“ජනබලය කොළඹට“ විරෝධතාවයට සහභාගී වීම සඳහා දිවයිනේ පළාත් රැසකින් මේවන විට බස් රථ විශාල ප‍්‍රමාණයක් කොළඹ බලා පිටත් වී ඇතැයි වාර්තා වේ. ඊට අම...
“ජනබලය කොළඹට“ විරෝධතාවයට සහභාගී වීම සඳහා දිවයිනේ පළාත් රැසකින් මේවන විට බස් රථ විශාල ප‍්‍රමාණයක් කොළඹ බලා පිටත් වී ඇතැයි වාර්තා වේ.
ඊට අමතරව ජනතාව සිය පුද්ගලික වාහන වලින් ද එම ප්‍රදේශවල සිට පැමිණෙමින් සිටින බවත් එම ජනතාව කොළඹට පැමිණි පසු අවශ්‍ය ස්ථානය කරා යොමු කරනු ඇතැයි ද වාර්තා වේ.
මහනුවරින් ජන රැළියට බස් රථ 186ක් පිටත් වූ බවත් එම බස් රථ කුරුණෑගල මාර්ගය හරහා කොළඹට ළඟා වීමට නියමිත බවත් මධ්‍යම පළාත් සභා මන්ත්‍රී ගුණතිලක රාජපක්ෂ මහතා සඳහන් කළේය.
මාතලේ දිස්ත්‍රිකයෙන් බස් රථ 35ක් පමණ පිටත් වූ බව ද උතුරු ප්‍රදේශයෙන් රැළිය සඳහා සහභාගී වීමට බස් රථ 18ක් කොළඹ බලා පිටත්වී ඇත.
මේ අතර ජනබලය කොළඹට විරෝධතා රැළියට සහභාගි වීම සඳහා මධ්‍යම පළාතේ සිට පැමිණෙන ජනතාව අද පෙරවරුවේ අපහසුතාවන්ට මුහුණ දී ඇති බව වාර්තා විය.
ඒ නිට්ටඹුව නගරාසන්නයේ ප්‍රධාන මාර්ගය මධ්‍යයේ විශාල ප්‍රමාණයේ වලක් කපා තිබීම හේතුවෙනි. එය පෙළපාලියට පැමිණෙන ජනතාව වැළැක්වීම සඳහා යෙදවූ උපක්‍රමයක් බවට ඒකාබද්ධ විපක්ෂය චෝදනා කළේය.
කෙසේ වෙතත් පුපුරා ගිය ජලනලයක් පිළිසකර කිරීම සඳහා මෙම වළ හාරා ඇති අතර, එය තවත් පැය කිහිපයකින් යථා තත්ත්වයට පත් කිරීමට නියමිත බවත් පොලීසිය පැවසී ය.
එමෙන්ම, ජන බලය කොළඹට විරෝධතා ව්‍යාපාරයට සහභාගිවීම සඳහා සූදානම් කර තිබූ බස් රථයකට අද(05) උදෑසන 5.45ට පමණ හාලිඇල - බෝගහමඩිත්ත ප්‍රදේශයේදී ප්‍රහාරයක් ඒලලවී තිබේ.
හිටපු අමාත්‍ය, පාර්ලිමේන්තු මන්ත්‍රී ඩිලාන් පෙරේරා මහතාගේ ආධාරකරුවන් පිරිසක් විසින් මෙම බස් රථයට පිරිස් එක්රැස් කරමින් සිට ඇති අතර, එම අවස්ථාවේදී අංක තහඩු නොමැති කැබ් රථයකින් පැමිණි පිරිසක් මෙම පහරදීම සිදුකළ බව එහි සංවිධානය කටයුතුවල නිරත වූ කාන්තාවක් ප්‍රකාශ කළේය.
අද පැවැත්වෙන ජන රැළියට කඩවත නගරයේ සැරසිලි කරමින් සිටි පොදුජන පෙරමුණේ ආධාරකරුවන් පිරිසකට පෙරේදා රාත්‍රී කිසියම් පිරිසක් පහරදී තිබේ.
එක්සත් ජාතික පක්ෂයේ පිරිසක් ඔවුන්ට මෙලෙස පහරදී ඇති බවත් පහරකෑමෙන් එක් පුද්ගලයෙකු තුවාල ලබා රෝහල් ගත කර ඇති බවත් පොලීසිය සඳහන් කළේය.
සිද්ධිය සම්බන්ධයෙන් පොලීසිය මේවන විට පරීක්ෂණයක් ආරම්භ කර ඇත.
දකුණු පළාතේ සිට ජනතාව රැගෙන පැමිණෙන බස් රථ දක්ෂිණ අධිවේගී මාර්ගයට අද පෙරවරු 10.00ට පමණ ගොඩගම පිවිසුමෙන් ප්‍රවේශ වී ඇති බව වාර්තා වේ.
මේ අතර ජනබලය විරෝධතාවට සමගාමීව පොලිස් විශේෂ කාර්ය බළකාය විසින් කොළඹ නගරයේ විශේෂ ආරක්ෂක වැඩපිළිවෙළක් ක්රියාත්මක කර තිබේ.
ජංගම මුර සංචාර, යතුරු පැදි සංචාර ආදිය පොලිස් විශේෂ කාර්ය බළකාය විසින් ක්රියාත්මක කරයි.
මෙම විරෝධතාවය හේතුවෙන් අලුත්කඩේ අධිකරණ සංකීර්ණය, ජනාධිපති ලේකම් කාර්යාලය සහ අරලියගහ මන්දිරය අවට දැඩි ආරක්ෂාවක් යොදවා ඇති බව පොලීසිය පැවසී ය.
මේ වන විට කොළඹ කිසිදු රථවාහන තදබදයක් හෝ නොසන්සුන්කාරී තත්ත්වයක් වාර්තා නොවන බව ද වාර්තා වේ.
COMMENTS