පළාත් පාලන මැතිවරණයට අදාළව වාහනවල ශබ්ද විකාශන යන්ත්‍ර බැඳගෙන ප්‍රචාරක කටයුතු සහ රථ පෙළපාලි යෑම සම්පූර්ණයෙන් තහනම් බව පොලිස්‌ මාධ්‍ය ප්‍රකා...
පළාත් පාලන මැතිවරණයට අදාළව වාහනවල ශබ්ද විකාශන යන්ත්‍ර බැඳගෙන ප්‍රචාරක කටයුතු සහ රථ පෙළපාලි යෑම සම්පූර්ණයෙන් තහනම් බව පොලිස්‌ මාධ්‍ය ප්‍රකාශක පොලිස්‌ අධිකාරි රුවන් ගුණසේකර මහතා ඊයේ (11) පැවසීය.
එවැනි වාහන අත්අඩංගුවට ගෙන නීතිය ක්රියාත්මක කරන ලෙස සියලුම පොලිස්‌ ස්‌ථාන දැනුවත් කර ඇතැයි පොලිස්‌ මූලස්‌ථානයේ පැවැති මාධ්‍ය හමුවකට සහභාගි වෙමිනි.
පළාත් පාලන මැතිවරණයට අදාළව නාම යෝජනා භාර ගැනීම සඳහා අදියරයන් දෙකක්‌ ක්රියාත්මක වන බවත් දෙසැම්බර් 11 සිට දෙසැම්බර් 14 දහවල් 12.00 දක්‌වා පළාත් පාලන ආයතන 93 ක නාම යෝජනා භාර ගැනීමට නියමිත බව පැවසීය.
දෙවන අදියර ලෙස දෙසැම්බර් 18 සිට දෙසැම්බර් 21 දහවල් 12.00 දක්‌වා පළාත් පාලන ආයතන 248 ක්‌ වෙනුවෙන් නාම යෝජනා භාර ගැනීමට නියමිත අතර මෙහිදී පළමු නාම යෝජනා භාර ගැනීමේ කාලසීමාව තුළ පොලිස්‌ නිලධාරීන් 10,000 ක්‌ රාජකාරි සඳහා යොදවන බවත් දෙවැනි නාම යෝජනා භාර ගැනීමට කොපමණ නිලධාරීන් යොදවනවාද යන්න ඉදිරියේදී තීරණය කරන බවත් ඒ මහතා පැවසීය.
සාමාන්‍ය පෙළ විභාගය දෙසැම්බර් 12 වැනිදා ආරම්භ වී දෙසැම්බර් 21 දක්‌වා පැවැත්වෙන බවත් අදියරයන් දෙකේම නාම යෝජනා අවසන් වන දිනයන් දෙකේදීම විෂයන් දෙකක්‌ පවත්වන දින වන අතර ඒ නිසා විභාගයට බාධා නොවන ලෙස කටයුතු කරන ලෙස ඒ මහතා අපේක්‌ෂකයන්ගෙන් ඉල්ලා සිටියි.
මැතිවරණයට අදාළව ශබ්ද විකාශන යන්ත්‍ර සඳහා බලපත්‍ර ලබාදීමේදී සඳුදා සිට බ්‍රහස්‌පතින්දා දක්‌වා පෙරවරු 6.00 සිට රාත්‍රි 10.00 දක්‌වාත්, සිකුරාදා සහ සෙනසුරාදා පෙරවරු 6.00 සිට අලුයම 1.00 දක්‌වාත්, ඉරිදා දිනයන්හි පෙරවරු 6.00 සිට රාත්‍රි 12.00 දක්‌වාත් බලපත්‍ර ලබා දෙන බවත් ඒ මහතා පැවසිය.
මෙහිදී ශබ්ද විකාශන බලපත්‍ර ලබාදීමේදී විභාගය පැවැත්වෙන වෙලාවක නම් ශබ්ද විකාශන යන්ත්‍ර ලබාදීමක්‌ සිදු නොකරන බවත් ශබ්ද විකාශන යන්ත්‍ර බලපත්‍ර ලබා දීමට පෙර අදාළ පොලිස්‌ ස්‌ථානයෙන් එම ස්‌ථාන පරීක්‌ෂා කළ යුතු බවත් ශබ්ද විකාශන යන්ත්‍ර බලපත්‍ර දීමේදී ශබ්ද විකාශන යන්ත්‍ර මැතිවරණ භූමියෙන් පිටතට ශබ්දය නොයන ලෙස මැතිවරණ භූමිය දෙසට හරවා තැබිය යුතු බවත් ඒ මහතා වැඩිදුරටත් අවධාරණය කළේය.
මේ අනුව අපේක්‌ෂකයන් මැතිවරණ නීතියට අනුව කටයුතු කළ යුතු බවත් ඔවුන් එම නීතිය උල්ලංඝනය කරන්නේ නම් නවීන තාක්‌ෂණය යොදා ගෙන වීඩියෝ කර සෘජුවම නඩු පැවරීම සිදු කරන බවත් යම් අවස්‌ථාවක නීතිපති උපදෙස්‌ අවශ්‍ය නම් අදාළ ලිපි ගොනු නීතිපති දෙපාර්තමේන්තුවට යොමු කර කඩිනමින් උපදෙස්‌ ගෙන මහෙස්‌ත්‍රාත් අධිකරණයේ නඩු පැවරීමට කටයුතු කළ යුතු බවත් වැඩිදුරටත් ඒ මහතා පැවසීය.
COMMENTS