හිටපු පොලිස්පති දේශබන්දු තෙන්නකෝන්ගේ නම 2020 වසරේ සිට ඡන්ද හිමි නාමලේඛනයේ පවා නොමැති බවත්, ඔහු සමාජයේ "ගොස්ට්" (හොල්මනක්) ලෙස ජී...
හිටපු පොලිස්පති දේශබන්දු තෙන්නකෝන්ගේ නම 2020 වසරේ සිට ඡන්ද හිමි නාමලේඛනයේ පවා නොමැති බවත්, ඔහු සමාජයේ "ගොස්ට්" (හොල්මනක්) ලෙස ජීවත්ව ඇති බවත් අතිරේක සොලිසිටර් ජනරාල් දීලිප පිරිස් මහතා මාතර මහෙස්ත්‍රාත් අධිකරණයට දැනුම් දුන්නේය.
2023 වසරේ මාතර, වැලිගම ප්‍රදේශයේ පිහිටි W15 හෝටලයට වෙඩි ප්‍රහාරයක් එල්ල කිරීමේ සිද්ධිය සම්බන්ධයෙන් අත්අඩංගුවට ගැනීමට නියමිතව සිටියදී අධිකරණයට ඉදිරිපත් වූ දේශබන්දු තෙන්නකෝන් සම්බන්ධයෙන් නීතිපතිවරයා වෙනුවෙන් කරුණු දක්වමින් අතිරේක සොලිසිටර් ජනරාල් දීලිප පිරිස් මහතා වැඩිදුරටත් අදහස් දැක්වීය.
"ස්වාමීනි, දින විස්සක් පුරා මේ තැනැත්තා සොයමින් සිටින අවස්ථාවක අධිකරණයේ බංකුව දක්වා පැමිණියේ කොහොමද? කාගේවත් ඇසකට හසු නොවී," යැයි අතිරේක සොලිසිටර් ජනරාල්වරයා අධිකරණයට ප්‍රකාශ කළේය.
"ඒ වගේම පසුගිය දවස් 20 පුරා සැඟවී සිටි ස්ථානය ගැන විශේෂයෙන්ම විමර්ශනය කළ යුතුයි. මේ තැනැත්තා පොලිස්පතිවරයෙකු වීමට නොවේ, අඩුම තරමින් පොලිස් කොස්තාපල් තනතුරටවත් සුදුසු නැහැ," යැයි ඔහු වැඩිදුරටත් පැවසීය.
"පොලිස් කොස්තාපල්වරුන් යැයි කියන අයටත් මෙය කරන නිගරුවක්. දැනට සොයාගෙන තිබෙනවා මොහුට ගෙවල් අටක් හිමි බව. 2020 වසරේ සිට ඡන්ද හිමි නාමලේඛනයේවත් මොහුගේ නම නැහැ. හොල්මනක් විදියට සමාජයේ ජීවත්ව සිටියේ," යැයි පිරිස් මහතා තවදුරටත් ප්‍රකාශ කළේය.
"හරක් කටා, මාකදුරේ මධුෂ්ට වඩා දරුණු ගණයේ සංවිධානාත්මක අපරාධකරුවෙක් මොහු. තමන්ගේ බලය අනිසි ලෙස භාවිතා කර තිබෙනවා. ඇප නොදී විමර්ශන අවසන් වන තෙක් රිමාන්ඩ් කරන ලෙස ඉල්ලා සිටිනවා," යැයි අතිරේක සොලිසිටර් ජනරාල්වරයා අධිකරණයට දැනුම් දුන්නේය.
අනතුරුව, දේශබන්දු තෙන්නකෝන්ට ඇප ඉල්ලමින් ජනාධිපති නීතිඥ රෝමේෂ් ද සිල්වා මහතාගේ උපදෙස් පරිදි ජනාධිපති නීතිඥ ශානක රණසිංහ මහතා අධිකරණයට කරුණු දැක්වීය.
ඉදිරිපත් වූ සියලු කරුණු සලකා බැලූ ප්‍රධාන මහේස්ත්‍රාත් අරුණ ඉන්ද්‍රජිත් බුද්ධදාස මහතා, කරුණු සම්බන්ධයෙන් අධ්‍යයනය කර ඇප ලබා දෙනවාද නැද්ද යන්න පිළිබඳ නියෝගය මාර්තු 20 වන දින ප්‍රකාශයට පත් කරන බව සඳහන් කළේය.
ඒ අනුව මහේස්ත්‍රාත්වරයා දේශබන්දු තෙන්නකෝන් මාර්තු 20 වන දින දක්වා රිමාන්ඩ් බන්ධනාගාරගත කිරීමට නියෝග කළේය.
මාර්තු 19 වන දින උදෑසන දේශබන්දු තෙන්නකෝන් දින 20කට පසුව ජනාධිපති නීතිඥ ශානක රණසිංහ මහතා හරහා මාතර මහේස්ත්‍රාත් අධිකරණයට භාර වූ අතර, මාර්තු 20 වැනිදා දක්වා රක්ෂිත බන්ධනාගාරගත කරන ලෙස අධිකරණය නියම කළේය.
දේශබන්දු තෙන්නකෝන්ගේ ඇප ඉල්ලීම පිළිබඳ නියෝගය මාර්තු 20 වන දින ප්‍රකාශයට පත්කරන බවද මහේස්ත්‍රාත්වරයා විසින් දැනුම් දෙනු ලැබීය.
අත්අඩංගුවට ගැනීමට නියෝග කිරීමෙන් පසුව පසුගිය පෙබරවාරි 27 වන දින සිට අධිකරණ නියෝග මඟහැර සිටි දේශබන්දු තෙන්නකෝන්, මාර්තු 19 වන දින පෙරවරුවේ සිය නීතීඥවරුන් මාර්ගයෙන් මාතර මහේස්ත්‍රාත් අධිකරණයට ඉදිරිපත් විය.
දේශබන්දු තෙන්නකෝන් මාතර මහේස්ත්‍රාත් අධිකරණය හමුවට භාරවී ඇති බව මහජන ආරක්ෂක අමාත්‍ය ආනන්ද විජේපාල මහතා මාර්තු 19 වන දින පෙරවරුවේ පාර්ලිමේන්තුවට දැනුම් දුන්නේය.
වැලිගම W15 හෝටලයට එල්ල කරන ලද වෙඩි ප්‍රහාරය සම්බන්ධයෙන් අත්අඩංගුවට ගැනීමේ නියෝගයක් තිබියදී දින 20ක කාලයක් තුළ රටේ නීතියෙන් සැඟවී සිටි හිටපු පොලිස්පතිවරයා අවසානයේ අධිකරණයට භාරවීම මත, අතිරේක සොලිසිටර් ජනරාල්වරයා මෙම දැඩි ප්‍රකාශ සිදු කළේය.
අතිරේක සොලිසිටර් ජනරාල් දීලිප පිරිස් මහතාගේ කරුණු දැක්වීම අනුව, දේශබන්දු තෙන්නකෝන් සැඟවී සිටි ස්ථානය පිළිබඳව ද විශේෂ විමර්ශනයක් පැවැත්විය යුතු බවත්, ඔහු බරපතල අපරාධකරුවකු බවත් අධිකරණයට දැනුම් දෙනු ලැබීය.
නීතිපති දෙපාර්තමේන්තුව වෙනුවෙන් කරුණු දක්වමින් අතිරේක සොලිසිටර් ජනරාල්වරයා දේශබන්දු තෙන්නකෝන්ට ඇප ලබා නොදී රිමාන්ඩ් බන්ධනාගාරගත කරන ලෙස ඉල්ලා සිටි අතර, දේශබන්දු තෙන්නකෝන් වෙනුවෙන් පෙනී සිටි ජනාධිපති නීතිඥවරුන් ඔහුට ඇප ලබා දෙන ලෙස ඉල්ලා සිටියහ.
මහේස්ත්‍රාත්වරයා සියලු පාර්ශ්වයන්ගේ කරුණු සලකා බලා, ඇප පිළිබඳ නියෝගය හෙට (මාර්තු 20) දින ප්‍රකාශයට පත් කරන බව දැනුම් දී, මාර්තු 20 වන දින දක්වා රිමාන්ඩ් බන්ධනාගාරගත කරන ලෙස නියෝග කළේය.
දේශබන්දු තෙන්නකෝන් අධිකරණයට භාරවී ඇති බව මහජන ආරක්ෂක අමාත්‍යවරයා පාර්ලිමේන්තුවට දැනුම් දීම මගින් මෙම සිද්ධිය රටේ ඉහළ මට්ටමේ අවධානයට ලක්ව ඇති බව පෙනී යයි.
COMMENTS