දෙමළ ජාතික සන්ධානය යළිත් වරක් සී.වී.විග්නේස්වරන් මහතාට උතුරු පළාත් සභාවේ ප්‍රධාන අමාත්‍යධුරයට තරග කිරීම සදහා අවස්ථාවක් සලසා දීමට තීරණය කළහ...
දෙමළ ජාතික සන්ධානය යළිත් වරක් සී.වී.විග්නේස්වරන් මහතාට උතුරු පළාත් සභාවේ ප්‍රධාන අමාත්‍යධුරයට තරග කිරීම සදහා අවස්ථාවක් සලසා දීමට තීරණය කළහොත් එය උතුරු පළාත් සභාවේත් දෙමළ ජාතික සන්ධානයේත් අවසානය බව හිටපු පළාත් සභා අමාත්‍ය පී.ඩැනීස්වරන් මහතා සදහන් කරයි.
අභියාචනාධිකරණය විසින් නිර්දේශ කොට තිබියදීත් තමාට උතුරු පළාත් සභාවේ අමාත්‍යධූරය යළි ලබාදීමට ප්‍රධාන අමාත්‍යවරයා කටයුතු නොකිරීම සම්බන්ධයෙන් නිවේදනයක් නිකුත් කරමින් ඩැනීස්වරන් මහතා මේ බව සදහන් කොට තිබේ.
දේශපාලන වශයෙන් තමන්ගෙන් පළිගැනීමට ඇති අවශ්‍යතාවය නිසා අධිකරණ නියෝග පවා නොතකා තමන්ව අමාත්‍යධුරයට පත් නොකරණ බව පවසන ඩැනීස්වරන් මහතා කියා සිටින්නේ උතුරු පළාත් සභාවේ නිලකාලය අවසන් වනතුරුම තමන්ට අමාත්‍යධූරය ලබා නොදීමට විග්නේස්වරන් මහතා සැලසුම් දියත් කරණ බවයි.
මේ තත්ත්වය දෙමළ ජාතික සන්ධානයේ නායකයින්ට ප්‍රකාශ කළද ඔවුන්ගෙන් පවා තමන්ට සාධාරණයක් ඉෂ්ඨ නොවූ බව ඩැනීස්වරන් මහතා නිකුත් කළ නිවේදනයේ සදහන් වෙයි.
විග්නේස්වරන් මහතා දෙමළ ජාතික සන්ධානයෙන්ම ඊළග වතාවටත් උතුරු පළාත් සභාවට තරග කොට ප්‍රධාන අමාත්‍යධුරය ලබා ගැනීමට විශාල උත්සාහයක නිරත වන බව පවසන ඩැනීස්වරන් මහතා එය එසේ වුවහොත් උතුරු පළාතේ මහජනතාවට දෙවියන්ගේ පිහිට මිස වෙනත් පිහිටක් නොලැබෙන බවද සදහන් කොට තිබේ.
දේශපාලනයේදී පමණක් නොව සෑම අවස්ථාවකදීම ප්‍රධාන අමාත්‍යවරයා ආත්මාර්ථකාමීත්වයෙන් යුතුව කටයූතු කිරීමත් නීතියට වඩා ඔහුගේ හිතැගියාවන්ට අනුව කටයුතු කිරීමත් නිසා මුළු උතුරු පළාත් සභාවම එකම අවුල් ජාලාවක් බවට පත් වූ බව ඩැනීස්වරන් මහතා සදහන් කරයි.
ඔහු සෑම අවස්ථාවකදීම ඔහුට වඩා කෙනෙකු නොමැති බව සිතා කටයුතු කළ බවත් ආණ්ඩුකාරවරයාට පවා ඔහු අවනත නොවී ක්‍රියා කිරීම නිසා මේ වන විට විශාල අර්බුදයක් උතුරු පළාත් සභාව තුළ නිර්මාණය කොට ඇතැයිද ඩැනීස්වරන් මහතාගේ නිවේදනයේ සදහන් වෙයි.
(දිනසේන රතුගමගේ)
COMMENTS