බත්තරමුල්ල, ඩෙන්සිල් කොබ්බෑකඩුව මාවතේ ඉදිකරන ලද බස්නාහිර පළාත් සභා නව ගොඩනැගිලි සංකීර්ණය ජනාධිපති මෛතී‍්‍රපාල සිරිසේන මහතාගේ ප‍්‍රධානත්වයෙ...
බත්තරමුල්ල, ඩෙන්සිල් කොබ්බෑකඩුව මාවතේ ඉදිකරන ලද බස්නාහිර පළාත් සභා නව ගොඩනැගිලි සංකීර්ණය ජනාධිපති මෛතී‍්‍රපාල සිරිසේන මහතාගේ ප්රධානත්වයෙන් ඊයේ (12) පෙරවරුවේ විවෘත කෙරිණි.
මහා සංඝරත්නයේ සෙත් පිරිත් සජ්ජායනා මධ්‍යයේ නව ගොඩනැගිල්ල විවෘත කළ ජනාධිපතිවරයා එහි 13 වන මහලේ පැවැති නව සභාවේ මුලසුන හොබවමින් එහි සමාරම්භය ද සනිටුහන් කළේය.
ජනාධිපතිවරයාගේ ප්රධානත්වයෙන් ඊයේ පැවැති එම උත්සවය අගමැති රනිල් වික්‍රමසිංහ මහතාට ආරාධනා නොකිරීමට විරෝධය පළකර එක්සත් ජාතික පක්‍ෂ පළාත් සභා මන්ත්‍රීවරු සියලු දෙනා වර්ජනය කළේය.
කෙසේ වෙතත් ඒකාබද්ධ විපක්‍ෂ මන්ත්‍රීවරු එම අවස්ථාවට පැමිණ සිටීම විශේෂත්වයක් වූ අතර ඔවුන් පැවසූවේ තම යුතුකමක් ලෙස සලකා මෙම උත්සවයට සහභාගි වූ බවයි.
ජාතික ආණ්ඩුවක් පවතින අවස්ථාවක මෙවැනි වැදගත් උත්සවයක් විවෘත කිරීමට ජනාධිපතිවරයාට ආරාධනා කරන අවස්ථාවේදී අගමැතිවරයාටද ආරාධනා කිරීම යුතුකමක් බව එජාප මන්ත්‍රීවරු පෙන්වා දෙයි.
ජාතික ආණ්ඩුව ආරක්‍ෂා කරගනිමින් එජාප මන්ත්‍රීවරු පළාත් සභාවේ අයවැය අවස්ථාවලදී, පරිපූරක ඇස්තමේන්තුවලදී සහාය දුන් බවත්, ප්‍රධාන අමාත්‍ය ඉසුර දේවප්‍රිය මහතා එම කාරණා නොසලකා හැර ජනාධිපතිවරයාට පමණක් ආරාධනා කර තිබීම අනුමත කළ නොහැකි බවත් බස්නාහිර පළාත් සභාවේ ප්‍රධාන සංවිධායක ජෝර්ජ් පෙරේරා මහතා පැවසීය.
මේ සම්බන්ධව වැඩිදුරටත් අදහස් දැක්වූ මන්ත්‍රීවරයා,
“ආරාධනා පත්‍රයට ආණ්ඩුකාරවරයාගේ නම ඇතුළත් කරලත් නැහැ. සාමාන්‍යයෙන් මෙවැනි උත්සවයකදී පළකරන දැන්වීම්වල ජනාධිපති හා අගමැති දෙදෙනාගේම ඡායාරූප ඇතුළත් කිරීම සිරිතක්. ඒත් මේ උත්සවය පිළිබඳ පළකළ පුවත්පත් දැන්වීම් කිසිවක අගමැතිවරයාගේ පින්තූර නැහැ. මේ තත්ත්වය සම්බන්ධයෙන් අපේ කණ්ඩායම් රැස්වීම් දෙකකදී සාකච්ඡා කරලා ඒකමතිකව තීරණය කළා උත්සවය වර්ජනය කරන්න. ඒ අනුව තමයි අපි අද උත්සවයට සම්බන්ධ නොවුණේ"
බස්නාහිර පළාත් සභාවේ ඒකාබද්ධ විපක්‍ෂය නියෝජනය කරන සියලු මන්ත්‍රීවරු මෙම උත්සවයට පැමිණ සිටීම සම්බන්ධව අදහස් දැක්වූ පළාත් සභා මන්ත්‍රී මෙරිල් පෙරේරා මහතා, තම කණ්ඩායම සිටිනුයේ මහින්ද රාජපක්‍ෂ මහතා සමග මිස මෛත්‍රීපාල සිරිසේන මහතා සමග නොවන බව පැවසී ය.
“අද විවෘත කෙරුණේ අපේ පළාත් සභා රැස්වීම් ශාලාව. එයට සම්බන්ධ වීම අපේ යුතුකමක්. මොකද ඒක අපේ සභාව නිසා. ඒ නිසා අපි ඒ අවස්ථාවට ඒකාබද්ධ විපක්‍ෂය නියෝජනය කරන මන්ත්‍රීවරු ලෙස සහභාගි වුණා" යනුවෙන් මනත්‍රීවරයා පැවසී ය.
COMMENTS