මහ බැංකු බැඳුම්කර සිද්ධියට අදාළව පොදු ව්‍යාපාර පිළිබඳව කාරක සභාව හෙවත් කෝප් කමිටුව මේ නිගමනය වාර්තා දෙකක් ලෙස ඉදිරිපත් කිරීමට තීරණය වී ති...
මහ බැංකු බැඳුම්කර සිද්ධියට අදාළව පොදු ව්‍යාපාර පිළිබඳව කාරක සභාව හෙවත් කෝප් කමිටුව මේ නිගමනය වාර්තා දෙකක් ලෙස ඉදිරිපත් කිරීමට තීරණය වී තිබේ.
කෝප් කමිටුවේ සභාපති සුනිල් හඳුන්නෙත්ති මහ බැංකු බැඳුම්කර සිද්ධියට අදාළව වාර්තාවක් සකස් කළ අතර එම වාර්තාවට අමතරව කෝප් කමිටුවේ එක්සත් ජාතික පක්ෂ මන්ත්‍රීවරු වෙනම වාර්තාවක් සකස් කර ඉදිරිපත් කිරීමට තීරණය කර ඇත.
ඒ අනුව කෝප් කමිටු සභාපතිවරයා මහ බැංකුවේ හිටපු සභාපති අර්ජුන මහේන්ද්‍රන් වරදකරු කරමින් වාර්තාවක් ඉදිරිපත් කරන අතර එක්සත් ජාතික පක්ෂ මන්ත්‍රීවරුන් හිටපු අධිපතිවරයා බැඳුම්කර වෙන්දේසියේදී වරදක් කර නැති බව කියමින් ඔහුව නිදොස් කොට නිදහස් කරමින් වාර්තාවක් ඉදිරිපත් කිරීමට නියමිතය.
කෝප් කමිටු සභාපතිවරයාගේ වාර්තාව පාර්ලිමේන්තුවට ඉදිරිපත් කිරීම සම්බන්ධයෙන් ඉකුත් 20 වනදා සහ 21 වනදා පාර්ලිමේන්තු සංකීර්ණයේදී කෝප් කමිටු සාමාජිකයන් රැස්වී සාකච්ඡා කළ අතර එහිදී සාමාජික මන්ත්‍රීවරුන් අතර උණුසුම් වචන හුවමාරු සිදුවී තිබේ.
සභාපතිවරයාගේ වාර්තාවට ජනතා විමුක්ති පෙරමුණ සහ ශ්‍රී ලංකා නිදහස් පක්ෂය මෙන්ම ඒකාබද්ධ විපක්ෂයේ මන්ත්‍රීවරුන්ගේ සහය හිමි වී ඇති අතර එක්සත් ජාතික පක්ෂ මන්ත්‍රීවරු ඊට විරෝධය පළකර ඇත. දෙමළ ජාතික සන්ධානයේ මන්ත්‍රීවරු එම රැස්වීම සඳහා සහභාගි වී නැත.
කෙසේ වෙතත් හෙට (25) මෙම වාර්තා දෙක පාර්ලිමේන්තුවට ඉදිරිපත් කිරීමට නියමිත අතර එය වාර්තා දෙකක් ලෙස හෝ බෙදුණු වාර්තාවක් ලෙස ඉදිරිපත් කිරීම සම්බන්ධයෙන් අවසන් තීන්දුවක් ගැනීමට නියමිතය.
COMMENTS