දිවයිනට පැමිණ සිටින එක්සත් ජාතීන්ගේ සංවිධානයේ සුළු ජාතීන් පිළිබද නියෝජිත රීටා අයිසැක් නැඩියා මහත්මිය සහ දෙමළ ජාතික සන්ධාන නියෝජිතයින් අතර ...
දිවයිනට පැමිණ සිටින එක්සත් ජාතීන්ගේ සංවිධානයේ සුළු ජාතීන් පිළිබද නියෝජිත රීටා අයිසැක් නැඩියා මහත්මිය සහ දෙමළ ජාතික සන්ධාන නියෝජිතයින් අතර අද (19) පෙරවරුවේ සාකච්ඡාවක් පැවැත්විණි.
කොළඹදී පැවති මෙම හමුවට දෙමළ ජාතික සන්ධානයේ නායක ආර්. සම්බන්ධන් මහතා, පාර්ලිමේන්තු මන්ත්‍රී එම්.ඒ සුමන්දිරම් මහතා ඇතුළු නියෝජිතයන් රැසක් සහභාගී වී තිබේ.
මෙහිදී ව්‍යවස්ථා සංශෝධනය, පළාත් පාලන මැතිවරණය සහ උතුරු නැගෙනහිර ජනතාවගේ ගැටලු පිළිබදව දීර්ඝ ලෙස සාකච්ඡා කර ඇති බව වාර්තා වේ.
සුළු ජාතීන්ගේ කටයුතු පිළිබඳ එක්සත් ජාතීන්ගේ සංවිධානයේ විශේෂ නියෝජිතවරිය මෙරට සංචාරයක් සඳහා පැමිණියේ පසුගිය 17 වැනිදාය.
ඇය දින 10ක් මෙරට රැදී සිටින අතර මෙරට ජනවාර්ගික, ආගමික සහ භාෂා සුළුතරයන්හි වත්මන් තත්ත්වය පිළිබදව ඇගයීමක් යෙදීමට නියමිතය.
ජගත් සංවිධානය ප්‍රකාශ කළේ මානව හිමිකම් විශේෂඥවරියක වන ඇය උතුර, උතුරුමැද, නැගෙනහිර සහ මධ්‍යම පළාත්වල සුළු ජාතික ජන කොටස් මුණ ගැසී ඔවුන්ගේ ගැටළු පිළිබදව ඍජුව අදහස් හුවමාරු කර ගනු ඇති බවයි.
මේ අතර, අද පස්වරුවේ රීටා අයිසැක් මහත්මිය ජාතික සංවාද අමාත්‍ය මනෝ ගනේෂන් මහතාව ද මුණ ගැසුණි.
COMMENTS