සියලුම මත්පැන් නිෂ්පාදන සමාගම්වලින් හිඟ බදු මුදල් අයකර ගැනීමට බලධාරීන්ට නියෝග කරන ලෙස ඉල්ලා සමාජ ක්‍රියාකාරීන් 17 දෙනකු ශ්‍රේෂ්ඨාධිකරණයට ම...
සියලුම මත්පැන් නිෂ්පාදන සමාගම්වලින් හිඟ බදු මුදල් අයකර ගැනීමට බලධාරීන්ට නියෝග කරන ලෙස ඉල්ලා සමාජ ක්‍රියාකාරීන් 17 දෙනකු ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනුකර තිබේ.
2023 ජුනි 15 වන විට මත්පැන් නිෂ්පාදන සමාගම් විසින් ගෙවිය යුතු ආපසු බදු ප්‍රමාණය රුපියල් මිලියන 6,221 දක්වා ඉහළ ගොස් ඇති බව පෙත්සම්කරුවෝ සිය පෙත්සමින් ප්‍රකාශ කරති.
සංජය මහවත්ත ඇතුළු සමාජ ක්‍රියාකාරීන් 17 දෙනකු මෙම පෙත්සම ගොනුකළේ සුරාබදු දෙපාර්තමේන්තුවේ කොමසාරිස් ජනරාල්, මුදල් රාජ්‍ය ඇමැති, විගණකාධිපති සහ W. M. Mendis & Co. Limited, Wayamba Distilleries (Pvt) Ltd, Globe Blenders and Bottlers Lanka (Pvt) Ltd, McCallum, Brewing Co (Pvt) Ltd, Kalutara Co-op Distileries Society Ltd, Finland Distileries Corporation (Pvt) Ltd, Synergy Distileries (Pvt) Ltd, Randenigala Distileries Lanka (Pvt) Ltd, Hingurana Distileries (Pvt) Ltd, Roistal Distilleries ) Ltd යන මත්පැන් නිෂ්පාදන සමාගම් හා තවත් කිහිපදෙකු වගඋත්තරකරුවන් ලෙස නම් කරමින් නීතීඥ මංජුල බාලසූරිය මාර්ගයෙනි.
හිඟ බදු මුදල සම්පූර්ණයෙන් ගෙවන තුරු මත්පැන් නිෂ්පාදන මෙම සමාගම් වෙත නිකුත් කර ඇති අදාළ මත්පැන් නිෂ්පාදන බලපත්‍ර අත්හිටුවීමට සහ අලුත් කිරීමෙන් වළකින ලෙස බලධාරීන්ට නියෝග කරන ලෙසට නියෝගයක් නිකුත් කරන ලෙස පෙත්සම්කරුවෝ සිය පෙත්සමින් ඉල්ලා සිටිති.
පෙත්සම්කරුවන් ප්‍රකාශ කළේ 2022 වසරේදී ශ්‍රී ලංකා රජයට සිය බදු ආදායම් ඉලක්කය මගහැරී ගිය බවත්, එය රුපියල් බිලියන 101කින් අඩු වූ බවත්ය. එම රුපියල් බිලියන 101 අතර බදු ආදායම රුපියල් බිලියන 26ක් වූයේ සුරාබදු ආදායම බව ඔවුහු පෙන්වාදෙති.
බලධාරින් විසින් බදු අයකර ගැනීමේ අසාර්ථකත්වය රට ආර්ථික පරිහානියට හේතු වූ බව පෙත්සම්කරුවෝ ප්‍රකාශ කරති.
රට බංකොලොත් වූ පසුවත් නිසි ආදායම් අයකර ගැනීමේ ක්‍රියාවලියක් සිදුකිරීමට බලධාරීන් අපොහොසත් වී ඇති බව පෙත්සම්කරුවෝ පෙන්වාදෙති.
එවැනි අසාර්ථකවීම් 2022 වසරේදී ශ්‍රී ලංකා රජය සහ අන්තර්ජාතික මූල්‍ය අරමුදල සමග ඇතිකරගත් එකඟතාවට පටහැණි බව පෙත්සම්කරුවෝ වැඩිදුරටත් ප්‍රකාශ කරති.
COMMENTS