මෙම සිදුවීම වාර්තා වූයේ විල්සන් කන්ට්‍රි ප්‍රදේශයේ පිහිටා තිබෙන කුඩා නගරයක් වන සදර්ලන්ඩ් ස්ප්‍රින්ග් හි බැප්ටිස්ට් දේවස්ථානයකිනි. ඊයේ ද...
මෙම සිදුවීම වාර්තා වූයේ විල්සන් කන්ට්‍රි ප්‍රදේශයේ පිහිටා තිබෙන කුඩා නගරයක් වන සදර්ලන්ඩ් ස්ප්‍රින්ග් හි බැප්ටිස්ට් දේවස්ථානයකිනි.
ඊයේ දහවල් රයිෆලයක් ද රැගෙන දෙව් මැදුර තුළට එකවරම කඩා වැදුණු ඝාතකයා, එහි සිටි පිරිසට වෙඩි තැබූ බව වාර්තා වේ. ඔහු විසින් වෙඩි තැබීම ආරම්භ කර තිබෙන්නේ දේවස්ථානයට ඇතුල් වන්නටත් පෙර සිටම බව සිද්ධිය ඇසින් දුටු අය පවසති. වයස අවුරුදු 5 කුඩා දරුවන් මෙන්ම අවුරුදු 72 ක් පමණ වන පුද්ගලයන්ද මෙම ප්‍රහාරයෙන් මිය ගොස් ඇත. තවද දේවස්ථානයේ පාදිලිවරයාගේ 14 හැවිරිදි දියණිය ද ප්‍රහාරයෙන් මිය ගොස් තිබේ. 20 දෙනෙක් පමණ සිද්ධියේදී තුවාළ ලැබූහ.
වෙඩි තැබීම සිදුවන අතරවාරයේ දෙව්මැදුරේ සිටි අයෙක් ඔහුගේ අතින් රයිෆලය උදුරාගෙන වෙඩි තැබූ විට ඝාතකයා වාහනයක නැගී එතැනින් පළා ගොස් ඇත. පසුව මෙම වාහනය අනතුරට ලක් වී ඇති අතර, පොලිසිය පසුව සොයාගත්තේ සැකකාර ඝාතකයා රථය තුළම මියගොස් සිටින ආකාරයයි.
මෙම ඝාතකයා වයස අවුරුදු 26 ක් වූ සුදු ජාතිකයෙකු බවද ඔහුගේ නම ඩේවින් පී කෙලී බව ද ඇමරිකානු මාධ්‍ය විසින් වාර්තා කරයි. ඔහු ප්‍රහාරයට පැමිණ තිබෙන්නේ තනිකරම කළු පැහැති ඇඳුමකින් සැරසීගෙන ය.
ටෙක්සාස් ජනපදයෙන් වාර්තා වන දැවැන්තම සමූහ ඝාතනය වශයෙන් මෙම අමානුෂික සිද්ධිය ඉතිහාසයට එක් වේ.
- අමාලි ජයවීර
COMMENTS