ඒ සඳහා එම අමාත්‍යාංශයෙන් මෑතක දී විශ්‍රාම ලබා ගත් අතිරේක ලේකම්වරයකු ලවා අමාත්‍ය රිෂාඞ් බදුර්දීන් මහතා සාවද්‍ය වාර්තාවක් සකස් කර ඇති බව...
ඒ සඳහා එම අමාත්‍යාංශයෙන් මෑතක දී විශ්‍රාම ලබා ගත් අතිරේක ලේකම්වරයකු ලවා අමාත්‍ය රිෂාඞ් බදුර්දීන් මහතා සාවද්‍ය වාර්තාවක් සකස් කර ඇති බව අමාත්‍යාංශ අභ්‍යන්තර ආරංචි මාර්ග සඳහන් කරයි. ලංකා මිනරල් සෑන්ඩ්ස් ලිමිටඩ් ආයතනය මේ වන විට වාර්ෂිකව රුපියල් මිලියන 2000කට ආසන්න ශුද්ධ ලාභයක් ලබන අතර මහා භාණ්ඩාගාරය වෙත වසරකට රුපියල් මිලියන 25000කට ආසන්න මුදලක් ලබා දෙන බව ද එම ආරංචි මාර්ග වැඩිදුරටත් සඳහන් කරයි.
අමාත්‍ය රිෂාඩ් බදුර්දීන් මහතාගේ මෙම සැලසුම පිළිබඳව ශ්‍රී ලංකා නිදහස් සේවක සංගමය ජනාධිපති මෛත්‍රීපාල සිරිසේන මහතාව දැනුවත් කර ඇත.
මේ පිළිබඳව කළ විමසීමක දී ශ්‍රී ලංකා නිදහස් සේවක සංගමයේ ලේකම් සහ ජනාධිපති වෘත්තීය සමිති අධ්‍යක්ෂ ජනරාල් ලෙස්ලි දේවේන්ද්‍ර මහතා ප්‍රකාශ කළේ කර්මාන්ත සහ වාණිජ කටයුතු අමාත්‍යාංශයේ අතිරේක ලේකම්වරයකු හරහා ලංකා මිනරල් සෑන්ඩ්ස් ලිමිටඩ් ආයතනය පාඩු ලබන ආයතනයක් ලෙස වාර්තාවක් සකස් කර අමාත්‍ය මණ්ඩලය වෙත ඉදිරිපත් කොට එම ආයතනය පුද්ගලික ආයෝජකයකුට විකුණා දැමීමේ අමාත්‍ය රිෂාඩ් බදුර්දීන් මහතාගේ සැලසුම පිළිබඳව ජනාධිපති මෛත්‍රීපාල සිරිසේන මහතා ඇතුළු ශ්‍රී ලංකා නිදහස් පක්ෂ මධ්‍යම කාරක සභාව පසුගිය මධ්‍යම කාරක සභාවේ දී සවිස්තරව දැනුවත් කළ බවය.
එම අවස්ථාවේ ලංකා මිනරල් සෑන්ඩ්ස් ලිමිටඩ් ආයතනය පසුගිය වසර 10ක කාලය තුළ දී ලබා ගත් ලාභාංශ පිළිබඳව සත්‍ය තොරතුරු ඇතුළත් වාර්තාවක් ද ඉදිරිපත් කළ බව ද ඒ මහතා වැඩිදුරටත් ප්‍රකාශ කළේය. මේ පිළිබඳව අමාත්‍ය රිෂාඞ් බදුර්දීන් මහතාගෙන් විමසීම සඳහා අප උත්සාහ කළ ද අමාත්‍යවරයා විදේශගත වී ඇති බැවින් ඔහු සම්බන්ධ කර ගැනීමට නොහැකි විය.
- සත්හඬ
COMMENTS