වත්මන් නාවික හමුදාපති වයිස් අද්මිරාල් සිරිමෙවන් රණසිංහ මහතාට ජනාධිපතිවරයා විසින් සය මසක සේවා දිගුවක් ලබාදී ඇතැයි වාර්තා වේ. ඒ අනුව නොවැම්...
වත්මන් නාවික හමුදාපති වයිස් අද්මිරාල් සිරිමෙවන් රණසිංහ මහතාට ජනාධිපතිවරයා විසින් සය මසක සේවා දිගුවක් ලබාදී ඇතැයි වාර්තා වේ.
ඒ අනුව නොවැම්බර් 19 වැනිදා විශ්‍රාමයාමට සිටි නාවික හමුදාපතිවරයා ලබන මැයි මාසය දක්වාම අදාළ ධූරය දැරීමට නියමිත බව පැවසේ.
කෙසේවුවද, හිටපු නාවික හමුදාපති ට්‍රැවිස් සින්නයියා මහතාට මසක සේවා දිගුවක් ලබාදීම සම්බන්ධයෙන් සාධාරණීය කරමින් ජනාධිපතිවරයා ඇතුළු පිරිසක් කියා සිටියේ සින්නයියාට සේවා දිගුවක් ලබාදීම මගින් ඊළඟට නාවික හමුදාපති ධූරයට පත්වීමට සිටින අයට අසාධාරණයක් වන බවයි.
මේ අනුව ඊළඟට එම ධූරයට සුදුසුකම් ඇති එන්.බී.ටී. රොසයිරෝ මහතාට නාවික හමුදාපති ධූරය අහිමි වේ.
ඒ ඔහු ලබන වසරේ (2018) ජනවාරි 04 වැනිදා විශ්‍රාම යාමට නියමිත බැවිනි. ඒ මහතා දැනට නාවික හමුදාවේ මාණ්ඩලික ප්‍රධානියා ලෙස කටයුතු කරනු ලබයි.
සින්නයියා මහතාට සේවා දිගුවක් ලාබාදීම ජනපතිවරයා මඟහරිද්දීම තම ගම් ප්‍රදේශයේ අයකු නාවික හමුදාපති කිරීමට ආණ්ඩුවේ ප්‍රබලයින් පිරිසක් හා කිසියම් සමාජ කුලයකට අයත් ආරක්ෂක අංශයේ පුද්ගලයින් පිරිසක් උත්සාහ දරණ බව මුලින්ම කියා සිටියේ ශ්‍රී ලංකා මිරර්ය.
සින්නයියා දෙමළ ජාතිකයෙකු වීම නිසා ඔහුව නාවික හමුදාපති නොකරන්නැයි අදාළ පිරිස මීට පෙර ජනාධිපතිවරයාට බලපෑම් කර තිබූ බවද අපි හෙළිකළේය.
එවැනි ජාතිවාදීන්ගේ හා කුලවාදීන්ගේ බලපෑම් මායිම් නොකල ජනාධිපතිවරයා ට්‍රැවිස් සින්නයියා මාසයකට හෝ නාවික හමුදාපති කිරීමට කටයුතු කිරීමද බොහෝදෙනෙකුගේ පැසසුමට ලක්විය.
කෙසේවුවද, ජනපතිවරයාට කුලවාදීන්ද ජාතිවාදීන් ද පරාජයට පත් කිරීමට හැකිවූයේ මසකට ආසන්න කෙටි කාලයක්වීම ආරක්ෂක අංශය තුළ බලවත් අප්‍රසාදයට හේතුවී තිබේ.
හිටපු නාවික හමුදාපතිවරයා කාලයකට පෙර සිය සේවා දිගුව ඉල්ලා ආරක්ෂක අමාත්‍යංශයට ලිපියක් යොමුකර තිබුණද එය ආරක්ෂක අමාත්‍යංශයේ ලේකම් කපිල වෛද්‍යරත්න මහතා විසින් සඟවා තිබූ බව පැවසේ.
කුලවාදීන්ගේ කුමන්ත්‍රණය දියත්ව ඇත්තේ පී.එච්. ද සිල්වා මහතා අදාල ධූරයට පත් කිරීම සඳහාය.
වත්මන් ආරක්ෂක අමාත්‍යංශයේ ලේකම් කපිල වෛද්‍යරත්න මෙන්ම ඔහු ද, අම්බලන්ගොඩ ප්‍රදේශයෙන් පැමිණි අයෙකි.
සිල්වාට 2020 ජූලි 17 වැනිදා දක්වා අදාළ ධූරය දැරිය හැකිය.
සින්නයියා ඉතිහාසගත කිරීම
සින්නයියා විශාම ගියේ දෙවරක් ඉතිහාස ගතවෙමිනි.
ඒ හැටේ දශකයේ අවසන් භාගයෙන් පසුව නැතිනම් ඊළාම් යුද්ධයෙන් පසුව නාවික හමුදාපති ධූරයට පත් පළමු දෙමළ ජාතික නාවික හමුදාපතිවීමේ ගෞරවයත්, දේශපාලඥයන්ගේ බැලයකු නොවී ගෞරවාන්විතව කෙටිම කාලයක් එය දැරූ පුද්ගලයාද වීමේ ආඩම්බරයත් සමඟය.
වසර 1973 සිට මේ දක්වා සිටි නාවික හමුදාපතිවරු අඩුම වශයෙන් අදාළ ධූරයේ වසරක කාලයක් සිට තිබේ.
අවසන් වරට නාවික හමුදාපතිවරයාව සිටි රවීන්ද්‍ර විජේගුණවර්ධන මහතාද එම ධූරයේ වසර දෙකයි මසක කාලයක් සිටියේය. (පහත ලයිස්තුවෙන් එය තහවුරුකරගත හැකිවේ)
ඔහු පත්කරනු ලැබුවේද වත්මන් ජනාධිපතිවරයා වන අතර ඔහුට සිය නාවික හමුදා ධූර කාලය තුළ අවස්ථා 3කදී ජනපතිවරයා විසින් සේවා දිගු ලබාදී තිබිණි.
සින්නයියා වන අතර 1973 වසරෙන් පසුව අඩුම කාලයක් එම ධූරය දැරූ අයද වේ.
විජේගුණවර්ධන ගේ දුන්නෙත් නෑ
සින්නයියා මහතා නාවික හමුදාපති කිරීමට වැඩිම විරුද්ධත්වයක් දැක්වූ අය ලෙස සැලැකෙන්නේ හිටපු නාවික හමුදාපති හා වත්මන් ආරක්ෂක මාණ්ඩලික ප්‍රධානී වයිස් අද්මිරාල් රවීන්ද්‍ර විජේගුණරත්න මහතාය.
සින්නයියා නාවික හමුදාපතිව ගෙවූ දෙමසක කෙටි කාලය තුළ නාවික හමුදාපතිවරයකුට අයත් වරප්‍රසාදයක් වන කොළඹ ස්ටැන්මෝර් චන්ද්‍රවංකයේ පිහිටි නාවික හමුදාපතිගේ නිල නිවස ලබා නොලැබුණි.
සින්නයියා මහතා විශ්‍රමයනතෙක්ම සිටියේ හෙක්ටර් කොබ්බෑකඩුව මාවතේ පිහිටි නාවික හමුදාවේ නිලධාරීන්ට ලැබෙන තුන්වැනි පන්තියේ නිවසකය.
විජේගුණරත්න මහතා ද අම්බලන්ගොඩින් නාවික හමුදාවට පැමිණි මතභේදාත්මක කුලේම අයෙකි.
සින්නයියා මහතාට නිල නිවස නොදුන් විජේගුණරත්න මහතා අදාළ නිල නිවස ආරක්ෂක අමාත්‍යංශයේ ලේකම් කපිල වෛද්‍යරත්න මහතාට ලබාදීමට මේවන විට කටයුතු යොදා තිබේ.
විජේගුණරත්න මහතා සින්නයියා මහතාට අදාළ නිල නිවස ලබා නොදී සිටියේ ඔහුට ආරක්ෂක මාණ්ඩලික ප්‍රධානීයා ලෙස බුලර්ස් පාරෙන් නිල නිවසක් ලැබී තිබියදීය.
COMMENTS