පොලිස් කොමිසමත් අර්බුදයක? නව ලේකම් පත් කිරීම ගැන මත ගැටුමක්

ජාතික පොලිස් කොමිසමට නව ලේකම්වරයෙකු පත් කිරීම සම්බන්ධයෙන් හෙට(22) දිනයේදී තීරණයක් ගැනීමට නියමිත බව වාර්තා වේ. ආරියදාස කුරේ මහතාගේ අස්කිරී...

ජාතික පොලිස් කොමිසමට නව ලේකම්වරයෙකු පත් කිරීම සම්බන්ධයෙන් හෙට(22) දිනයේදී තීරණයක් ගැනීමට නියමිත බව වාර්තා වේ.

ආරියදාස කුරේ මහතාගේ අස්කිරීමෙන් පුරප්පාඩු වූ ජාතික පොලිස් කොමිසමේ ලේකම් ධූරයට වැඩ බලන ලේකම්වරයකු පත්කිරීමට හෙට (22) රැස්වන 130 වැනි පොලිස් කොමිසම් සභා වාරයේදී නියමිත යැයි අභ්‍යන්තර ආරංචි මාර්ග සඳහන් කරයි.
මෙහිදී නව ලේකම්වරයෙකු පත් කිරීම සම්බන්ධයෙන් තීරණයක් ගනු ඇති බව එම ආරංචි මාර්ග පවසයි.

පරිපාලන ශ්‍රේණියේ ජ්‍යෙෂ්ඨ නිලධාරින් නොසළකා හැර කොමිසමේ සිටින කණිෂ්ඨ නිලධාරියකු ඊට පත්කිරීමේ සූදානමක් නිසා කොමිසම අභ්‍යන්තරයෙහි අර්බුදකාරී තත්ත්වයක් මතුව ඇතැයි වාර්තා වේ.

තවද ඇවන්ගාඩ් සිදුවීමේ පාර්ශ්වකරුවකු වීම සම්බන්ධයෙන් ද දේශපාලන ඥාතීත්වයක් සම්බන්ධයෙන් ද ඔහු ගැන විවාදාත්මක අදහස් කොමිසම අභ්‍යන්තරයෙහි පළ වෙමින් පවතින බව ද වාර්තා වේ.

ජාතික පොලිස් කොමිසමේ සභාපති පී.එච්.මනතුංග මහතාගෙන් මේ ගැන කළ විමසීමේදී මෙතෙක් කිසිදු පුද්ගලයෙකු පුරප්පාඩු වූ ධූරයට පත්කර නැතැයි ඔහු පැවැසීය.

ජාතික පොලිස් කොමිසමේ ලේකම්වරයා ලෙස කටයුතු කල ආරියදාස කුරේ මහතා ඊයේ දිනයේ එම ධුරයෙන් ඉවත් කෙරුණු අතර ඒ ඔහුගේ වයස් සීමාව ඉක්මවා ඇති බවට ජාතික පොලිස් කොමිසම සිදුකළ දැනුම් දීමකට අනුවය.