පෙරහැර පවත්වන විහාරස්ථාන සදහා අලි ඇතුන් ලබාදීමට ජනාධිපතිවරයා විශේෂ වැඩපිළිවෙලක් ඉදිරියේ දී දියත් කරන බව සෞඛ්‍ය, පෝෂණ හා දේශීය වෛද්‍ය අමාත්...
පෙරහැර පවත්වන විහාරස්ථාන සදහා අලි ඇතුන් ලබාදීමට ජනාධිපතිවරයා විශේෂ වැඩපිළිවෙලක් ඉදිරියේ දී දියත් කරන බව සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා ප්‍රකාශ කරයි.
සෞඛ්‍ය අමාත්‍යවරයා මේ බව කියා සිටියේ ඉංගිරිය ඉමගිර ශ්‍රී විජය බෝධිරාජ බෞද්ධ විහාරස්ථානයේ 20 වන වරටත් පවත්වන ලද මිහිදු මහා පෙරහැර පෙරේදා (24) රාත්‍රියේ වීදි සංචාරය කිරීමේ අවස්ථාවට එක්වෙමිනි.
මෙහිදී සෞඛ්‍ය අමාත්‍යවරයා මෙසේ අදහස් දැක්වීය.
“බෞද්ධ දර්ශණය විද්‍යාත්මක දර්ශණයක්. ඇල්බට් අයිස්ටයින් නම් විද්‍යාඥයා ද ඒ බව ප්‍රකාශ කර තිබෙනවා. බෞද්ධ දර්ශණය වසර 2500 ක කාලයක් ආරක්ෂා කළේ මහා සංඝරත්නය විසින්. ඊට දායකයින් ලෙස අප උදවු කළ යුතුයි. මහායාන සහ ථෙරවාදී ලෙස බෞද්ධ දර්ශණයන් වෙනස් වී තිබුන ද ථෙරවාදී බෞද්ධ දර්ශණයට යුරෝපය තුල ඉල්ලුමක් පවතිනවා. ශ්‍රී ලංකාවේ පෙරහර සංස්කෘතියට ද යුරෝපය තුල ඉල්ලුමක් පවතිනවා. එම නිසා තමයි ඉංග්‍රීසින් විසින් මෙරට පාලනය කරන කාලය තුල දළදා පෙරහැරට අනුග්‍රහය දැක්වූයේ. පෙරහැර තුලින් අපගේ සංස්කෘතිය ලොවට ප්‍රදර්ශණය කළ හැකියි.”
“පෙරහැර පැවැත්වීමේ දී අලි ඇතුන් සපයා ගැනීම ගැටලුවක්. අලි ඇතුන් සංරක්ෂණය කළ යුතු බව පරිසර සංවිධාන පෙන්වා දෙනවා. නමුත් අපගේ සංස්කෘතික දායාදයන් ද ආරක්ෂා කළ යුතුයි. අලි ඇතුන් ආරක්ෂා කිරීම ද ඉතා වැදගත්. මේ පිළිබදව මම ජනාධිපතිවරයා සමග විශේෂ සාකච්ඡාවක් ද පැවැත්වූවා. පෙරහැර පවත්වන විහාරස්ථාන සදහා අලි ඇතුන් ලබාදිය යුතු බවට මතයක් ඉදිරිපත්ව තිබෙනවා. ඒ පිළිබදව අධ්‍යයනය කිරීමට කමිටුවක් ද පත් කෙරුනා. එම කමිටුව වාර්තාව ලබාදීමෙන් පසු අලි ඇතුන් ලබාදීම පිළිබද ක්‍රමවේදයක් ජනාධිපතිවරයා විසින් සකස් කිරිමට නියමිතව තිබෙනවා.”යැයිද වැඩිදුරටත් පැවසීය.
COMMENTS