උතුරේ ලංගම සේවකයින් විසින් ආරම්භ කොට ඇති වර්ජනය හේතුවෙන් උතුරු පළාතේ ලංගම ඩිපෝ හතකට අයත් බස් රථ ධාවනය කරවීම ජනවාරි මස 2 දා නතර වී තිබේ. ...
උතුරේ ලංගම සේවකයින් විසින් ආරම්භ කොට ඇති වර්ජනය හේතුවෙන් උතුරු පළාතේ ලංගම ඩිපෝ හතකට අයත් බස් රථ ධාවනය කරවීම ජනවාරි මස 2 දා නතර වී තිබේ.
මේ තත්ත්වය හේතුවෙන් පාසල් සිසුන් හා ගම්බද ජනතාව දැඩි දුෂ්කරතාවයකට මුහුණ පා සිටිති.
උතුරේ ලංගම සේවකයින් කියා සිටින්නේ වව්නියාව පැරණි බස් නැවතුම් පල වසා දැමීම දැඩි අසාධාරණයක් බවයි.
ජනවාරි මස 1 දා සිට වවුනියාව පැරණි බස් නැවතුම් පල වසා දමා ඇති අතර ඊට විරෝධය පලකිරීමක් වශයෙන් වව්නියාව පැරණි බස් නැවතුම් පල වටා පිහිටි වෙළෙද සැල් 100 ක් පමණ වසා දමා කළු කොඩි දමා වෙළෙන්දන් විසින් ද විරෝධතාවයක් ආරම්භ කොට තිබේ.
වව්නියාවේ පැරණි බස් නැවතුම්පල වසා දැමීමට උතුරු පළාත් ප්‍රධාන අමාත්‍යවරයා තීරණය කරණ ලද්දේ රුපියල් කෝටි 20 ක පමණ වියදමකින් වව්නියාවේ නව බස් නැවතුම්පලක් විවෘත කොට ලංගම හා පෞද්ගලික බස් රථ එම නැවතුම් පල වෙත රැගෙන යන මෙන් ඉල්ලමිනි.
වව්නියාවේ නව බස් නැවතුම් පල විවෘත කොට වසරකට වඩා වැඩි කාලයක් ගතව ඇතත් එය පසුගිය දෙසැම්බර් මස 25 වෙනිදා දක්වාම වසා දමා තිබුණි.
මේ වන විට පෞද්ගලික බස් රථ හිමියන් පමණක් එම බස් නැවතුම් පලට ගොස් ඔවුන්ගේ බස් රථ එම නැවතුම් පලේ සිට ධාවනය කරති.
ලංගම සේවකයින් කියා සිටින්නේ ඔවුන්ට පෞද්ගලික බස් රථ සේවකයින් සමඟ එකට වැඩ කිරීමට නොහැකි බවයි.
දෙපාර්ශ්වයේම සේවකයින් විසින් පසුගිය දිනවල වව්නියාව පැරණි ලංගම බස් රථ නැවතුම්පල අසල ඉතා කලහකාරී ලෙස හැසිරීම නිසා පොලීසිය ඒ පිළිබදව අධිකරණයට කරුණු වාර්තා කිරීමෙන් පසුව දෙපාර්ශ්වයේම සාමාජිකයින් හය දෙනෙකු වව්නියාව අධිකරණයට කැදවා තිබුණි.
ඉතා සහයෝගයෙන් හා විනීතව සාකච්ඡා මාර්ගයෙන් මෙම ප්‍රශ්නය විසදා ගන්නා ලෙස වව්නියාව දිසා විනිසුරුවරයා දෙපිරිසටම දන්වා සිටි අතර ඔවුන්ට දැඩි ලෙස අවවාද කොට ඔවුන්ගේ අවසාන තීරණය සමඟ ජනවාරි මස 3 වෙනිදා අධිකරණය හමුවේ පෙනී සිටින ලෙසද නියෝග කොට තිබේ.
COMMENTS