උතුරු පළාතේ සෑම රජයේ රැකියාවක්ම ලබා දෙන්නේ අදාල වෘත්තියට ගැලපෙන පරිදි තරග විභාගයක් පවත්වා ඉන් වැඩිම ලකුණු ලබා ගන්නා පිරිස යළි සම්මුඛ පරීක්...
උතුරු පළාතේ සෑම රජයේ රැකියාවක්ම ලබා දෙන්නේ අදාල වෘත්තියට ගැලපෙන පරිදි තරග විභාගයක් පවත්වා ඉන් වැඩිම ලකුණු ලබා ගන්නා පිරිස යළි සම්මුඛ පරීක්ෂණයකට කැදවීමෙන් පසුව බව උතුරු පළාත් ආණ්ඩුකාර රෙජිනෝල්ඩ් කුරේ මහතා පැවසීය.
ආණ්ඩුකාරවරයා එසේ පැවසුවේ යාපනය පුස්තකාල ශ්‍රවණාගාරයේදී උතුරු පළාත් රාජ්‍ය ආයතන වල පුරප්පාඩුව පවතින, සංවර්ධන නිලධාරී, සමාජ සේවා නිලධාරී සහ රියදුරු යන තනතුරු සඳහා නව පත්වීම් ලැබූ 150කට ආසන්න පිරිසක් සඳහා ඔවුන්ගේ පත්වීම් ලිපි ප්‍රදානය කිරීමේ උත්සවයේදීය.
අවාසනාවන්ත යුද්ධයෙන් පීඩා විඳි උතුරේ ජනතාව අද තමන්ගේ විරැකියාව නැති කර ගන්න පළාත් අමාත්‍යාංශ වල තිබෙන පුරප්පාඩු සඳහා පත්වීම් ලබන බවත් එම පත්වීම් ලබා දෙන්නේ සියලූම වෘත්තීන් වලට අදාලව තරඟ විභාග පැවැත්වීමෙන් අනතුරුව සම්මුඛ පරීක්‍ෂණ පවත්වා, ප‍්‍රායෝගික පරීක්‍ෂණද පැවැත්වීමෙන් අනතුරුව යැයි උතුරු පළාත් ආණ්ඩුකාර රෙජිනෝල්ඞ් කුරේ මහතා මෙහිදී පැවසීය.
එහිදී ඒ මහතා මෙසේ අදහස් දැක්විය.
“ඔබ හැම දෙනා අද ඉමහත් සතුටට පත් වෙනවා මෙම පත්වීම් ලැබීම නිසා. ඔබේ ජීවිතය ඉදිරියට ගෙන යන්න මෙම වෘත්තිය ඉමහත් පිටුවහලක්, අත්වැලක් වෙනවා. හොඳට ඉගෙන ගෙන තර`ග විභාග වලින් සමත් වූ නිසා ඔබ අද පත්වීම් ලබා ගන්නවා. ඔබ ලබා ගත්තා වූ පත්වීමට අනුව ඔබ සේවයට යන රාජ්‍ය ආයතන වල යහපත් රාජ්‍ය සේවයක් පවත්වා ගෙන යෑම ඔබගේ මූලික අරමුණ විය යුතුයි. ඔබ සමාජීය වශයෙන් රටට ජනතාවට සේවය කරන ජනතා සේවකයෙක් විය යුතුයි. පවත්වන ලද තරඟ විභාග වලින් ඉහලම ලකුණු ලබා ගත් පිරිසට තමයි අද මෙම පත්වීම් ලබා දුන්නේ. රටේ ජනතාවගේ බදු මුදල් වලින් වැටුප් ලබන ඔබ සේවය කිරීමේදී වංචාව, දුෂණය පිටු දැක සේවය කළ යුතුයි.”
“උතුරට සාමය, සමාදානය පැමිණ තිබෙනවා. ඒ සාමය සමාදානය නිසා තමයි තරඟ විභාග පවත්වලා සුදුසු අය මෙම තනතුරුවලට තෝරා පත්කර ගැනීමට හැකිවී තිබෙන්නේ. ඔබ වගේම මෙම පත්වීම් ලැබීමට ඉමහත් බලාපොරොත්තු තියාගෙන ඉන්න තවත් පිරිසක් උතුරේ සිටිනවා. ඒ අයටත් ඇතිවන පුරප්පාඩු අනුව, ලබා ගත් ඉහලම ලකුණු පිළිවෙලට අනුව පත්වීම් ලබා දීමට තීරණය කර තිබෙනවා. ඔබ කාර්යාල වල සේවය කරන විට යහපත් මනසකින්, පිරුණු හදවතකින් ජනතාවට සේවය කළ යුතු බවට මා යෝජනා කරනවා. ඔබ ළඟට එන කිසිවෙකුට සැර පරුෂ ලෙසෂ කථා කිරිමෙන් වලකින ලෙසද මා ඉල්ලා සිටිනවා. උතුරේ ජනතාව දීර්ඝ කාලයක් යුද්ධය නිසා පීඩා විඳි පිරිසක්. ඒ අයට නැවත ඔබේ සේවයෙනුත් පීඩා විඳින්න ඉඩ තබන්න එපා. නිමාවුණු යුද්ධයෙන් කවුරුවත් දිනුවේ නැහැ. විනාශ වුණේ මේ රටේ දේපල, ඔබේ දේපල සහ විශාල මිනිස් ජීවිත ගණනක් පමණයි. ඒ නිසා නැවත උතුරේ ජනතාවට කාගෙන්වත් පීඩා විඳීමට ඉඩ නොතැබිය යුතුයි. මෙය මා ඔබ හැම දෙනාටම සිහිපත් කරමින් අවධාරණයෙන් යුතුව කියා සිටිනවා. යුද්ධයෙන් කඩා වැටුණු ඔබේ ප‍්‍රදේශය, ඔබේ ගම, දියුණු කරන්න, සංවර්ධනය කරන්න හොඳ සේවයක් මෙම රාජ්‍ය ආයතන වල ඉඳලා ඔබට අද ලැබූණු මෙම තනතුරු වලින් කළ හැකියි.”යැයිද ඒ මහතා වැඩිදුරටත් පැවසීය.
(දිනසේන රතුගමගේ)
COMMENTS