දකුණේ පැතිර යන ඉන්ෆ්ලුවෙන්සා රෝගී තත්ත්වය හේතුවෙන් දකුණු පළාතේ සියලුම පෙර පාසල් ලබන සඳුදා (28) දක්වා වසා තබන්නැයි නියෝග කළ බවත් රෝගය පැතිර...
දකුණේ පැතිර යන ඉන්ෆ්ලුවෙන්සා රෝගී තත්ත්වය හේතුවෙන් දකුණු පළාතේ සියලුම පෙර පාසල් ලබන සඳුදා (28) දක්වා වසා තබන්නැයි නියෝග කළ බවත් රෝගය පැතිර යන ප්‍රදේශවල පාසල්හි ප්‍රාථමික අංශ අද (22) සහ හෙට (23) දින දෙකෙහි වසා තැබීමට උපදෙස් දුන් බවත් දකුණු පළාත් අධ්‍යාපන අමාත්‍ය චන්දිමා රාසපුත්‍ර මහතා පවසයි.
අමාත්‍යවරයා පවසන්නේ ඉන්ෆ්ලුවෙන්සා රෝගය කුඩා ළමුන් අතර බහුලව පැතිරී යාමත් රෝහල්වල ළමා වාට්ටුවල අධික තදබදයක් ඇතිවීමත් හේතුවෙන් විශේෂඥ වෛද්‍ය උපදෙස් මත මෙම තීරණය ගත් බවයි. ඒ අනුව දකුණු පළාතේ මාතර, මුලටියන, අකුරැස්ස, තංගල්ල, වලස්මුල්ල හා ගාල්ල යන කලාපයන් හි සියලුම පාසල්වල එක වසර සිට පහ වසර දක්වා පන්ති හෙට සහ අනිද්දා වසා තැබෙනු ඇත.
ඉන්ෆ්ලුවැන්සා රෝගය හේතුවෙන් දකුණු පළාතේ දරුවන් කිහිපදෙනකු මියයෑම නිසා මෙම තීරණය ගත් බවද පළාත් අමාත්‍යවරයා පවසයි. අමාත්‍යවරයා වැඩිදුරටත් මෙසේ ද කීවේය.
" ඉන්ෆ්ලුවෙන්සා රෝගී තත්ත්වය දකුණු පළාතේ කුඩා දරුවන් අතර වේගයෙන් පැතිරී යන නිසා අපි මේ තීරණය ගත්තා. වෛද්‍යවරුන් පවසන්නේ උණ, හෙම්බිරිස්සාව, කැස්ස, කිවිසුම් යාම වැනි රෝග ලක්ෂණ තිබෙනවා නම් ඒ දරුවන් පාසල් යවන්න එපා කියලයි. ඒ දරුවන් පාසල් පැමිණීමෙන් අන් අයටත් රෝගය පැතිරී යා හැකියි.ඒ වගේම දරුවන් සෙනඟ ගැවසෙන ස්ථාන වලින් ඈත්කර තැබීමත් වැදගත්. බදාදා (23) දිනයේ දී අධ්‍යාපන නිලධාරීන් සහ වෛද්‍යවරුන් එක්ව කරන සාකච්ඡාවකින් පසුව වසා තැබුණු පාසල් විවෘත කරන දිනය තීරණය කරනවා."
දකුණු පළාතේ පැතීරි යන වෛරස් උණ රෝගය පිළිබඳව තවදුරටත් සොයා බැලීම සඳහා වසංගත රෝග විද්‍යා අංශයේ විශේෂඥ වෛද්‍ය කණ්ඩායම් දකුණු පළාතට යොමු කරන ලෙස සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතාට උපදෙස් ලබා දී ඇත.
ඒ අනුව වසංගත රෝග විද්‍යා අංශයේ අධ්‍යක්ෂ අනිල් දිසානායක මහතාගේ ප්‍රධානත්වයෙන් යුත් විශේෂ වෛද්‍ය කණ්ඩායමක් පසුගිය දින වලද එම ප්‍රදේශවල සංචාරය කරමින් මෙම රෝගී තත්ත්වය පිළිබඳව පරීක්ෂණ පවත්වන ලදී.
ඊයේ (21) තවත් විශේෂඥ වෛද්‍ය කණ්ඩායමක් දකුණු පළාතේ පැතිර යන වෛරස් උණ රෝගය සහ රෝගීන් නිරීක්ෂණය කිරීම සඳහා එම ප්‍රදේශයේ සංචාරයක නිරතව සිටිති.
වෛරස් උණ රෝගය ව්‍යාප්තිය පාලනය කිරීම සඳහා ගත හැකි ක්‍රියාමාර්ග පිළිබඳව සෞඛ්‍ය සේවා අධ්‍යක්ෂ ජනරාල්වරයාගේ ප්‍රධානත්වනේ සෞඛ්‍ය අමාත්‍යාංශයේ දී විශේෂ සාකච්ඡාවක් පැවැත්විණි.
එහිදී දකුණු පළාතේ රෝහල්වලට අවශ්‍ය ඖෂධ වර්ග සහ උපකරණ කඩිනමින් යොමු කිරීමටත්, තීරණය විය.
වෛරස් උණ රෝගය වැළඳුණු රෝගීන් 600 දෙනෙකු පමණ පළාත් රෝහල්වල ප්‍රතිකාර ලබන බව දකුණු පළාත් සෞඛ්‍ය සේවා අධ්‍යක්ෂ ජී.විජේසූරිය මහතා පවසයි.
ඔහු සඳහන් කළේ, ඇල්පිටිය, බලපිටිය, කඹුරුපිටිය, තංගල්ල සහ වලස්මුල්ල යන මූලික රොහල් ආශ්‍රිතව රොගින් බහුලව වාර්තා වන බව ය.
මේ අතර කරාපිටිය රොහලේ වෛරස් උණ වැළඳුණු රොගින් 37 දෙනෙකු ප්‍රතිකාර ලබන බව අධ්‍යක්ෂ වෛද්‍ය ජයම්පති සේනානායක මහතා සඳහන් කළේය.
උණ රෝගයට ගොඳුරු වූ දරුවන්ට ප්‍රතිකාර කිරීම සඳහා අවශ්‍ය, හයිෆ්ලො ඔක්සිජන් යන්ත්‍ර 10ක් ගාල්ල කරාපිටිය ශික්ෂණ රොහලේ ස්ථාපිත කිරිමට සෞඛ්‍ය අමාත්‍යාංශය තීරණය කර තිබේ.
සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා සඳහන් කළේ, ඒ සඳහා අවශ්‍ය ප්‍රතිපාදන වෙන් කර ඇති බව ය.
COMMENTS