මිහිතලය ආරක්ෂා කර ගැනීම සඳහා ලොව සියලූම රටවල් අනුගමනය කළ යුතු ක‍්‍රම හා විධි සහිත ඓතිහාසික ලියවිල්ලක් වූ පැරිස් සම්මුතිය ශී‍්‍ර ලංකාව තුළ ...
මිහිතලය ආරක්ෂා කර ගැනීම සඳහා ලොව සියලූම රටවල් අනුගමනය කළ යුතු ක‍්‍රම හා විධි සහිත ඓතිහාසික ලියවිල්ලක් වූ පැරිස් සම්මුතිය ශී‍්‍ර ලංකාව තුළ තහවුරු කරමින් බලාත්මක කිරීමට කටයුතු කළ බවට වූ වාර්තාව ජනාධිපති මෛතී‍්‍රපාල සිරිසේන මහතා විසින් ඊයේ (21) එක්සත් ජාතීන්ගේ සංවිධානයේ මහ ලේකම් බෑන් කී මුන් මහතා වෙත පිළිගන්වනු ලැබීය.
මෙම සියවස තුළදී ගෝලීය උෂ්ණත්වය කාර්මීකරණයට පෙර තිබුණු උෂ්ණත්වය මෙන් සෙන්ටිගේ‍්‍රට් අංශක 02 කට වඩා අඩුවෙන් පවත්වා ගැනීම සඳහා සියලු රටවල් එක්සත් කිරීම පිණිස මෙම සම්මුතියට එළැඹ තිබේ.
2015 දෙසැම්බර් මාසයේ පැරිස් නුවරදී පැවැත්වුණු දේශගුණ විපර්යාස පිළිබඳ එක්සත් ජාතීන්ගේ රාමුගත සම්මුතියෙහි 21 වැනි වාරයේ අවසන් තීරණය ලෙස මෙම සම්මුතිය සකස් කෙරුණු අතර එම සමුළුවට ජනාධිපති මෛතී‍්‍රපාල සිරිසේන මහතා ඇතුළු ලෝකයේ රාජ්‍ය නායකයින් 158 දෙනෙකු පමණ සහභාගී වූහ.
ලොව අනාගත ඉදිරි ගමන හා ජනතාවගේ සුඛ විහරණය තීරණය කරන සුවිශේෂී සම්මුතියක් වන මෙම සම්මුතියට ශී‍්‍ර ලංකාව ද අනුගතව සිටින අතර එම සම්මුතිය කැබිනට් මණ්ඩලයට ඉදිරිපත් කර බලාත්මක නීතියක් බවට පත් කිරීමට මේ වනවිට ශී‍්‍ර ලංකා රජය කටයුතු කර තිබේ.
ශී‍්‍ර ලංකා ජනාධිපතිවරයා ලෙස මෙන්ම පරිසර අමාත්‍යවරයා ලෙස ජනාධිපතිවරයා අදාළ වාර්තාව එක්සත් ජාතීන්ගේ මුලස්ථානයේ දී එක්සත් ජාතින්ගේ සංවිධානයේ මහ ලේකම්වරයා වෙත භාර දුන් අතර පරිසරය කෙරෙහි ඉතා සංවේදී රාජ්‍ය නායකයෙකු වන ජනාධිපති මෛතී‍්‍රපාල සිරිසේන මහතා මේ වෙනුවෙන් දක්වන ලද සුවිශේෂී කැපවීම මහ ලේකම්වරයාගේ විශේෂ පැසසුමට ලක් විය.
COMMENTS