පොදු ව්‍යාපාර පිළිබඳ කාරක සභාවේ පළමු වාර්තාව පොදු ව්‍යාපාර පිළිබඳ කාරක සභාවේ සභාපති, පාර්ලිමේන්තු මන්ත්‍රී සුනිල් හඳුන්නෙත්ති මහතා විසින්...
පොදු ව්‍යාපාර පිළිබඳ කාරක සභාවේ පළමු වාර්තාව පොදු ව්‍යාපාර පිළිබඳ කාරක සභාවේ සභාපති, පාර්ලිමේන්තු මන්ත්‍රී සුනිල් හඳුන්නෙත්ති මහතා විසින් අද (09) පාර්ලිමේන්තුවට ඉදිරිපත් කළේය.
සභාපතිවරයා වාර්තාව ඉදිරිපත් කරමින් සඳහන් කළේ, 2016 ජනවාරි සිට අප්‍රේල් දක්වා කාලසීමාව තුළ සිදු කළ විමර්ශන, වාර්තාවට ඇතුළත් කර තිබෙන බවයි.
සංක්ෂිප්ත අතුරු වාර්තාව ලෙස පාර්ලිමේන්තුවට ඉදිරිපත් කිරීමට හැකි වීම පිළිබඳව සහාය දුන් සියලු පාර්ශව වෙත මන්ත්‍රීවරයා සිය ස්තූතිය පළ කළේ ය.
මන්ත්‍රීවරයා මෙසේද පැවසී ය,
“අපි බලාපොරොත්තු වුණා ආයතන මට්ටමින් වෙන වෙනම වාර්තා ඉදිරිපත් කරන්න. එහෙත් අපි ආයතන 19ක සංක්ෂිප්ත වාර්තාවක් ඉදිරිපත් කරන්නේ. කෙටි කාලයක් තුළ අතුරු වාර්තාවක් හැටියට මේ වාර්තාව ඉදිරිපත් කරනවා. අපට අත්දැකීම් තිබෙන්නේ අවුරුද්දක පමණ කාලයක් ගියාට පස්සේ මේ කාරක සභාවෙන් වාර්තාවක් පාර්ලිමේන්තුවට ඉදිරිපත් කිරීම ගැනයි.
පාර්ලිමේන්තුව අවස්ථාවක් ලැබෙනවා මේ ආයතනවල වර්තමාන තත්ත්වයට ආදේශ කරලා පාර්ලිමේන්තුවේ විවාද කරලා අපි ඉදිරිපත් කර තිබෙන නිර්දේශ ක‍්‍රියාත්මක කිරීම සඳහා යම් බලයක්, ශක්තියක් ලබාදීමට. ඒ පිළිබඳව අවධානය යොමුකර මේ සංක්ෂිප්ත අතුරු වාර්තාව ඉදිරිපත් කරන්නේ. මීට අමතරව අපි තවත් ආයතන 15ක් පමණ මේ වන විට කැඳවලා තිබෙනවා. ඒ වාර්තාවත් අපි කඩිනමින් ඉදිරිපත් කරන්න බලාපොරොත්තු වෙනවා. එහිදී කාරක සභාව මුහුණ දෙන පොදු ගැටලූ අතර එක ගැටලූවක් තමයි කාරක සභාවේ කටයුතු කාර්යක්ෂමව කරගෙන යන්න ස්ථාවර නියෝගවලින් තිබෙන බාධාවන් ඉවත් කර ගත යුතු වීම. ඒ නිසා අපට ස්ථාවර නියෝග කාරක සභාව හරහා ඉදිරිපත් කරන්න යෝජනා ගණනාවක් තිබෙනවා. ඒ වගේම තාක්ෂණික වශයෙන් විශේෂඥ සහාය අවශ්‍ය වෙලා තිබෙනවා.
ඒ වගේම විමර්ශන කටයුතු සහ කාරක සභාවේ යම් යම් නිර්දේශයන් මීට වඩා මහජනතාවට ලැබිය යුතු යැයි අපි විශ්වාස කරනවා. මූල්‍ය පාලන බලය පාර්ලිමේන්තුවට තිබෙන නිසා ඒ පිළිබඳ අවධානය යොමුකරන්න කියලා කතානායකතුමාගෙන් ඉල්ලා සිටිනවා. ඒ ස්ථාවර නියෝගවලින් තිබෙන බාධා ඉවත් කරලා මහජනතාවට කමිටුවේ කටයුතු විවෘත කරන්න යම් ක‍්‍රමවේදයක් කඩිනමින් සකස්කර ගැනීමේ අවශ්‍යතාවය මතුවී තිබෙනවා. මේ වන විටත් අප පොදු ව්‍යාපාර කාරක සභාවේ උන්නතිය වෙනුවෙන් පියවර කිහිපයක් ම ගෙන තිබෙනවා“ යැයි සුනිල් හඳුන්නෙත්ති මහතා පැවසී ය.
COMMENTS