උතුරු පළාත් අධ්‍යාපන අමාත්‍යවරයා රටේ ඒකීය භාවය සහ ස්වෛරීත්වය සම්බන්ධයෙන් ඔහුගේ ස්ථාවයට රටට පැහැදිලි කළ යුතු බව සමාජ සවිබල ගැන්වීම් සහ සුබස...
උතුරු පළාත් අධ්‍යාපන අමාත්‍යවරයා රටේ ඒකීය භාවය සහ ස්වෛරීත්වය සම්බන්ධයෙන් ඔහුගේ ස්ථාවයට රටට පැහැදිලි කළ යුතු බව සමාජ සවිබල ගැන්වීම් සහ සුබසාධන සහ කන්ද උඩරට සංවර්ධන අමාත්‍ය එස්.බී.දිසානායක මහතා ප්‍රකාශ කළහ.
කොළඹ පෙරේදා (18) පැවති මාධ්‍ය හමුවකට එක්වෙමින් අමාත්‍යවරයා පෙන්වා දුන්නේ මේ හේතුවෙන් ඔහු අමාත්‍ය ධූරයෙන් සහ මන්ත්‍රී ධූරයෙන් ඉවත් කිරීමට ද කටයුතු කළ හැකි බවයි.
වව්නියාව, ඉරට්ටපෙරියකුලම්, පැරකුම් මහා විද්‍යාලයේ පසුගියදා උත්සවයක් ආරම්භ කිරීමේ දී ජාතික ධජය එසවීම එහි ප්‍රධාන ආරාධිතයා ලෙස සහභාගී වූ උතුරු පළාත් අධ්‍යාපන අමාත්‍ය එස්. සර්වේෂ්වරන් මහතා ප්‍රතික්ෂේප කර තිබිණි.
ජාතික ධජය එසවීම ප්‍රතික්ෂේප කිරීම සම්බන්ධයෙන් ඉදිරි පියවර ගැනීමට නීතිපතිවරයාගේ උපදෙස් ලබා ගන්නා බව උතුරු පළාත් ආණ්ඩුකාර රෙජිනෝල්ඩ් කුරේ මහතා ප්‍රකාශ කළහ.
එස්.බී.දිසානායක මහතා මෙසේ අදහස් දැක්වීය.
“පළාත් සභා මන්ත්‍රීවරයෙක් හැටියට එතුමා ආණ්ඩුක්‍රම ව්‍යවස්ථාව පිලි ගන්නා බවට දිවුරපු කෙනෙක්.ඒ නිසා ඒකෙන් එයාට බැහැර වෙන්න බෑ.එහෙම එයා පක්ෂපාති නොවෙනවා නම් අපිට පුළුවන් ඔහුව ඇමැති තනතුරෙන් හා මන්ත්‍රී තනතුරෙන් නීතිමය පියවර අරගෙන ඉවත් කරලා දාන්න.අධ්‍යාපන ඇමතිතුමා ගැන මම දන්නේ නැහැ.නමුත් මන් හොදටම දන්නවා විගේන්ශ්වරන් මහ ඇමතිතුමා අද ඔය ප්‍රභාකරන්ගේ කිරි අත්තා වගේ වෙන්න උත්සාහ කරාට එතුමා ප්‍රභාකරන්ට අහු වුණා නම් මරනවා.ඒ මොකද ඔහුගේ පුතාලා දෙන්නම සිංහල කාන්තාවෝ විවාහ කර ගත්ත පවුලක්.අපි දන්නවා උතුරේ තරුණ දරුවෝ හැදුණේ ප්‍රභාකරන්ගේ දේශපාලන දේහයේ තමයි අවුරුදු 30ක්.ඒ නිසා ඔවුන් අතර ජනප්‍රිය චරිත වෙන්න මේ වගේ අන්තගාමී වීර ක්‍රියා.ඒවා බොළඳයි, නූගත්. ඒ වගේ දේවල් නොකර දරුවොත් එක්ක දේශපාලන, ආර්ථික, සමාජ හා සංහිඳියාව පිලිබඳව සංවාදයක යෑම ඉතාමත් වැදගත් කියන කාරණය මන් ඒ අධ්‍යාපන ඇමතිතුමාට, මහ ඇමැතිතුමාටත් මන් කියන්න කැමතියි.”
COMMENTS