උසස් පෙළ විභාග ප්‍රතිඵල ප්‍රමාදවීමට හේතුව හෙළිවෙයි

තාක්ෂණවේදය විෂය ධාරාව යටතේ සිසුන් තිස් දහසක් පමණ මෙවර ප්‍රායෝගික පරීක්ෂණ සඳහා සහභාගී වීම පසුගිය අගෝස්තු මාසයේ පැවති උසස් පෙළ විභාගයේ ප්‍රත...

තාක්ෂණවේදය විෂය ධාරාව යටතේ සිසුන් තිස් දහසක් පමණ මෙවර ප්‍රායෝගික පරීක්ෂණ සඳහා සහභාගී වීම පසුගිය අගෝස්තු මාසයේ පැවති උසස් පෙළ විභාගයේ ප්‍රතිඵල මේවන තෙක් නිකුත් කිරීම ප්‍රමාද වීමට හේතුව ඇති බව විභාග දෙපාර්තමේන්තුව පවසයි.

කෙසේ වෙතත් විභාග ප්‍රතිඵල එළැඹෙන ජනවාරි මස 12 වනදා ට පෙර නිකුත් කරන බව විභාග කොමසාරිස් ජනරාල් ඩබ්ලිව්. එම්. එන්. ජේ. පුෂ්පකුමාර මහතා පැවසී ය.

තාක්ෂණවේදය විෂය ධාරාව සඳහා පෙනී සිටි සිසුන්ගේ ප්‍රායෝගික පරීක්ෂණයේ ප්‍රතිඵල 25% ක් පිළිතුරු පත්‍රයට එක් කෙරේ.

නිපුණතා සහිත දක්ෂ ව්‍යවසායකයින් රටට දායාද කිරීම අරමුණු කර ගනිමින් 2013 වසරේ සිට තාක්ෂණවේදය විෂය ධාරාව උසස් පෙළට ඇතුළත් කෙරිණි.

තාක්ෂණවේදය විෂය ධාරාව යටතේ උසස් පෙළට පෙනී සිටින සිසුන් 2250 දෙනෙකුට විශ්වවිද්‍යාල 13ක පාඨමාලා 28 ක් සඳහා ප්‍රවේශවීමේ අවස්ථාව උදා වන අතර එමගින් B.Sc. (Technology) උපාධිය පිරිනැමේ.

මීට අමතරව සිසුන්ට දිවයිනේ ආරම්භ වන විශ්වවිද්‍යාල විද්‍යායතන 25 ට ප්‍රවේශවීමේ හැකියාව සහ G.N.N.Q.III පියවරේ සහතිකය හිමිකර ගැනීමට ද හැකි වේ. උසස් පෙළ සඳහා තාක්ෂණ විෂය ධාරාව හදාරන සිසුන්ට රත්මලාන වෘත්තීය තාක්ෂණ විශ්වවිද්‍යාලයෙන් B - Tech උපාධිය ලබා ගැනීමට ද හැකියාව පවතී.

ඉදිකිරීම්, යාන්ත්‍රික ඉංජිනේරු, විදුලි, ඉලෙක්ට්‍රොනික ඉංජිනේරු, සංචාරක මෙන් ම ආහාර තාක්ෂණය තුළ දේශීය මෙන් ම විදේශීයව ද විශාල රැකියා වෙළෙඳපොළක් පවතින අතර තාක්ෂණික විෂය ධාරාව යටතේ පාසල් අධ්‍යාපනය නිම කරන දරුවන්ට එම ක්ෂේත්‍ර සඳහා පිවිසීමේ වඩාත් පහසු වේ.

පසුගිය අගෝස්තු මාසයේ පැවති උසස් පෙළ විභාග සඳහා අපේක්ෂකයෝ 315,000ක් පමණ පෙනී සිටි අතර ඉන් 240,991ක් පාසල් අයදුම්කරුවෝ වූහ. මධ්‍යස්ථාන 2204කදී පැවති විභාගය සඳහා පෙනී සිටින පෞද්ගලික අයදුම්කරුවන් සංඛ්‍යාව 74,614කි.