාමාත්‍යවරයා සාකච්ඡා කර තීන්දු තීරණ ගත යුතුයි. ඇමැතිවරුන්ට අවශ්‍ය පරිදි කැබිනට් මණ්ඩලය හදන්න දෙන්න බැහැ.”
“ඉදිරි වසර 02 ක කාලය තුල දි රජය ජනතාව වෙනුවෙන් සේවය කළ යුතුයි. පළාත් පාලන මැතිවරණයේ දී ජනතාව රජයට පාඩමක් උගන්වා ඇතත්, පළාත් පාලන ආයතන පිහිටුවීමේ දී එක්සත් ජාතික පක්ෂය සහ ශ්‍රී ලංකා නිදහස් පක්ෂය ඒකාබද්ධව පළාත් පාලන ආයතන පිහිටුවීමෙන් වැඩි බලයක් රජය සතු වෙනවා. ජනවාරි 08 ජනතාව ලබාදුන් ජනවරමට අනුව අපි කටයුතු කළ යුතුයි. ජාතික රජයක සිටීමේ දී කැපකිරීම් කිරීමට ද සිදු වෙනවා. එක්සත් ජාතික පක්ෂයට තනි රජයක් බිහි කිරීමට අවස්ථාව තිබුනේ 2015 වසරේ දීයි. නමුත් දේශපාලන ජයග්‍රහණ වලට වඩා රට ජයග්‍රහණය කිරීමේ අරමුණින් යහපාලන රජය බිහි කිරිමට අපි තීරණය කළා. මම කිසිදු මැතිවරණ වේදිකාවක එක්සත් ජාතික පක්ෂය හෝ ශ්‍රී ලංකා නිදහස් පක්ෂය විවේචනය කළේ නැහැ. ජනවාරි 08 දාට ප්‍රථම විවේචනය කළ පිරිසම තමයි මම මෙවරත් විවේචනය කළේ. ඒ මගේ ස්ථාවරත්වයයි.” යැයිද අමාත්‍යවරයා වැඩිදුරටත් පැවසී ය.
COMMENTS