ශ්‍රී ලංකාවේ මහකොමසාරිස්වරයාට පහරදීමේ සිදුවීමට අදාළව මෙරට සිටින මැලේසියානු මහකොමසාරිස්වරයාගෙන් රජය කරුණු විමසා ඇති බව වාර්තා වේ. විදේශ කට...
ශ්‍රී ලංකාවේ මහකොමසාරිස්වරයාට පහරදීමේ සිදුවීමට අදාළව මෙරට සිටින මැලේසියානු මහකොමසාරිස්වරයාගෙන් රජය කරුණු විමසා ඇති බව වාර්තා වේ.
විදේශ කටයුතු අමාත්‍යංශ ලේකම්වරයා විසින් ඒ බව තහවුරු කර ඇත.
මැලේසියාව බලා ගිය ඒකාබද්ධ විපක්ෂ දූත පිරිසේ පාර්ලිමේන්තු මන්ත්‍රී දිනේෂ් ගුණවර්ධන මහතා සමග ගුවන්තොටුපොළ වෙත ගොස් යළි එමින් සිටියදී ශ්‍රී ලංකා මහකොමසාරිස්වරයා එරට දී එල්.ටී.ටී.ඊ ඩයස්පෝරාවේ අන්තවාදී පිරිසකගේ ප්‍රහාරයට ලක්විය.
මෙම ප්‍රහාරයෙන් සුළු තුවාල ලැබූ ශ්‍රී ලංකා මහකොමසාරිස්වරයා ගුවන්තොටුපළ රෝහලේ ප්‍රතිකාර ලැබූ බවද වාර්තා විය.
කෙසේ වෙතත් ශ්‍රී ලංකා මහකොමසාරිස්වරයාට මැ‍ලේසියාවේදී සිදුවූ ප්‍රහාරය, ශ්‍රී ලංකා රජය විසින් තරයේ හෙළාදැක තිබේ.
ක්වාලාලාම්පූර්හි පිහිටි ශ්‍රී ලංකා මහ කොමසාරිස් කාර්යාලය, වැරදිකරුවන් හඳුනා ගැනීම සඳහා සහ විමර්ශන කටයුතුවලට සහාය ලබා දීම සඳහා මැලේසියාවේ නීතිය බලාත්මකිරීමේ බලධාරීන් හා මීට අදාළ වෙනත් බලධාරීන් සමඟ කටයුතු සම්බන්ධීකරණය කරමින් සිටින බව ශ්‍රී ලංකාවේ විදේශ කටයුතු අමාත්‍යංශය විසින් නිකුත් කළ නිවේදනයක දැක්වෙයි.
මෙම සිදුවීමේ බරපතළකම අවබෝධ කරගන්නා අතර මේ සම්බන්ධයෙන් රාජ්‍ය තාන්ත්‍රික මාර්ග ඔස්සේ ගතයුතු සියලු පියවර ගනු ලබමින් සිටින බව එම නිවේදනයේ වැඩිදුරටත් දැක්වේ.
මේ අතර මැලේසියාවේ ශ්‍රී ලංකා මහකොමසාරිස් අයි.අන්සාර් මහතාට එරට ක්වාලාම්පූර් ගුවන්තොටුපළේදී පහරදීමේ සිද්ධියට අදාළව 5 දෙනෙකු අත්අඩංගුවට ගෙන තිබේ.
COMMENTS