පොළොන්නරුව ඇතුමල්පිටිය ප්‍රදේශයේදී මෙසේ අනතුරට ලක්ව ජීවිතක්ෂයට පත්වූයේ ඒ.ජේ.එම්. ජයරත්න (48) සහ ඒ.ජේ.එම්. බුද්ධදාස යන එකම පවුලේ සොහොයු...
පොළොන්නරුව ඇතුමල්පිටිය ප්‍රදේශයේදී මෙසේ අනතුරට ලක්ව ජීවිතක්ෂයට පත්වූයේ ඒ.ජේ.එම්. ජයරත්න (48) සහ ඒ.ජේ.එම්. බුද්ධදාස යන එකම පවුලේ සොහොයුරන් දෙදෙනෙකි. වකුගඩු රෝගියකු වන බුද්ධදාස මහතාගේ ප්‍රථිකාර කටයුත්තක් සඳහා ගොස් නැවත යතුරුපැදියෙන් පැමිණෙන අතරතුර අළුයම 1.30ට පමණ ඔවුන් මෙම අනතුරට මුහුණ දී තිබේ. ඒ.ජේ.එම් ජයරත්න ජනතා විමුක්ති පෙරමුණේ ක්‍රියාකාරිකයකු වන අතර ඔහු මෙවර පළාත් පාලන මැතිවරණයට ජවිපෙන් අපේක්ෂකයකු ලෙස ඉදිරිපත් වීමට ද සිටි බව පැවසේ.
අනතුර සිදුවන අවස්ථාවේදී ලාල් සිරිසේන විසින් ම එම ලෑන්ඩ් කෲසර් ජීප් රිය ධාවනය කර ඇතත් පසුව වෙනත් රියදුරෙකු ඉදිරිපත් කිරීමේ උත්සාහයක් තිබුණ ද සිද්ධිය ඇසින් දුටුවන්ගේ සාක්ෂි නිසා එය ව්‍යර්ථ වී ඇති බව ලංකා ටෲත් වෙබ් අඩවිය වාර්තා කර තිබිණි.
කෙසේවෙතත් ලංකා නිව්ස් වෙබ් අප වෙත පුවත ලැබුණු පසු අප එය තහවුරු කරගැනීම සඳහා මුලින් ම ඇමතුවේ ජනතා විමුක්ති පෙරමුණේ නායක අනුර කුමාර දිසානායක මහතාටය. ඇමතුම් උත්සාහ කිහිපයකටම පසුව ඔහු පිළිතුරු දෙමින් පැවසුවේ තමන් ඒ මොහොතේ වෙනත් වැඩක නිරත වී සිටිනා බවත් පසුව ඔහුම ඇමතුමක් ගන්නා බවත්ය. නමුත් ඒ ඇමතුම ලැබුණේ නැත. අප ඉන්පසුව ඇමතුවේ අපරාධ පරීක්ෂණ දෙපාර්තමේන්තුවටය. ඔවුන් පැවසුවේ එවැන්නක් ගැන තමන් නොදන්නා බවය. අවසාන වශයෙන් අප ඇමතුවේ ජනමාධ්‍ය අමාත්‍යාංශයටය. ඔවුන්ගේ ද පිළිතුර වුණේ තමන් ඒ ගැන නොදන්නා බවය. ඊයේ පාන්දර සිදුවූ අනතුර පිළිබඳව ඊයේ රාත්‍රිය වන තෙක්ම ප්‍රධාන ධාරාවේ මාධ්‍ය ආයතන විසින් නිසි පරිදි වාර්තා කර තිබුණේද නැත.
මේ සිදුවන්නට යන්නේ පැරණි එකමය. හිටපු ජනාධිපතිවරයාගේ පවුලේ පුවත් වාර්තා කිරීම සම්බන්ධයෙන් ද ඒ යුගයේ පැවතුණේ මෙවැනිම ප්‍රතිපත්තියකි. ඒවා පොලිසිය දැන සිටියේද නැත. ජනමාධ්‍ය අමාත්‍යාංශය දැන සිටියේද නැත.
මෙහිදී ජනාධිපති මෛත්‍රීපාල සිරිසේන මහතාගේ මැදිහත්වීමකින් තොරව ම ලාල් සිරිසේනට අනුරාධ බන්ධනාගාරය වෙත යෑමට ඊයේ සිදුව තිබිණි. එහෙත් පුවත තහවුරු කරගන්නට කතා කළ අයගේ කටවල් නෑරුණේ 'අතිගරු' තුමන් වෙත පවත්නා සුපුරුදු බියෙනි. සිදුවීම් සිදුවන්නේ මේ ආකාරයට නම් ජවිපෙ මැදිහත්වීම නොවන්නට මෙය තවත් එක් හඳුනානොගත් රිය අනතුරක් වන්නට ද ඉඩ තිබිණි.
ජනපතිගේ සොයුරාව අත් අඩංගුවට ගැනීමෙන් අනතුරුව ඉහළ පොලිස් නිලධාරීන් ජනපතිවරයාව ඇමතූ බවත් "මගෙන් අහන්නේ මොකටද ? තරාතිරම නොබලා නීතිය ක්රියාත්මක කරන්න" යැයි ජනපතිවරයා පැවසූ බවත් ලංකා ඊ නිව්ස් වාර්තා කර තිබිණි. ප්‍රශ්නය සැබැවින් ම ඇත්තේ එතැනය. නීතිය ක්රියාත්මක කරනවා වෙනුවට ජනපතිගෙන් විමසීමට ඉහළ පොලිස් නිලධාරීන් උත්සාහගන්නේ ඇයි ? ජනපති කීවානම් නීතිය නැවීමටද ?
COMMENTS