"වනජීවී දෙපාර්තමේන්තුව කෝටිපති ආයතනයක්" - ෆොන්සේකා හෙළි කරයි

රට පුරා පැතිර ඇති වන අලි උවදුර ඉදිරි වසරක කාලයක් ඇතුලත 95% ක ප්‍රමාණයක් අවසන් කිරීමට තමන් මේ වන විට බලාපොරොත්තුවෙන් සිටින බව තිරසාර වනජී...

රට පුරා පැතිර ඇති වන අලි උවදුර ඉදිරි වසරක කාලයක් ඇතුලත 95% ක ප්‍රමාණයක් අවසන් කිරීමට තමන් මේ වන විට බලාපොරොත්තුවෙන් සිටින බව තිරසාර වනජීවී හා ප්‍රාදේශීය සංවර්ධන අමාත්‍ය ෆීල්ඩ් මාෂල් සරත් ෆොන්සේකා මහතා 08 දින නාඋල ප්‍රාදේශීය ලේකම් කාර්යාලයේ පැවැති රැස්වීමකදී පැවසීය.

මොරගහකන්ද ජලාශ ඉදිකිරීම සඳහා ඉඩම් අත්පත් කරගැනීම සහ කැළෑ හෙළි කිරීමත් සමග එහි සිටි වනඅලින් මාතලේ දිස්ත්‍රික්කය පුරා ගම්වැදී සිදුවන ජීවිත හා දේපළ හානි පිළිබඳව සොයාබැලීම සඳහා දින දෙකක කාලයක් අත්‍යවරයා මාතලේ දිස්ත්‍රික්කයේ රැඳී සිටින අවස්ථාවේදී රාජ්‍ය නිලධාරීන් වනජීවී නිලධාරීන් ප්‍රදේශවාසී නියෝජිතයන් සමඟ නාඋල ප්‍රාදේශීය ලේකම් කාර්යාලයේදී හමුවක් පැවැත්විණි. එහිදී අලි ගැටුමට මැදිව සිටින බොහෝ ජනතා නියෝජිතයන් අදහස් ප්‍රකාශ කළහ.

මෙහිදී ජනතාව ඇමතූ අමාත්‍යවරයා කියා සිටියේ නිරන්තරයෙන්ම වන අලි පහරදීම් සහ වන අලි මිනිස් ගැටුම පිළිබඳව තොරතුරු වාර්තා වෙමින් පවතින බවය. තමන්ට කඩිනමින් ඒ සෑම ස්ථානයකටම ගමන් කිරීමට නොහැකි වුවද නියෝජ්‍ය අමාත්‍යවරයා (emergency) කඩිනම් සේවාවක් වගේ සෑම ස්ථානයකටම ගමන් කරන බව ය. ඔහු තරුණයෙක් නිසා ජවසම්පන්න ව ක්‍රියා කිරීම තමන්ට විශාල ශක්තියක් බව හෙළිදරව් කළේය.

අලි වැටවල් බලන්න ගස් උඩ නගින්න කොස් කඩන්න අලින්ට ආහාර දෙන්න ආදී ජවසම්පන්න නියෝජ්‍ය අමාත්‍යවරයා ක්‍රියාකරන බවත් මාත්‍යවරයා සඳහන් කළේය.

පසුගිය වසර තුළ අලින් දෙසිය අසූ දෙනෙක් මියගොස් මිනිසුන් අසූවක් මියගොස් තිබෙන බව ද මාත්‍යවරයා මෙහිදී සඳහන් කළේය. එමෙන්ම වර්තමානයේ රටේ අලි ගහනය 6000 ඉක්මවා ඇති බව ද සඳහන් කළේය.

වනජීවී දෙපාර්තමේන්තුවට වසර හැත්තෑවක් පමණ පරණ වුවත් අලි මිනිස් ගැටුමට වසර 35 ක් පමණ පරණ බවත් යුද්ධය තමාට බාර දුන්නෙත් වසර තිස් දෙකක් පරණ වූවන් පසු බව සඳහන් කළේය. වසර එකහමාරක පමණ කාලයකින් තමන්ට ගෙදර යන්නට සිදුවන නිසා වසරක් ඇතුළත අලි මිනිස් ගැටුම 95% ක් අවසන් කිරීමට තමන් ්ක්‍රියා කරන බව සඳහන් කළේය.

අලි මිනිස් ගැටුමට එකම විසඳුම බවට පත්ව ඇත්තේ ප්‍රමිතියෙන් යුතුව අලිවැට සවි කිරීම බවත් මේවන විට රට වටේ කිලෝමීටර් 4500 ක් විදුලිවැට තිබෙන බවත් ය .ශ්‍රී ලංකාවේ සිට හිමාලය වනය දක්වාම දිවෙන තත්ත්වයට පවතින බවද සඳහන් කළේය . ඒ සියලු විදුලි වැටවල් ප්‍රමිතියකින් තොර විදුලි වැටවල් බවද හෙළිදරව් කළේය .තවත් කිලෝමීටර් දෙදහස් පන්සීයක් විදුලිවැට අවශ්‍ය බව ද අමාත්‍යවරයා සඳහන් කළේය. තවත් කිලෝමීටර් 2500 ඉදි කොට ඒවා නඩත්තු කිරීම සඳහා වනජීවී දෙපාර්තමේන්තුවට පිරිස් බලය පන්දහසක් බඳවාගැනීමට අනුමැතිය ලැබී ඇතැයි හෙතෙම සඳහන් කළේය.

වනජීවී දෙපාර්තමේන්තුව මුදල් බිලියන 50ක් පමණ ඇති කෝටිපති ආයතනයක් බව ද සඳහන් කළේය. තමන් එම මුදල් වලට තට්ටු කරලා මේ වසර එකහමාර තුළ අලි මිනිස් ගැටුම අවසන් කරන බව කියා සිටියේය.

වනජීවී නිලධාරීන්ට සුදුසු නිල ඇඳුමක් ලබාදීමටත් එමෙන්ම දැනට පාවිච්චි කරන ගිනි අවිය වෙනුවට චීනයෙන් ගෙන්වූ ටී56 ගිනි අවියට සමාන ගිනිඅවියක් ලබාදීමට මේ වන විට ජනාධිපති වරයාගේ අවසරය ලැබුණු බවද හෙතෙම සඳහන් කළේය. එම ගිනි අවියෙන් අලින් වෙඩි තැබීම නොව තමන්ගේ ආත්ම ආරක්ෂාව සඳහා පාවිච්චි කළ යුතු බවද හෙතෙම සඳහන් කළේය.

(දඹුල්ල කාංචන කුමාර ආරියදාස)