කො විඩ් 19 වසංගතය මේ වන විට සෞඛ්‍ය සේවාවට අවශ්‍ය ආකාරයට හසුරුවීමට හෝ පාලනය කරගැනීමට හැකියාවක් නැති අතර වෛරසය හැසිරෙන ආකරයට වෛරසය පිටුපසින්...
කොවිඩ් 19 වසංගතය මේ වන විට සෞඛ්‍ය සේවාවට අවශ්‍ය ආකාරයට හසුරුවීමට හෝ පාලනය කරගැනීමට හැකියාවක් නැති අතර වෛරසය හැසිරෙන ආකරයට වෛරසය පිටුපසින් යන ආකරයක් තවදුරටත් පෙනෙන්නට ඇති බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා අවධාරණය කළේය.
''ලංකාවේ බොහෝ ප්‍රදේශ ගත්තහම අපිට ඕන විදිහට කොවිඩ් වෛරසය හැසිරෙන්න නැහැ. ඒ වගේම පාලනය කරගන්න බැහැ කියන එක පැහැදිලිව පේනවා. ඒකෙන් අනික් පැත්තට අපි කියන්නේ නැහැ සෞඛ්‍ය බලධාරීන් හෝ සෞඛ්‍ය සේවකයන් රාජකාරි කරන්නේ නැහැ කියල. නමුත් තවදුරටත් කොවිඩ් 19 වසංගතය සෞඛ්‍ය සේවාවට ඕන විදිහට හසුරුවන්නවත් පාලනය කරගන්නවත් හැකියාව නැහැ කියන එක තමයි අපට පෙනෙන්නේ. සෞඛ්‍ය සේවකයින්ට අවශ්‍ය පරිදි කොවිඩ් වෛරසය හසුරුවා ගන්න බැහැ. වෛරසය හැසිරෙන ආකරයට අපි වෛරසය පිටුපසින් යන ආකරයක් තමයි තවදුරටත් අපට පෙනෙන්නේ.'' යනුවෙනුයි ඔහු සඳහන් කළේ.
රට තුළ ඇති වූ කොවිඩ් දෙවන රැල්ල මේ වන විට කොළඹ මහ නගර සභා බල ප්‍රදේශය පසුකරමින් අනෙකුත් ප්‍රදේශ ආසාදනය කරමින් වාර්තා වෙන අතර
කොළඹ මහ නගර සභා බල ප්‍රදේශය තුළ මේ වන විටත් පාලනය වුණු බවක් පෙනෙන්නට නොමැති බව උපුල් රෝහණ මහතා කියාසිටියේය.
''කොළඹ උතුරු ප්‍රදේශයෙන් ඇරඹුණු ව්‍යාප්තිය කොළඹ දකුණු ප්‍රදේශය කරා ගමන් කරමින්,ආඩු අදායම්ලාභීන්, පැල්පත්වාසීන් හා මහල් නිවාසවල ආසාදනය පැතිරෙමින් තිබෙනවා. ඒවගේම දිවයිනේ අනෙකුත් ප්‍රදේශවල විශාල අනු පොකුරු සංඛ්‍යාවක් වාර්තා වෙමින් තිබෙනවා. ඒ නිසා අපි විශ්වාස කරනවා ලංකාවේ කොවිඩ් සම්බන්ධ විශේෂඥයින් මේ වෙද්දී රටේ තිබෙන සැබෑ තත්ත්වය මහජනතාවට කියන්න ඕනේ. තවදුරටත් කොවිඩ් සමාජගත වෙලා නැහැ කියල ඔවුන් කරන ප්‍රකාශය කොතරම් වලංගුද යන්න නැවත වරක් විශේෂඥවරුන්ට කල්පනා කරලා බලන්න කියල අපි ප්‍රකාශ කරන්න කැමතියි''
එමෙන්ම කොවිඩ් කාර්ය සාධක බලකාය ඇතැම් හොද තීරණ ගන්නා නමුත් පෙනෙන්නට ඇත්තේ බිම් මට්ටමේ පවතින අත්දැකීම් සහ බිම් මට්ටමේ පවතින ගැටලුවලට අවශ්‍ය විසඳුම් නොගන්නා බවද හෙතෙම සඳහන් කරන ලදී.
''සෞඛ්‍ය අමාත්‍යාංශය නිරෝධායනය සඳහා චක්‍ර ලේඛ විශාල සංඛ්‍යාවක් නිකුත් කරලා තිබෙනවා. ඉතාම ව්‍යාකූල තත්ත්වයක බිමේ නිරෝධායන කටයුතු පත්වෙලා තිබෙනවා මේ චක්‍ර ලේඛවල තිබෙන ව්‍යාකූලභාවය නිසා. බිමේ අත්දැකීම් නැතුව යම් යම් චක්‍ර ලේඛ නිකුත් කිරීම නිසාත් බරපතල ගැටලුවලට බිම් මට්ටමේ මුහුණ පලා තිබෙනවා.'' යනුවෙන් තවදුරටත් උපුල් රෝහණ මහතා කියාසිටියේය.
මේ හරහා යම් නීතිමය ක්‍රියාමාර්ග ගැනීමේ අවදානමට මහජන සෞඛ්‍ය පරීක්ෂවරු පත්ව සිටින බවයි ඔහු ප්‍රකාශ කළේ.
ඉදිරි උත්සව සමය තුළ රට ලොක් ඩවුන් කළ යුතුය යන මතයේ නැතත් රජය සහ මහජනතාව වගකීමෙන් යුතුව ක්‍රියා කළ යුතු බවද හෙතෙම අවධාරණය කළේය.
වගකීමෙන් යුතුව රජය සහ මහජනතාව හැසිරුණේ නැත්නම් මේ නත්තල අවසන් වන්නේ කොවිඩ් 19 විශාල ලෙස ව්‍යාප්ත වී ඉතා අවාසනාවන්ත තත්ත්වයකට මුහුණ දී බව බවද ඔහු කියාසිටින ලදි .
COMMENTS