තමන්ව දණගස්වා අමානුෂික සැලකීම්වලට භාජනය කිරීම තුළින් ඌව පළාත් ප්‍රධාන අමාත්‍යවරයා සිය මූලික අයිතීන් කඩ කර ඇති බවට චෝදනා කරමින් බදුල්ල දෙම...
තමන්ව දණගස්වා අමානුෂික සැලකීම්වලට භාජනය කිරීම තුළින් ඌව පළාත් ප්‍රධාන අමාත්‍යවරයා සිය මූලික අයිතීන් කඩ කර ඇති බවට චෝදනා කරමින් බදුල්ල දෙමළ බාලිකා මහා විදුහලේ විදුහල්පතිනිය විසින් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ඉදිරිපත් කර තිබේ.
බදුල්ල දෙමළ බාලිකා මහා විදුහලේ විදුහල්පතිනි ආර්.භවානි මහත්මිය විසින් පෙත්සම ඉදිරිපත් කළ අතර එහි වගඋත්තරකරුවන් ලෙස ඌව පළාත් ප්‍රධාන අමාත්‍ය චාමර සම්පත් දසනායක මහතා සහ ඌව පළාත් අධ්‍යාපන ලේකම් ඇතුළු 8 දෙනෙකු ඇතුළත් කර ඇත.
පෙත්සම්කාර විදුහල්පතිනිය ශ්‍රේෂ්ඨාධිකරණය හමුවේ කියා සිටින්නේ සිය ආධාරකරුවකුගේ දරුවකු පාසලට ඇතුළත් කර නොගත් බවට චෝදනා කරමින් ඌව පළාත් ප්‍රධාන අමාත්‍යවරයා තමන්ව ගෙන්වා දොස් පවරා අමානුෂික සැලකීම්වලට භාජනය කළ බවයි.
ප්‍රධාන අමාත්‍යවරයාගෙන් එල්ල වූ තර්ජන සහ බලපෑම් හේතුවෙන් ඉන් මිදීමට තමාට ඔහු ඉදිරියේ දණ ගසා සමාව අයැදීමට සිදු වූ බවද ලෙස විදුහල්පතිනිය ශ්‍රේෂ්ඨාධිකරණය හමුවේ ප්‍රකාශ කර තිබේ.
මේ සම්බන්ධයෙන් ප්‍රධාන අමාත්‍යවරයාට එරෙහිව පරීක්ෂණ සිදු කරන බව සඳහන් කර සිටියත් ඉන් කිසිඳු පරීක්ෂණයකින් තමාට යුක්තිය ඉටුව නොමැති බව ඇය සඳහන් කර සිටියි.
ප්‍රධාන අමාත්‍යවරයාගේ ක්‍රියා කලාපය හේතුවෙන් සිය මූලික අයිතීන් කඩ වූ බවට තීන්දුවක් ලබා දෙන ලෙසත් ඒ වෙනුවෙන් සුදුසු වන්දියක් ප්‍රධාන අමාත්‍යවරයා ගෙන් අය කර දෙන ලෙස ඉල්ලමින් පෙත්සම්කාර විදුහල්පතිනිය ශ්‍රේෂ්ඨාධිකරණය වෙත අදාළ පෙත්සම ගොනු කර තිබේ.
COMMENTS