දඹුල්ල ක්‍රීඩාංගණයේ ගස් කපා දමයි

අද (31) ශ්‍රී ලංකා කණ්ඩායම හා සංචාරක ඔස්ට්‍රේලියා කණ්ඩායම අතර දඹුල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වෙන සිවුවැනි එක්දින තරගය සඳහ...

අද (31) ශ්‍රී ලංකා කණ්ඩායම හා සංචාරක ඔස්ට්‍රේලියා කණ්ඩායම අතර දඹුල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වෙන සිවුවැනි එක්දින තරගය සඳහා විශේෂ ආරක්‍ෂාවක් යෙදවීමට බලධාරීන් හා පොලීසිය කටයුතු කර තිබේ.

පසුගිය 28 වනදා එම ක්‍රීඩාංගණයේ පැවති ශ්‍රී ලංකාව සහ ඔස්ට්‍රේලියාව අතර තෙවැනි එක්දින තරගය නැරඹීම සඳහා නියමිත ධාරිතාව ඉක්මවා ජනකායක් පැමිණ සිටියේය.

දඹුල්ල ක්‍රීඩාංගණයේ ආසන පහසුකම් පවතින්නේ ප්‍රේක්ෂකයන් 18,000කට පමණක් වන අතර පසුගිය 28වනදා පැවති තරගය සදහා ප්‍රවේශපත් සියල්ල විකිණී අවසන්ව තිබුණද බොහෝ පිරිසක් තරගය නැරඹීමට පැමිණ සිටියේ ආරක්ෂිත ගේට්ටු කඩා බිඳ දමමිනි.

ඒ හේතුවෙන් තරගය අවසානයේ ප්‍රේක්ෂකයන් හා පොලීසිය අතර උණුසුම්කාරී තත්ත්වයක් ද හට ගැනුණි.

මේ සියළු කාරණා පදනම් කරගනිමින් අද දිනයේ ක්‍රීඩාංගණය අවට විශේෂිත ආරක්‍ෂිත වැඩපිළිවෙලක් ක්‍රියාත්මක කිරීමට කටයුතු යොදා ඇත.

ඒ අනුව පසුගිය 28දා තරගයේදී ප්‍රේක්‍ෂකයන් විශාල සංඛ්‍යාවක් ලැගුම්ගෙන සිටි ක්‍රීඩාංගණය වටා තිබූ ගස් කපා ඉවත් කිරීමට ද ක්‍රීඩාංගණ බලධාරීන් කටයුතු කොට තිබේ.

ක්‍රිකට් ආයතනය ප්‍රේක්ෂකයින්ගෙන් වැඩිදුරටත් ඉල්ලා සිටින්නේ ප්‍රවේශ පත්‍ර මිලදී ගැනීමට බලාපොරොත්තුවෙන් තරගය පැවැත්වෙන දඹුල්ල ක්‍රීඩාංගණයේ දොරටු අවහිර නොකරන ලෙසයි.