සාමාන්‍යයෙන් මාස ගණනක් වැය කර ඉදිකරන මහා මාර්ගයක් සති කිහිපයකින් ඉදිකර අවසන් කිරීමට මෙම නව ක්‍රමය නිසා හැකි වේ. තවද මෙම ක්‍රමයෙන් ඉදිකරන ...
සාමාන්‍යයෙන් මාස ගණනක් වැය කර ඉදිකරන මහා මාර්ගයක් සති කිහිපයකින් ඉදිකර අවසන් කිරීමට මෙම නව ක්‍රමය නිසා හැකි වේ. තවද මෙම ක්‍රමයෙන් ඉදිකරන මහා මාර්ගවල ආයු කාලය, සාමාන්‍ය ගල් තාර යොදා ඉදිකරන මහා මාර්ගයක ආයු කාලය මෙන් තුන් ගුණයකින් වැඩි ය. නඩත්තු කිරීමේ පහසුව සහ අධික උෂ්ණත්වයන්ට ඔරොත්තු දීමේ ගුණය ද මෙහි ඇති තවත් ධනාත්මක ලක්ෂණ වේ.
තවද ප්‍රතිචක්‍රීකරණය කළ ප්ලාස්ටික් බෝතල්වලින් ඉදිකෙරෙන මෙම මහාමාර්ග සැහැල්ලු බවින් යුතු අතර, හිස් ප්ලාස්ටික් බෝතල් මෙන්ම ඇතුළත කුහරයකින් ද සමන්විත වීම කැපී පෙනෙන ලක්ෂණයකි. මෙම හිස් අවකාශය හෙවත් කුටීරය ඔස්සේ පහසුවෙන් ජල නළ ආදී උපයෝගී සැපයුම් ගෙන යා හැකිය.
මෙය යුරෝපය පුරා කෙමෙන් ජනප්‍රිය වෙමින් යන තිරසාර සංවර්ධන සංකල්පයකි. නෙදර්ලන්තයේ රොටර්ඩෑම් නගරයේ මේ වන විටත් ප්‍රතිචක්‍රීකරණය කළ ප්ලාස්ටික් වලින් ඉදිවූ මහා මාර්ග දක්නට ඇත.
ඇස්ෆෝල්ට් (බිටුමින) යන විද්‍යාත්මක නාමයෙන් හඳුන්වන ගල්තාර, වසරකට ගෝලීය වශයෙන් කාබන් ඩයොක්සයිඩ් ටොන් මිලියන 1.6 ක් විමෝචනය සඳහා වග කියයි. එහි නිෂ්පාදන ක්‍රියාවලියේදී මෙන්ම රථ වාහන ධාවනයේදී ද කාබන්ඩයෙක්සයිඩ් විමෝචනය වේ. කාබන්ඩයොක්සයිඩ් වායුව, මිහිතලය උණුසුම් කරන හරිතාගාර ආචරණයට වැඩියෙන්ම වග කියන සංරචකයයි.
මේ වන විට අප්‍රිකානු මහද්වීපයට අයත් ඝානාවේ ද ඝන අපද්‍රව්‍ය කළමනාකරණ පර්යේෂණ යටතේ ප්‍රතිචක්‍රීකරණය කරන ලද ප්ලාස්ටික් බෝතල්වලින් මහා මාර්ග ඉදිකිරීම වෙත අවධානය යොමු ව තිබේ.
දින දෙකක් වර්ෂාව ඇද හැළීම නිසා නාය ගිය, ජීවිත දෙසීයක් බිලිගත් මීතොටමුල්ල කුණු කන්ද සම්බන්ධයෙන් අද දක්වා ද පිළිගත් විසඳුමක් ලංකාවේ බලධාරීන් විසින් ඉදිරිපත් කර නැත. කුණු කඳු වෙනත් ස්ථාවලට ගෙන යාම වැනි පැලැස්තර විසඳුම් වෙනුවට ඝන අපද්‍රව්‍ය කළමනාකරණය සම්බන්ධයෙන් විධිමත් වැඩපිළිවෙළක් ලංකාවේ තවමත් ක්රියාත්මක නොවේ. විශේෂයෙන්ම ප්ලාස්ටික් ජල බෝතල් ලංකාවේ වෙළඳපොළේ ඉහළ ඉල්ලුමක් ඇති පාරිභෝගික භාණ්ඩයක් වන අතර, හිස් ප්ලාස්ටික් බෝතල් දිනකට දහස් ගණනින් ඉවත දැමේ. මේ අනුව එංගලන්තය වැනි දියුණු රටවල් පමණක් නොව නොදියුණු යැයි කියන ඝානාව වැනි රටවලින් ද ලංකාවට මේ සම්බන්ධයෙන් ඉගෙන ගත යුතු පාඩම් රාශියක් තිබෙන බව පැහැදිලි ය.
බලධාරීන්ගේ අවධානය පිණිසයි!
- අමාලි ජයවීර
COMMENTS