බස් ධාවනය සාමාන්‍ය පරිදි

පෞද්ගලික බස් රථ සේවකයන් වර්ජනයක් ක්‍රියාත්මක කර තිබුණද බොහෝ පෞද්ගලික බස් රථ වෙනදා මෙන් අද දිනයේදීත් ධාවනය වන තත්ත්වයක් දක්නට ලැබිණි. මෙම ...

පෞද්ගලික බස් රථ සේවකයන් වර්ජනයක් ක්‍රියාත්මක කර තිබුණද බොහෝ පෞද්ගලික බස් රථ වෙනදා මෙන් අද දිනයේදීත් ධාවනය වන තත්ත්වයක් දක්නට ලැබිණි.

මෙම වර්ජනය සඳහා පෞද්ගලික බස් රථ රියඳුරන් හා කොන්දොස්තරවරුන් එක්ව සිටියත් ඒ සඳහා බස් රථ හිමිකරුවන් එක්ව නොමැත.

ඊයේ මධ්‍යම රාත්‍රියේ සිට ඔවුන් වර්ජනය ආරම්භ කළේය. ඒ සඳහා තවත් සංගම් කිහිපයක්ද සහාය දක්වයි.

ඇතැම් පෞද්ගලික බස් රථ සංගම් ඉල්ලිම් ගණනාවක් මුල් කර ගනිමින් අද (16) ආරම්භ කරඇති වැඩ වර්ජනයට හැටන් සහ නුවරඑලිය පෞද්ගලික බස් රථ සංගම් කිසිදු සහයෝගයක් දක්වා නැති බව අප හැටන් වාර්තාකරු පැවසීය.

හැටන් බස් නැවතුම්පොලේ සිට සුපුරුදු පරිදි දුර සහ කෙටි දුර ධාවනය සදහා බස් රථ ධාවනයට එක් කර තිබුණි.

මහනුවර සිට හැටන් දක්වා ධාවනය වු පෞද්ගලික බස් රථවලට මහනුවර ප්‍රදේශයේදි කිසියම් පිරිසක් තර්ජනය කල බව එම බස් රථ රියදුරන් කියා සිටිති.

බස් සංගම් පවත්වන්නට යෙදුන වැඩවර්ජනය නිසි ක්‍රමවේදයකින් තොරව ක්‍රියාත්මක වීම නිසා බස්රථ විශාල ප්‍රමාණයක් 16 දින ධාවනය යෙදවූ බව දඹුල්ල නගරයට පැමිණි බස් රථ රියදුරන් සහ බස් රථ සේවකයන් පවසන බව අප වාර්තාකරුවන් පවසති.

දඹුල්ල නගර මධ්‍යයේ 16 දින උදෑසන මගීන්ට ගමන් කිරීම සඳහා අවශ්‍ය බස් රථ ධාවනය වන ආකාරය දැක ගැනීමට හැකි වූ අතර කෙටි දුර ගමන් සේවා සහ දුර ගමන් සේවා බස් රථ බොහොමයක් පෞද්ගලික බස් රථ සහ ලංගම බස්රථ ද සේවයේ නිරතව ඇති බව බස් සේවකයෝ පවසති .

බස් රථ සේවකයන්ගෙන් වැඩවර්ජනය පිළිබඳව විමසීමේදී කියා සිටියේ වැඩවර්ජනයක් පැවැත්වෙන බව මාධ්‍ය මගින් පමණක් දැනුම් දී තිබෙන බවය. නිසි ක්‍රමවේදයකින් තොරව වැඩ වර්ජන ක්‍රියාත්මක කිරීම නිසා එය අසාර්ථක බව බස්රථ සේවකයෝ පවසති.

දඩ කොල වලට ගෙවන මුදල් ප්‍රමාණය වැඩි කිරීම අසාධාරණ බවත් එහෙත් බස් රථ සංගම් දෙකට බෙදීම නිසා මෙම තත්වය උදා වී ඇති බවත් ඔවුහු පවසති. එමෙන්ම ඇතැම් බස් රථ රියදුරන් කියා සිටියේ වැඩ වර්ජනය කොට බස් රථය නවතා තිබියදී තමන්ගේ අඹුදරුවන්ට බඩගින්නේ සිටීමට සිදුවන නිසා සේවයේ නිරත වන බවය.

බස්රථ හිමිකරුවන් හා බස් රථ සංගම් කෙසේ කීවද බස් රථ ධාවනයෙන් ඉවත් වීමට හැකියාවක් නැති නිසා මෙන්ම නිසි ක්‍රමවේදයක් නොමැති නිසා දිවයිනේ පුරාම බස් රථ ධාවනයේ යෙදෙන බව සේවකයෝ වැඩිදුරටත් සඳහන් කර සිටිති.

දඹුල්ල නගරයේ සිටි මගීන්ගෙන් විමසීමේ දී කියා සිටියේ තම ගමනාන්තය දක්වා අවශ්‍ය බස් රථ දඹුල්ල නගරයේ පැවති බවය. වැඩවර්ජනයක් පැවැත්වෙන ආකාරයක් තමන්ට දැක ගැනීමට නැති බව මගීහු පවසති.