“රට වනසන, රට පාවාදෙන වැඩ බැරි පරගැති ආණ්ඩුව පලවා හරිමු” යන තේමාව යටතේ ඒකාබද්ධ විපක්ෂයට අනුබද්ධ “ජන බල සේනා” ජාතික ව්‍යාපාරය සංවිධානය කරන ව...
“රට වනසන, රට පාවාදෙන වැඩ බැරි පරගැති ආණ්ඩුව පලවා හරිමු” යන තේමාව යටතේ ඒකාබද්ධ විපක්ෂයට අනුබද්ධ “ජන බල සේනා” ජාතික ව්‍යාපාරය සංවිධානය කරන විරෝධතා පාගමන හා ජන රැළිය අද (02) කොළඹදී පැවැත්වේ.
විරෝධතා පාගමන ලිප්ටන් වටරවුමේ දී අද සවස 2.00ට පැවැත්වෙන අතර මහා ජන රැළිය විහාරමහදේවි එළිමහන් රංග පීඨයේදී සවස 3.00 ට පැවැත්වේ.
ඒකාබද්ධ විපක්ෂ පාර්ලිමේන්තු කණ්ඩායමේ නායක දිනේෂ් ගුණවර්ධන, ජාතික නිදහස් පෙරමුණේ නායක විමල් වීරවංශ, ශ්‍රී ලංකා පොදුජන පෙරමුණ නියෝජනය කරමින් බන්දුල ගුණවර්ධන, මහින්දානන්ද අලුත්ගමගේ, ප්‍රජාතන්ත්‍රවාදී වාමාංශික පෙරමුණේ නායක වාසුදේව නානායක්කාර, පිවිතුරු හෙළ උරුමයේ නායක උදය ප්‍රභාත් ගම්මන්පිල, ශ්‍රී ලංකා මහජන පක්ෂයේ නායක අසංක නවරත්න ඇතුළු ඒකාබද්ධ විපක්ෂයේ නායකයන්, ජාතික සංවිධාන පොදු මධ්‍යස්ථානයේ නායකයන්, ජාතික සම්පත් සුරැකීමේ ජාතික ව්‍යාපාරය ඇතුළු සංවිධානවල නියෝජිතයන් විරෝධතා ජන රැළිය ඇමතීමට නියමිතය.
ජන බල සේනා විරෝධතා ව්‍යාපාරය සම්බන්ධ මහජනතාව දැනුවත් කිරීම සදහා කොටුව දුම්රියපළ ඉදිරිපිට දී ඊයේ සවස අත්පත්‍රිකා බෙදීමේ වැඩසටහනක් සංවිධානය කර තිබූ අතර ප්‍රජාතන්ත්‍රවාදී වාමාංශික පෙරමුණේ නායක වාසුදේව නානායක්කාර, පිවිතුරු හෙළ උරුමයේ නායක උදය ගම්මන්පිල, ජාතික නිදහස් පෙරමුණේ දේශපාලන මණ්ඩල සභික ශාන්ත ගුණසේකර යන මහත්වරුන් ඇතුළු පිරිසක් මීට එක්ව සිටියහ.
එහිදී උදය ගම්මන්පිල මහතා මෙසේ අදහස් දැක්වීය.
“ මේ ආණ්ඩුව ගෙදර යවන්න ඕනේ කියලා හිතෙන රට ගැන හිතන, තමන් ගැන, පුංචි දරුවන් ගැන, ආදරයක් කැක්කුමක් තියෙන සියලුම දෙනා අද සවස දෙකට ලිප්ටන් වටරවුමට පැමිණේවි කියලා අපි බලාපොරොත්තු වෙනවා. දිගටම මැතිවරණ කල් දමමින් ජනතා මතයට පයින් ගසන්නට ආණ්ඩුව උත්සාහ කලොත් අරාබි වසන්තයක් ලංකාවේ ඇතිවීම කිසිම ජගතෙකුට වලක්වන්න බැහැ කියලා අපි අනතුරු ඇඟවීමක් කරනවා.මේ රට ලේ විලක්, ගිනිගොඩක් නොකර වහාම මැතිවරණයක් පවත්වා වැඩ බැරිනම් ගෙදර යන්නේ කියලා අපි ආණ්ඩුවට මතක් කරනවා.”
COMMENTS