ඉපැරණි බෞද්ධ වෙහෙර සංකීර්ණයක් පවතින වවුනියාව නෙඩුක්කේනි වෙඩුක්කුනාරි පුරාවිද්‍යා භූමිය සම්බන්ධයෙන් ඇතිව තිබෙන ගැටලු සහගත තත්වය නිරීක්ෂණය ක...
ඉපැරණි බෞද්ධ වෙහෙර සංකීර්ණයක් පවතින වවුනියාව නෙඩුක්කේනි වෙඩුක්කුනාරි පුරාවිද්‍යා භූමිය සම්බන්ධයෙන් ඇතිව තිබෙන ගැටලු සහගත තත්වය නිරීක්ෂණය කිරීමට දෙමළ ජාතික සන්ධාන පාර්ලිමේන්තු මන්ත්‍රීවරුන් හා පළාත් සභා මන්ත්‍රීවරුන් පිරිසක් ඊයේ (09) එම ස්ථානයේ සංචාරයක නිරත වූහ.
ප්‍රදේශ භාර පුරාවිද්‍යා නිළධාරීන්ගේ මතයට අනුව පැරණි ශිලා ලිපි, පැරණි බෞද්ධ වෙහෙරක නටබුන්, පැරණි බෞද්ධ විහාරයක ලක්ෂණ පවතින නෙඩුන්කේනි වෙඩුක්කුනාරි ගල් තලාව පුරාවිද්‍යා භූමියක් බැවින් එම ස්ථානයේ අලුතින් කෝවිලක් ඉදිකිරීමට අවසර දීම නොහැකි බවටයි.
නමුත් ප්‍රදේශවාසී දමිල ජනාතව කියා සිටියේ අදාළ ගල් තලාව පැවති ස්ථානය තුළ අතීතයේ පටන් ශිව දෙවියන් වෙනුවෙන් කෝවිලක් පැවති බැවින් අදාළ ස්ථානයේ ශිව දෙවියන් වෙනුවෙන් කෝවිලක් ඉදිකිරීමට අවසර ලබා දිය යුතු බවටයි.
අදාළ කාරණය හේතුවෙන් වෙඩුක්කුනාරි පුරාවිද්‍යා භූමිය සම්බන්ධයෙන් ගැටළුවක් හටගෙන ඇති අතර, එම භූමිය තුළ කෝවිලක් ඉදිකිරීමට අවසර ඉල්ලා දෙමළ ජාතික සන්ධාන නියෝජිතයින් හා ප්‍රදේශවාසීන්ගේ සහභාගීත්වයෙන් පසුගියදා නෙඩුන්කේනි ප්‍රදේශයේ විරෝධතාවයක්ද පැවත්වූහ.
ගැටලු සහගත ස්ථානය නිරීක්ෂණය වෙනුවෙන් වන්නි පාර්ලිමේන්තු මන්ත්‍රි චාර්ල්ස් නිර්මලනාදන් මහතා,ශිවශක්ති ආනන්දන් මහතා, උතුරු පළාත් කාන්තා කටයුතු අමාත්‍ය ආනන්දි සෂිදරන් මහත්මිය, උතුරු පළාත් සභා මන්ත්‍රි එම්.කේ.ශිවාජිලිංගම් මහතා, උතුරු පළාත් සභා මන්ත්‍රී ජි.ටි.ලිංගනාදන් මහතා ඇතුළු පිරිසක් ඊයේ එක්විණ.
එහිදී පුරාවිද්‍යා ස්ථානය නිරීක්ෂණය කළ පාර්ලිමේන්තු මන්ත්‍රී චාර්ල්ස් නිර්මලනාදන් මහතා පැවසූවේ දෙමළ ජනතාවගේ පාරම්පරික භූමිය තුළ දෙමළ ජනතාවට කෝවිලක් ඉදිකිරීමට අවසරය ලබා නොදීම තමන් තරයේ හෙළා දකින අතර, මේ සම්බන්ධයෙන් පාර්ලිමේන්තුවේ අවධානය යොමු කිරීමට කටයුතු කරන බවයි.
(වන්නි රොමේෂ් මධුෂංඛ)
COMMENTS