බස්නාහිර ලක්ෂ හයේ පුටු වාර්තාවේ අවුලක්

බස්නාහිර පළාත් සභාව සඳහා රුපියල් හය ලක්ෂ 40 000ක පමණ වටිනාකමකින් යුත් පුටු, ගෙන්වීමේ සූදානම සම්බන්ධයෙන් සොයාබැලීමට පත් කළ කමිටු වාර්තාවේ ද...

බස්නාහිර පළාත් සභාව සඳහා රුපියල් හය ලක්ෂ 40 000ක පමණ වටිනාකමකින් යුත් පුටු, ගෙන්වීමේ සූදානම සම්බන්ධයෙන් සොයාබැලීමට පත් කළ කමිටු වාර්තාවේ දෝෂ පවතින බව බස්නාහිර පළාත් ආණ්ඩුකාර හේමකුමාර නානායක්කාර පවසයි.

ආණ්ඩුකාරවරයා කියා සිටියේ අදාළ වාර්තාව සම්බන්ධයෙන් තවදුරටත් දීර්ඝ ලෙස අධ්‍යනය කළ යුතු බවයි.

මේ සම්බන්ධයෙන් සොයා බැලීම සඳහා පත්කළ කමිටු වාර්තාව පළාත් ආණ්ඩුකාරයා වෙත ඊයේ භාරදී තිබිණි.

පළාත් සභාවේ නව ගොඩනැගිලි සංකීර්ණය සඳහා බෙල්ජියමෙන් පුටු 125 ක් ගෙන්වන බවට පසුගියදා ආණ්ඩුකාර හේමකුමාර නානායක්කාර මහතා වෙත පැමිණිලි කරනු ලැබුවේ ජනතා විමුක්ති පෙරමුණේ පළාත් සභා මන්ත්‍රී ලක්ෂ්මන් නිපුණආරච්චි විසිනි.

පසුව අදාළ තීරණය අත්හිටුවූ, ආණ්ඩුකාරවරයා ඒ සඳහා විමර්ශනයට පස් දෙනෙකුගෙන් යුත් කමිටුවක් පත්කරනු ලැබීය.

එහි වාර්තාව පළාත් සභාවේ ලේකම් ප්‍රදීප් යසරත්න මහතා වෙත භාරදෙනු ලැබුවේ පෙරේදා දිනයේදීය.

බෙල්ජියමෙන් ආනයනය කරන රුපියල් හය ලක්ෂ 40 000 වටිනා පුටුවෙහි නිෂ්පාදිත පිරිවැය රුපියල් දෙලක්ෂ 90 000 ක් වන අතර, එක් පුටුවකට රුපියල් එක් ලක්ෂ 97 000ක් බද්දක්ද අය කෙරේ.