යුද හමුදා සැරයන් මේජර්වරයකුගේ බිරිය සහ හමුදා සෙබළුන් තිදෙනකුගේ මවක වන 50 හැවිරිදි කාන්තාවක් හිටපු හමුදා කෝප්‍රල්වරුන් තිදෙනකු බීමත්ව රංච...
යුද හමුදා සැරයන් මේජර්වරයකුගේ බිරිය සහ හමුදා සෙබළුන් තිදෙනකුගේ මවක වන 50 හැවිරිදි කාන්තාවක් හිටපු හමුදා කෝප්‍රල්වරුන් තිදෙනකු බීමත්ව රංචු ගැසී වරින් වර බරපතළ ලෙස සමූහ දූෂණය කිරීමේ සිද්ධියට අදාළ නඩුව ලබන දෙසැම්බර් මස 26 වැනි දින විභාගයට ගැනීමට උතුරු මැද පළාත්බද
මහාධිකරණ විනිසුරු මහේෂ් වීරමන් මහතා නියෝග කළේය. මෙම අපරාධය සම්බන්ධයෙන් චෝදනා ලැබ සිටින විත්තිකාර හිටපු යුද හමුදා කෝප්‍රල්වරුන් තිදෙනා අනුරාධපුර මහාධිකරණයේදී උතුරු මැද පළාත්බද මහාධිකරණ විනිසුරු මහේෂ් වීරමන් මහතා හමුවේ මීට පෙර අධිචෝදනා භාර දෙනු ලැබීය.
අධි චෝදනා ලබා සිටින විත්තිකාර හිටපු යුද හමුදා කෝප්‍රල්වරුන් තිදෙනා ලබන දෙසැම්බර් මස 26 වැනි දින දක්වා යළි අනුරාධපුර මහාධිකරණය හමුවේ පෙනී සිටින ලෙසටද මහාධිකරණ විනිසුරුවරයා තවදුරටත් නියෝග කළේය.
මෙසේ අධිචෝදනා ලැබ සිටින්නේ මඩඟපොළ ලිපිනයේ සහ හොරොව්පොතාන - පරංගියාවාඩිය - නබඩවැව තාවකාලික ලිපිනයේ කේ.ඒ. සුමිත් විජේරත්න, අනුරාධපුර - විහාරපාලුව ලිපිනයේ පී. ලලිත් ගුණසිංහ සහ කුරුණෑගල - හිඳගොල්ල ළිඳපිටියවත්ත ලිපීනයේ ඩබ්.ඒ. උදය ශක්ති ප්‍රේමදාස යන හිටපු යුද හමුදා කෝප්‍රල්වරුන් තිදෙනාටය. පැමිණිල්ල වෙනුවෙන් රජයේ අධි නීතිඥ රජින්ද ජයරත්න මහතා පෙනී සිටි අතර විත්තිකරුවන් වෙනුවෙන් නීතිඥ කාලිංග රවින්ද්‍ර මහතා පෙනී සිටියේ. විත්තිකරුවන් නොච්චියාගම - ළිඳවැව යුද හමුදා කඳවුරේ සක්‍රිය සේවයේ යෙදී සිටිමින් 2013 වසරේ ජූලි මස 28 වැනි දින රාත්‍රියේ බීමත්ව යතුරුපැදිවලින් හොරොව්පොතාන - නබඩවැව ප්‍රදේශයට ගොස් මෙම අපරාධය සිදුකර ඇති බව මේ සම්බන්ධයෙන් සිදු කළ මූලික පොලිස් විමර්ශනවලදී අනාවරණය වූ බව මෙම සිද්ධිය සම්බන්ධයෙන් කැබිතිගොල්ලෑව මහෙස්ත්‍රාත් අධිකරණයට මුල් අවස්ථාවේ කරුණු දක්වමින් හොරොව්පොතාන පොලිසිය කීවේය.
සැකකරුවන් බීමත්ව රංචු ගැසී ඉතා බරපතළ ලෙස සමූහ දූෂණයට ලක් කර ඇති කාන්තාව යුද හමුදාවේ සැරයන් මේජර්වරයකුගේ බිරියක වන බව අධිකරණයට කියා සිටි
සැකකරුවන් අදාළ කාන්තාවන්ගෙන් පැහැර ගන්නා ලද ජංගම දුරකථනයේ ඉමි අංකය ඔස්සේ සිදු කළ පුළුල් විමර්ශනයකින් අනතුරුව අපරාධය සිදුවී දින 19ක් ඇතුළත ඉතා සූක්ෂම අයුරීන් පොලිස් උපාය දූතයන් යොදවා විත්තිකරුවන් අනුරාධපුර නගරයේදී අත්අඩංගුවට ගෙන තිබිණි. එවකට හොරොව්පොතාන සහකාර පොලිස් අධිකාරීවරයාව සිටි සීතාවක කොට්ඨාස භාර වත්මන් පොලිස් අධිකාරී උපුල් චන්දන අබේසිංහ මහතාගේ මෙහෙය වීම මත ක්රියාත්මක වූ එවකට හොරොව්පොතාන පොලිසියේ ස්ථානාධිපතිව සිටි අනුරාධපුර වත්මන් මූලස්ථාන ප්‍රධාන පොලිස් පරීක්ෂක සංජීව මහානාම සහ අනුරාධපුර කොට්ඨාස අපරාධ විමර්ශන අංශයේ හිටපු ස්ථානාධිපති මෙන්ම ඉපලෝගම පොලිසියේ වත්මන් වැඩබලන ස්ථානාධිපති පොලිස් පරීක්ෂක කිත්සිරී හේරත් යන මහත්වරුන් ඇතුළු පොලිස් නිලධාරීන් කණ්ඩායමක් මඟිනි.
විත්තිකාර හමුදා කෝප්පල්වරුන් සක්‍රීය යුද හමුදා සේවයේ නිරතව සිටියදී මෙම අපරාධය සිදුකළ බවට විමර්ශනවලදී හෙළි කර ගැනිණි. සියලු විත්තිකරුවන් මීට පෙර මාස ගණනක් අඛණ්ඩව රිමාන්ඩ් කර සිටි අතර පසුව ඔවුන් කැබිතිගොල්ලෑව මහෙස්ත්‍රාත් අධිකරණය මගින් දැඩි ඇප කොන්දේසි මත මුදා හැරිණි.
මෙම අපරාධයේ සිවුවැනි සැකකරු ලෙස නම් කර සිටි හිටපු යුද හමුදා සෙබළකු වන අනුරාධපුර - ඇලයාපත්තුව නව ගම්මානය ලිපිනයේ බී. නිමලදාස යන අය නීතිපතිවරයා විසින් රජයේ සාක්ෂිකරුවකු ලෙස නම් කර සිටී. පැමිණිල්ල වෙනුවෙන් රජයේ අධිනීතිඥ රජින්ද ජයරත්න මහතා සමග හොරොව්පොතාන පොලිසියේ ස්ථානාධිපති පොලිස් පරික්ෂකයන් රොෂාන් සංජීව මහතාගේ උපදෙස් මත එම පොලිසියේ නිලධාරීන් පෙනී සිටියේය.
-ආනන්ද කරුණාදාස-
COMMENTS