මහින්දානන්දගේ නඩුවට දින නියම වෙයි

රුපියල් ලක්ෂ 270ක් වැයකර බොරැල්ල, කිංස්ලි පාරේ නිවසක් මිලදී ගැනීම සම්බන්ධයෙන් හිටපු අමාත්‍ය මහින්දානන්ද අලුත්ගමගේ මහතාට එරෙහිව පවරා ඇති න...

රුපියල් ලක්ෂ 270ක් වැයකර බොරැල්ල, කිංස්ලි පාරේ නිවසක් මිලදී ගැනීම සම්බන්ධයෙන් හිටපු අමාත්‍ය මහින්දානන්ද අලුත්ගමගේ මහතාට එරෙහිව පවරා ඇති නඩුව ලබන මස 13,14,15 යන තෙදින තුළ විභාගයට ගැනීමට අද නියම කෙරිණ.

ඒ මෙම නඩුව කොළඹ මහාධිකරණය විනිසුරු ගිහාන් කුලතුංග මහතා හමුවේ කැඳවූ අවස්ථාවේදීය.

එමෙන්ම මහින්දානන්ද අලුත්ගමගේ මහතාට ඇප ලබා දීමේදී ඇපකරුවන් ලෙස කටයුතු කළ පුද්ගලයන්ට හෙට අධිකරණයේ පෙනී සිටින ලෙසද විනිසුරුවරයා නොතීසි නිකුත් කළහ.

නඩුව කැඳවූ අවස්ථාවේදී මහින්දානන්ද අලුත්ගමගේ මන්ත්‍රීවරයා වෙනුවෙන් පෙනී සිටි නීතිඥවරයා දැනුම් දී ඇත්තේ පාර්ලිමේන්තුවේ අයවැය විවාදයට සහභාගී වීමට අවශ්‍ය බැවින් තම සේවාදායකයා අධිකරණයේ අද පෙනී නොසිටින බවයි.

එසේනම් ඇපකරුවන් අධිකරණය හමුවේ පෙනී සිටිය යුතු බවට මහාධිකරණ විනිසුරුවරයා දැනුම් දුන් අතර ඒ අනුව හෙට දිනයේ ඔවුන්ට අධිකරණයේ පෙනී සිටින ලෙස නොතීසි නිකුත් කළේය.

මහින්දානන්ද අලුත්ගමගේ මන්ත්‍රීවරයා පසුගිය රජය සමයේ අමාත්‍යවරයෙකුව කටයුතු කරන සමයේ අයථා ලෙළ්ස උපාය ගත් රුපියල් ලක්ෂ 270ක මුදලින් බොරැල්ල කිංස්ලි පාරේ නිවසක් මිලදී ගෙන මුදල් විශුද්ධිකරණ පනතේ රෙගුලාසි උල්ලංඝණය කර ඇති බවට මොහුට විරුද්ධව නීතිපතිවරයා විසින් මෙම නඩුව පවරා තිබේ.