ඇමෙරිකානු ඩොලර් 330000 රජයේ මුදල් සාවද්‍ය ලෙස පරිහරණය කළ බවට සැක කෙරෙන ඇමෙරිකාවේ හිටපු ශ්‍රී ලංකා තානාපති ජාලිය වික්‍රමසූරිය මහතා අත්අඩංගු...
ඇමෙරිකානු ඩොලර් 330000 රජයේ මුදල් සාවද්‍ය ලෙස පරිහරණය කළ බවට සැක කෙරෙන ඇමෙරිකාවේ හිටපු ශ්‍රී ලංකා තානාපති ජාලිය වික්‍රමසූරිය මහතා අත්අඩංගුවට ගන්නා ලෙස දන්වා කොළඹ කොටුව මහේස්ත්‍රාත් අධිකරණය අද යළි විවෘත වරෙන්තු නිකුත් කළේය.
පොලිස් මූල්‍ය අපරාධ විමර්ශන කොට්ඨාසය විසින් කළ ඉල්ලීමක් සලකා බැලීමෙන් පසුව කොළඹ කොටුව මහේස්ත්‍රාත් ලංකා ජයරත්න මෙනවිය මෙසේ විවෘත වරෙන්තු නිකුත් කළේය.
ඊට අමතරව ජාලිය වික්‍රමසූරිය මහතාගේ ඇපකරුවන් ලෙස ඉදිරිපත්ව සිටින දැනට අධිකරණය මඟහැර සිටින ඔහුගේ බිරිඳ සහ ඥාති සොයුරිය අත්අඩංගුවට ගැනීම සඳහා ද මහේස්ත්‍රාත්වරිය විසින් වරෙන්තු නිකුත් කරනු ලැබීය.
පොලිස් මූල්‍ය අපරාධ විමර්ශන කොට්ඨාසය අධිකරණයට දන්වා සිටියේ සැකකාර ජාලිය වික්‍රමසූරිය මහතා මෙරටට ගෙන්වා ගැනීම සඳහා පරීක්ෂණ පවත්වන බවයි.
ඉදිරිපත් වූ කරුණු සලකා බැලූ මහේස්ත්‍රාත්වරිය පැමිණිල්ල නැවත මැයි මස 14 වනදා කැඳවීමට නියම කළ අතර එදිනට පරීක්ෂණවල ප්‍රගතිය දැක්වෙන වාර්තාවක් ඉදිරිපත් කරන මෙන් ද පොලිස් මූල්‍ය අපරාධ විමර්ශන කොට්ඨාශය නියම කළේය.
ඇමෙරිකාවේ ශ්‍රී ලංකා තානාපති කාර්යාලය සඳහා ගොඩනැගිල්ලක් මිලදී ගැනීමේදී රජයට අයත් ඇමෙරිකානු ඩොලර් 330000 ක මුදලක් සාවද්‍ය ආකාරයට පරිහරණය කළේ යැයි කියන සිද්ධියක් සම්බන්ධයෙන් ඇමෙරිකාවේ හිටපු ශ්‍රී ලංකා තානාපති ජාලිය වික්‍රමසූරිය මහතාට එරෙහිව පොලිස් මූල්‍ය අපරාධ විමර්ශන කොට්ඨාසය මඟින් මෙම පරීක්ෂණය ආරම්භ කර තිබේ.
COMMENTS