ශ්‍රී ලංකාව තුළ ඇති වී තිබෙන දේශපාලන අර්බුදය විශාල අර්බුදයක් බවට නිර්මාණය නොවීමට මැදිහත් කරුවන් වශයෙන් දෙමළ දේශපාලන පක්ෂ කටයුතු කළ යුතු බව...
ශ්‍රී ලංකාව තුළ ඇති වී තිබෙන දේශපාලන අර්බුදය විශාල අර්බුදයක් බවට නිර්මාණය නොවීමට මැදිහත් කරුවන් වශයෙන් දෙමළ දේශපාලන පක්ෂ කටයුතු කළ යුතු බව එක්සත්ජාතීන්ගේ සංවිධානයේ ශ්‍රී ලංකාවේ නිත්‍ය නියෝජිතවරිය දෙමළ ජාතික සන්ධානයේ නායක ආර්.සම්බන්ධන් මන්ත්‍රීවරයාට ප්‍රකාශ කොට තිබේ.
එතුමිය මෙසේ ප්‍රකාශ කොට ඇත්තේ ඊයේ (31) කොළඹදී මේ දෙපාර්ශවය හමු වූ අවස්ථාවේදීය
මේ සාකච්ඡාවට දෙමළ ජාතික සන්ධානයේ ප්‍රකාශක යාපනය දිස්ත්‍රික් පාර්ලිමේන්තු මන්ත්‍රී එම්.ඒ.සුමන්තිරන් මහතාද සහභාගී වී තිබේ.
එක්සත් ජාතීන්ගේ නියෝජිතවරිය තවදුරටත් පවසා ඇත්තේ ශ්‍රී ලංකාව තුළ හදිසියේම ඇති වූ මේ දේශපාලන අර්බුදය සම්බන්ධයෙන් එක්සත් ජාතීන්ගේ සංවිධානය දැඩි අවධානයෙන් සිටින බවයි.
මේ අවස්ථාවේදී ඇති වී තිබෙන දේශපාලන අර්බුදය නරක අතට හැරීම වැළැක්වීම සදහා ජගත් සංවිධානය ශ්‍රී ලංකාවේ සියළු දේශපාලන නායකයින් සමග සාකච්ඡා කරගෙන යන බවත් හානා සිංගර් මහත්මිය ප්‍රකාශ කොට තිබේ.
සම්බන්ධන් විපක්ෂනායකවරයාත් සුමන්තිරන් මන්ත්‍රීවරයාත් මේ අවස්ථාවේදී එක්සත් ජාතීන්ගේ නියෝජිතවරියට පවසා ඇත්තේ ව්‍යවස්ථාවට පරිබාහිරව හා පටහැනිව ගන්නා ලද තීරණ නිසා රටේ මේ අවාසනාවන්ත තත්ත්වය ඇති වී ඇති බවයි.
මේ නිසා කල් දමා ඇති පාර්ලිමේන්තුව ඉතා ඉක්මනින් යළි ආරම්භ කොට මේ අර්බුදය විසදා ගැනීමට හැකි නිසා පාර්ලිමේන්තුව විවෘත කිරීම කෙරෙහි ජනාධිපතිවරයාගේ අවධානය යොමු කිරීමට මැදිහත් වන ලෙසද දෙමළ ජාතික සන්ධානයේ පිරිස එක්සත් ජාතීන්ගේ සංවිධානයේ නියෝජිතවරියගෙන් ඉල්ලා තිබේ.
(දිනසේන රතුගමගේ)
COMMENTS