දෙමළ ජනතා පක්ෂය (TMK) නමින් නව දේශපාලන පක්ෂයක් තමන් විසින් පිහිටුවන ලද්දේ දෙමළ ජාතික සන්ධානය තුළ බෙදීම් ඇති කිරීමට නොවන බව එම පක්ෂයේ නායක ...
දෙමළ ජනතා පක්ෂය (TMK) නමින් නව දේශපාලන පක්ෂයක් තමන් විසින් පිහිටුවන ලද්දේ දෙමළ ජාතික සන්ධානය තුළ බෙදීම් ඇති කිරීමට නොවන බව එම පක්ෂයේ නායක සී.වී.විග්නේස්වරන් මහතා පැවසීය.
ඔවුන්ගේ ඇතැම් ප්‍රතිපතිති නිසා තමන්ට තවදුරටත් ඔවුන් සමග එකට එක්ව දේශපාලනයේ නිරතවීමට නොහැකි වූ වාතාවරණයක් ගොඩ නැගීම නිසා තමන්ට එවැනි තීරණයක් ගැනීමට සිදු වූ බව විග්නේස්වරන් මහතා කියා සිටියේ ටී.එම්.කේ පක්ෂයේ මධ්‍යම කාරක සභා රැස්වීම යාපනයේ නල්ලූර් කන්දසාමී කෝවිල් පාරේ පිහිටි විග්නේස්වරන් මහතාගේ නිවසේ පැවති අවස්ථාවේදීය.
මේ මධ්‍යම කාරක සභාවේදී දෙමළ ජනතා පක්ෂයේ මධ්‍යම කාරක සභාව සංශෝධනයට ලක් කරමින් විසි දෙදෙනෙකුගෙන් සමන්විත නව මධ්‍යම කාරක සභාවක්ද පිහිටුවා ගෙන තිබේ.
තව දුරටත් අදහස් දැක්වූ සී.වී.විග්නේස්වරන් මහතා කියා සිටියේ තම පක්ෂය ප්‍රජාතන්ත්‍රවාදීව ඉදිරියට ගෙන යාමට සූදානම් බවයි.
දෙමළ ජාතික සන්ධානය ඉතාමත්ම යටි කූට්ටු වැඩ පිළිවෙලක් දියත් කරමින් තමන්ව එම පක්ෂයෙන් ඈත් කිරීමට කටයුතු කළ බවත්
කුමන හේතුවක මතවත් තමන් මීළගට උතුරු පළාත් ප්‍රධාන අමාත්‍යධුරයට තරග කිරීමට ගෙන ඇති තීරණය වෙනස් නොකරණ බවත් ඔහු මෙහිදී කියා සිටියේය.
දෙමළ ජාතික සන්ධානයේ ප්‍රජාතාන්ත්‍රීය භාවය මේ දිනවල ඉතා හොදින් ප්‍රදර්ශනය වන බව උදාහරණ සහිතව පෙන්වා දුන් සී.වී.විග්නේස්වරන් මහතා ඔවුන්ගේ උගුලේ හසුවෙතැයි බියෙන් සිටින උතුරේ දෙමළ දේශපාලනඥයින්ට තම පක්ෂයට එකතුවන ලෙස ආරාධනාවක්ද කළේය.
තමන් විසින් පිහිටුවා ගන්නා ලද දෙමළ ජනතා පක්ෂය යළි කිසිම විටක දෙමළ ජාතික සන්ධානය සමග ගණුදෙණුවක් නොකරණ බවත් දෙමළ ජාතික සන්ධානයෙන් ඉවත්ව ගොස් සිටින සුරේෂ් ප්‍රේමචන්ද්‍රන් මහතාගේ ඊ.පී.ආර්.එල්.එෆ්.සංවිධානය සමගත් ගජේන්ද්‍රකුමාර් පොන්නම්බලම් මහතාගේ දෙමළ ජාතික ජනතා පෙරමුණ සමගත් ඕනෑම වේලාවක කටයුතු කිරීමට ගණුදෙණු කිරීමට සූදානම් බවද සී.වී.විග්නේස්වරන් මහතා මෙහිදී කියා සිටියේය.
(දිනසේන රතුගමගේ)
COMMENTS