2016 ඉන්දීය සාගර සමුළුවට සහභාගිවීමට සිංගප්පූරුවට ගොස් සිටින අග්‍රාමාත්‍ය රනිල් වික්‍රමසිංහ මහතා සහ අමෙරිකානු රාජ්‍ය දෙපාර්තමේන්තුවේ දකුණු ...
2016 ඉන්දීය සාගර සමුළුවට සහභාගිවීමට සිංගප්පූරුවට ගොස් සිටින අග්‍රාමාත්‍ය රනිල් වික්‍රමසිංහ මහතා සහ අමෙරිකානු රාජ්‍ය දෙපාර්තමේන්තුවේ දකුණු සහ මධ්‍යම ආසියානු කටයුතු භාර සහකාර රාජ්‍ය ලේකම් නීශා බිස්වාල් මහත්මිය අතර ඊයේ (02) සාකච්ඡාවක් පැවැත්විණි.
අග්‍රාමාත්‍ය කාර්යාලය නිවේදනය කළේ මෙම සාකච්ඡාව සිංගප්පූරුවේ රිට්ස් කාල්ටන් හෝටලයේදී පැවැත්වුණු බවයි.
මෙහිදී ජාතික සහ ජාත්‍යන්තර වශයෙන් පවතින වර්තමාන දේශපාලන සමාජීය සහ ආර්ථික ප්‍රවණතා පිළිබඳව සාකච්ඡාවට ලක්ව තිබේ.
ශ්‍රී ලංකාවේ වත්මන් සංවර්ධන ක්‍රියාදාමය සහ ආසියානු කලාපීය රටවල දේශපාලන අභියෝගයන් පිළිබඳව ද මෙහිදී අවධානය යොමුවී ඇත.
මහනුවර, කොළඹ, හම්බන්තොට ආර්ථික කොරිඩෝවේ සංවර්ධන සැළසුම් සහ නැගෙනහිර පලාතේ ත්‍රිකුණාමලය ආශ්‍රිත සංවර්ධන කාර්යයන් පිළිබඳ කරුණු මෙහිදී අග්‍රාමාත්‍යවරයා විසින් පැහැදිළි කර ඇති අතර යුද්ධයෙන් බරපතල පීඩාවන්ට ලක්වූ උතුර පළාතේ ජන ජීවිතය සාමාන්‍ය තත්ත්වයට පත්කිරීම සඳහා ක්රියාත්මක කළ යුතු දීර්ඝකාලීන තිරසාර වැඩපිළිවෙල පිළිබඳව ද අදහස් හුවමාරු වී තිබේ.
ශ්‍රී ලංකාවේ සම්මුතිවාදී රජය ගෙන යනු ලබන යහපාලන වැඩපිළිවෙල පිළිබඳව ප්‍රසාදය පළ කර ඇති නීශා බිස්වාල් මහත්මිය ශ්‍රී ලාංකික ජනතාවගේ යහපත සහ අභිවෘද්ධිය වෙනුවෙන් සහය ලබාදීමට සූදානම් බවද අග්‍රාමාත්‍යවරයා හමුවේ ප්‍රකාශ කොට තිබේ.
COMMENTS