"ඉදිරියේදී තව දෙතුන් දෙනෙක් පක්ෂයෙන් යයි" - විමල් හෙළිකරයි

තම දේශපාලන පක්ෂයෙන් ලොකු කුඩා කවුරු ඉවත්ව ගියත් යම් කම්පනයක් ඇති වන බවත් එසේ නොදැනීමට තරම් දේශපාලනික ලාඳුරු තත්ත්වයක් තම පක්ෂයට නොමැති බව...

තම දේශපාලන පක්ෂයෙන් ලොකු කුඩා කවුරු ඉවත්ව ගියත් යම් කම්පනයක් ඇති වන බවත් එසේ නොදැනීමට තරම් දේශපාලනික ලාඳුරු තත්ත්වයක් තම පක්ෂයට නොමැති බවත් ජාතික නිදහස් පෙරමුණේ නායක පාර්ලිමේන්තු මන්ත්‍රී විමල් වීරවංශ මහතා පවසයි.

අද (28) කොළඹ පැවති එම පක්ෂයේ මාධ්‍ය හමුවට එක්වෙමින් ඔහු මෙම අදහස් පළ කළේය.

පාර්ලිමේන්තු මන්ත්‍රී වීර කුමාර දිසානායක මහතා පසුගියදා ජාතික නිදහස් පෙරමුණෙන් ඉවත්ව ජනාධිපතිවරයාට සහය දැක්වීමට යෑම පක්ෂයට බලපෑමක් වුයේ ද යන්න පිළිබඳ මාධ්‍යවේදියෙකු විසින් අසන ලද පැනයකට පිළිතුරු ලබා දෙමින් විමල් වීරවංශ මහතා මේ බව කියා සිටියේය.

පෞද්ගලික උවමනාවන් මත හොඳ ලන්සුවක් ලැබුණු විට යම් යම් තීරණ ගන්නා බවත් සමහර විට ඉදිරියේ දී තවත් දෙතුන් දෙනෙක් පක්ෂයෙන් ඉවත් වීමට ඉඩ ඇති බවත් වීරවංශ මහතා පවසයි.

එමෙන්ම රට දැවැන්ත පොහොර හිඟයකට මුහුණ දී ඇති බවත් අද වන විට රුපියල් 2500 කට හෝ පොහොර මිටියක් ලබා ගත නොහැකි තත්ත්වයක් මතු වි ඇති බවත් ඒ මහතා පවසයි.

තෙල් නැව පැමිණෙන තුරු සිටියා මෙන් පොහොර නැව එනතුරු බලා සිටින ලෙස ද ගොවීන්ට විෂය භාර අමාත්‍යවරයා පවසන බවත්, අමාත්‍යාංශය මඟින් කැඳවනු ලැබු ටෙන්ඩරයක් අවලංගු කර අමාත්‍යවරයා විසින් මෙයට සම්බන්ධ පස්වෙනියට නම තිබෙන ආයතනයෙන් ටොන් 1ක් ඩොලර් 316 කට ලබා දී ඇති බවත්, ඒ හේතුවෙන් මෙම පොහොර අර්බුදය ඇතිව තිබෙන බවත් විමල් වීරවංශ මහතා පවසයි.

මෙම ගනුදෙනුව හේතුවෙන් ඩොලර් 29 පාඩුවක් මත පොහොර මෙරටට ගෙන්වීම කැබිනට් මණ්ඩල අනුමැතිය හිමි වු බවත් ඒ අනුව, පොහොර මෙට්‍රික් ටොන් 73000 ක් ලබන ජනවාරි මස අග පමණ වන විට ලංකාවට පැමිණෙන අතර ඒ වන විට ගොවීන්ගේ ජීවිත පවා අහිමි වීමේ තත්ත්වයක් ඇති විය හැකි බව ද විමල් වීරවංශ මහතා කියා සිටියේය.