තවත් පෞද්ගලික වෛද්‍ය විද්‍යාල ගණනාවක් මෙරට ආරම්භ කිරීමට සූදානම් බවත් ඒ සඳහා රජය සූදානමින් සිටින බවත් උසස් අධ්‍යාපන හා මහාමාර්ග අමාත්‍ය ලක්...
තවත් පෞද්ගලික වෛද්‍ය විද්‍යාල ගණනාවක් මෙරට ආරම්භ කිරීමට සූදානම් බවත් ඒ සඳහා රජය සූදානමින් සිටින බවත් උසස් අධ්‍යාපන හා මහාමාර්ග අමාත්‍ය ලක්ෂ්මන් කිරිඇල්ල මහතා පවසයි.
අමාත්‍යවරයා මේ බව පැවසූයේ අද(08) ශ්‍රී ජයවර්ධනපුර කෝට්ටේ පාර්ලිමේන්තු සංකීර්ණයේදී පැවති කැබිනට් තීරණ දැනුම් දීමේ මාධ්‍ය හමුවට එක් වෙමිනි.
එහිදී අමාත්‍යවරයා පෞද්ගලික වෛද්‍ය විද්‍යාල පිළිබඳ අදහස් දක්වමින් සඳහන් කළේ පෞද්ගලික වෛද්‍ය විද්‍යාල ආරම්භ කිරීමට විදෙස් උසස් අධ්‍යාපන ආයතන කැමැත්ත පළ කළද රෝහල් ඉදි කිරීමට කැමැත්තක් පළ කර නොමැති බවයි.
රෝහලක් ඉදිකිරීමට විශාල මුදලක් වැය වීම ඊට හේතුව බවත් පැවසූ අමාත්‍යවරයා නමුත් වෛද්‍ය නෙවිල් ප්‍රනාන්දු මහතා විශාල මුදලක් වැය කර සයිටම් ආයතනය සඳහා මාලබේ රෝහලක් ඉදිකළ බවත් එම රෝහල රජයට පැවරීමටද නෙවිල් ප්‍රනාන්දු මහතා කැමැත්ත පළ කළ බවත්ය.
රජයේ වෛද්‍ය විද්‍යාල 2ක්
මේ අතර අද (08) පැවති විශේෂ මාධ්‍ය හමුවකට සහභාගී වෙමින් අධ්‍යාපන අමාත්‍ය අකිල විරාජ් කාරියවසම් මහතා සඳහන් කළේ වසර 2 ක් ඇතුළත වෛද්‍ය විද්‍යාල 2ක් කුලියාපිටියේ හා සබරගමු පළාතේ ස්ථාපිත කිරීමට රජය සියලු කටයුතු සුදානම් කරමින් පවතින බවයි.
කුලියාපිටියේ සෑදීමට යෝජිත වෛද්‍ය විද්‍යාලය සදහා මුලික වශයෙන් සිසුන් 200ක් පමණ බඳවා ගැනීමට නියමිත අතර මේ සඳහා රජය විසින් බිලියන 3ක මුදලක් වෙන් කර ඇත.
මෙහිදී සයිටම් ආයතනය සම්බන්ධයෙන් අදහස් දක්වමින් අමාත්‍යවරයා කියා සිටියේ තමන් සයිටම් ආයතනයට විරුද්ධව පාර්ලිමේන්තුවේ කල්තැබීමේ විවාදයක් පවා ගෙන එන ලද අයෙක් වශයෙන් කටයුතු කළ නමුත් එහි ගැටළුව වී තිබුණේ ප‍්‍රමිතිය පිළිබඳ ප‍්‍රශ්නයක් බවයි.
කෙසේ වෙතත් සයිටම් හෝ වෙනත් පෞද්ගලික විශ්වවිද්‍යාලයක් හෝ වේවා මෙරට පෞද්ගලික අධ්‍යාපනයට ද යම් ඉඩක් ලබා දිය යුතු බව ද අමාත්‍යවරයා මෙහිදී වැඩිදුරටත් කියා සිටියේ ය.
COMMENTS