උතුරු පළාත් සභාව ආරම්භ කළ දින සිට මේ දක්වාම පැමිණි ආණ්ඩුකාරවරු අතරින් රෙජිනෝල්ඞ් කුරේ මහතා සුවිශේෂී පුද්ගලයෙක් වන අතර සිංහල, දෙමළ, ඉංග‍්‍ර...
උතුරු පළාත් සභාව ආරම්භ කළ දින සිට මේ දක්වාම පැමිණි ආණ්ඩුකාරවරු අතරින් රෙජිනෝල්ඞ් කුරේ මහතා සුවිශේෂී පුද්ගලයෙක් වන අතර සිංහල, දෙමළ, ඉංග‍්‍රීසි භාෂා තුනම ප‍්‍රවීණ ලෙස කථා කිරීමට ඇති හැකියාව නිසා රෙජිනෝල්ඞ් කුරේ මහතාව නැවත උතුරු පළාත් ආණ්ඩුකාරවරයා වශයෙන් පත් කරන ලෙස උතුරු පළාත් සභාවේ හිටපු සභාපති සී. වී. කේ. සිවඥානම් මහතා පැවසීය.
හිටපු සභාපතිවරයා මේ බව කියා සිටියේ යාපනය කල්වියන්කාඩු ප්රදේශයේ පිහිටි සී.වී.කේ.සිවඥානම් මහතාගේ නිවසේ පැවති මාධ්‍ය සාකච්ඡාවකට සහභාගී වෙමිනි. එහිදී වැඩි දුරටත් අදහස් දැක්වූ හිටපු සභාපතිවරයා කියා සිටියේ,
උතුරු පළාත් සභාව පැවති කාලයේ පළාත් සභාව සමග මිත‍්‍රශීලීව කටයුතු කරමින් පළාත් සභාවේ ප‍්‍රඥප්ති සම්මත කිරීමට ඉමහත් දායකත්ත්වයක් ලබා දුන් රෙජිනෝල්ඞ් කුරේ මහතාව නැවත උතුරට ලබා දෙයි කියා මා විශ්වාස කරනවා. ඒ වගේම රෙජිනෝල්ඞ් කුරේ මහතා ප්රදේශයේ ජනතාවගේ ප‍්‍රශ්න විසඳීමට දෙමළ පුරවැසියන් සමග දෙමළෙන් කථා කරමින් සෑම ප‍්‍රශ්නයකටම නිර්භයව මුහුණ දුන් නායකයෙකු ලෙසද මා විශ්වාස කරන අතර ඒ මහතාව නැවත උතුරට ලබා දිය යුතු බව මා මතක් කරනවා.
එසේම ඒ මහතාව උතුරට ලබා දීම උතුරේ ජනතාවගේ වැඩ කටයුතු වලට පහසුවක් වන බව වැඩිදුරටත් සඳහන් කරන අතර උතුරේ සංහිඳියාව ආරක්‍ෂා කිරීමට රෙජිනෝල්ඞ් කුරේ මහතා වැනි ආණ්ඩුකාරවරයෙක් උතුරට අත්‍යවශ්‍ය යයි මා නැවතත් මතක් කර සිටිනවා. යනුවෙනි.
මේ අතර පසුගියදා කිලිනොච්චිය දිස්ත්‍රීක්කයේදී යාපනය සිංහ සමාජය විසින්ද විරෝධතාවයක් පවත්වමින් කියා සිටියේ රෙජිනෝල්ඩ්කුරේ මහතා නැවත වරක් උතුරු ප්‍රදේශයේම ආණ්ඩුකාර වරයා වශයෙන් පත් කරන් ලෙසට උතුරේ ජනතාව ඉල්ලා සිටින බවට පවසමිනි.
(වන්නි රොමේෂ් මධුෂංඛ)
COMMENTS